Mariko 8 - Bhaibhiri Idzva rechiShona rine Dhuterokanonika

Jesu anopa zvokudya zvinogutsa zviuru zvina zvavanhu

¹ Namazuva iwayo gungano guru ravanhu parakaungana zvakare, uye vakanga vasisina chokudya akadaidza vadzidzi vake akati kwavari,

² “Ndine urombo kwazvo negungano ravanhu iri nokuti vanga vaneni kwamazuva matatu aya, zvino havachisina chokudya.

³ Kana ndikavaendesa kumisha yavo vaine nzara vachaziya panzira nokuti vamwe vavo vabva kure.”

⁴ Vadzidzi vake vakamupindura vachiti, “Pane angawane zvingwa mugwenga muno here zvingagutse vanhu ava?”

⁵ Akavabvunza kuti, “Mune zvingwa zvingani?” Ivo vakati, “Zvinomwe.”

⁶ Zvino akati vanhu ngava gare pasi. Akatora zvingwa zvinomwe zviya akatenda, ndokuzvimedura ozvipa vadzidzi vake kuti vape vanhu. Ivo ndokuzvipa kuvanhu.

⁷ Uye vakanga vane tuhove tushoma. Akatukomborera akati, “Kunyange itwotwu tupihwe vanhu.”

⁸ Vanhu vakadya vakaguta, vakazonhongerera zvimedu zvakasara zvikazadza nhengwana nomwe.

⁹ Pakanga paine zviuru zvinenge zvina zvavanhu. Akazoonekana navanhu,

¹⁰ pakarepo ndokubva akwira mugwa navadzidzi vake akaenda kudunhu reDharimanuta.

VaFarisei vanokumbira chiratidzo chinobva kudenga

¹¹ Zvino vaFarisei vakauya kwaari, vakatanga kuitirana nharo naye, vachitsvaka kwaari chiratidzo chinobva kudenga, kuri kumuedza.

¹² Akashungurudzika mumwoyo make akati, “Chizvarwa ichi chinotsvakireiko chiratidzo? Zvirokwazvo ndinoti kwamuri, ‘Hakuna chiratidzo chichapiwa kuchizvarwa ichi.’ ”

¹³ Akabva avasiya, ndokukwirazve mugwa oyambukira mhiri.

Mbiriso yavaFarisei neyaHerodhi

¹⁴ Zvino vakanga vakanganwa kutakura chingwa, kunze kwechimwechete chavakanga vanacho mugwa.

¹⁵ Jesu akavayambira achiti, “Chenjerai mungwarire mbiriso yavaFarisei neyaHerodhi.”

¹⁶ Vakakurukurirana pachavo vachiti, “Hatina chingwa.”

¹⁷ Jesu akazviziva akavati, “Nemhaka yei muchitaurirana kuti hamuna chingwa? Hamusati maziva kana kunzwisisa here, mwoyo yenyu mikukutu kanhi?

¹⁸ Mune meso, asi hamuoni nhai? Mune nzeve asi hamunzwe nhai? Hamuyeuke here

¹⁹ zviya zvandakamedurira zviuru zvishanu zvavanhu, zvingwa zvishanu; makaunganidza matengu mangani azere ezvimedu?” Vakati kwaari, “Gumi namaviri.”

²⁰ “Ko paya pandakamedurira zviuru zvina zvavanhu zvingwa zvinomwe, makaunganidza nhengwana dzizere ngani dzezvimedu?” Vakati kwaari, “Nomwe.”

²¹ Iye ndokuti kwavari, “Hamusati mavakunzwisisa nanhasi here?”

Jesu anosvinudza bofu kuBhetisaidha

²² Vakazosvika kuBhetisaidha, vamwe vanhu vakauya kwaari nomunhu akanga ari bofu. Vakakumbira Jesu kuti amubate.

²³ Akamubata ruoko oenda naye kunze kwomusha. Akapfira mate pamaziso ake, akaisa maoko ake paari ndokumubvunza kuti, “Pane chaunoona here?”

²⁴ Akatarisa akati, “Ndiri kuona vanhu asi vanotarisika semiti iri kufamba.”

²⁵ Akaisazve maoko ake pamaziso pake, iye ndokuramba akangoti ndee kutarisisa, ndokubva aporeswa. Akabva avakuona zvakanaka zvinhu zvose.

²⁶ Jesu akamuendesa kumba kwake achiti, “Usamboenda zvako nomumusha umu.”

Pita anodudza kuti Jesu ndiye Mesia

²⁷ Jesu akaenda navadzidzi vake kumisha yokuSezariafiripi. Vachiri munzira, akabvunza vadzidzi vake achiti, “Vanhu vanoti ndini ani?”

²⁸ Vakamupindura vachiti, “Johani Muombeki, vamwewo vanoti, ndiEriya, vamwewo vachiti, mumwe wavaporofita.”

²⁹ Akazovabvunza achiti, “Ko imi, munoti ndini ani?” Pita akapindura achiti, “Imi ndimi Kristu chaiye.”

³⁰ Jesu akatsindidza kuti vasambozviudza ani naani zvake nezvake.

Jesu anofanoudza vadzidzi vake zvokufa nokumuka kwake

³¹ Akazotangisa kuvadzidzisa kuti Mwanakomana womunhu anofanira kutambudzika zvikuru, agorambwa navakuru vakuru, navapristi vakuru, nenyanzvi dzoMutemo, ozouraiwa; asi agomukazve mushure memazuva matatu.

³² Akataura izvi pachena. Ipapo Pita akamutora parutivi ndokutanga kumutsiudza.

³³ Jesu akatendeuka akaona vadzidzi vake ndokubva atsiudza Pita achiti, “Ndibvirepo, Satani womunhu! Mafungiro akadai haasi aMwari asi avanhu.”

³⁴ Akazodaidza chita chavanhu pamwechete navadzidzi vake akati kwavari, “Kana munhu achida kunditevera, ngaazvirambe, atakure muchinjikwa wake anditevere.

³⁵ Nokuti ani naani anoda kuchengetedza upenyu hwake acharasikirwa nahwo; asi ani naani anorasikirwa noupenyu hwake pamusana pangu napamusana peShoko Rakanaka achahuponesa.

³⁶ Nokuti zvinobatsirei munhu kuwana zvinhu zvose zvapasi pose asi iye achirasikirwa noupenyu hwake?

³⁷ Nokuti chiiko munhu chaangabvise kuti adzikinure upenyu hwake?

³⁸ Ani naani anondinyara kana kunyara mazwi angu pakati pechizvarwa ichi chenzenza dzavanhu nechavatadzi, Mwanakomana womunhu achamunyarawo musi waanouya aine mbiri yaBaba vake pamwe navatumwa vatsvene.”