Joshua 12 - Bhaibhiri Idzva rechiShona rine Dhuterokanonika

I: KUDZOKORORA NHOROONDO MUCHIDIMBU Madzimambo akakurirwa naMosesi kumabvazuva kweJorodhani

¹ Aya ndiwo madzimambo enyika iyi akakurirwa navaIsiraeri vakavatorera nyika yawo vakaiita yavo kumhiri kwaJorodhani nechokumabvazuva, kutangira kubani raArinoni kusvikira kugomo reHerimoni nekwose kuArabha nechokumabvazuva:

² Kunoti Sihoni mambo wavaAmori aigara kuHeshibhoni, aitonga kubvira kuAroero pamucheto webani raArinoni achibvira pakati pebani iroro kusvikira kurwizi rwaJabhoku, muganhu wavaAmoni runovaganhuranisa nechidimbu chenyika yeGireadhi.

³ Yaibvirawo kuArabha kusvikira kugungwa reKinereti kumabvazuva takananga kuBhetijeshimoti kugungwa reArabha, gungwa roMunyu, yonanga kuBhetijeshimoti kumaodzanyemba kusvikira mujinga megomo rePisiga.

⁴ Kwouyawo Ogu mambo weBhashani aiva mumwe wehofori dzechiRefaimu akanga asara, aigara kuAshitaroti nokuEdhirei.

⁵ Aitongawo kubvira kugomo reHerimoni zvichienda nokuSareka nenyika yose yeBhashani achindoganhurana navaGeshuri navaMaaka, achitongawo chimwe chidimbu chenyika yeGireadhi achindoganhurana naSihoni mambo weHeshibhoni.

⁶ Mosesi muranda waTenzi navaIsiraeri, vakakurira madzimambo iwayo, iye Mosesi muranda waTenzi ndokupa nyika yavo kuti ive yevedzinza rokwaRubheni nerokwaGhadhi nechikamu chapakati napakati chedzinza raManase.

Madzimambo akakurirwa naJoshuwa

⁷ Aya ndiwo madzimambo enyika iyoyo akazokurirwa naJoshuwa navaIsiraeri kumadokero kumhiri kwaJorodhani, kubvira kuBhaarigadhi mubani reRebhanoni kusvikira kugomo reHaraku rinokwira rakananga kuSeiri. (Joshuwa akapa nyika yemadzimambo iwayo kumadzinza avaIsiraeri somugove wavo wenhaka.

⁸ Akavapa nyika dzinoti nyika yemakomo nenyika yokumanhika, nenyika yeArabha nenyika yemateru, nenyika yerenje nenyika yeNegevhu, nenyika yavaHiti neyavaAmori neyavaKanani neyavaPerizi neyavaHivhi neyavaJebhusi).

⁹ Madzimambo akakurirwa acho ndeaya: kunoti mambo wokuJeriko nowokuAi, guta riri pedyo nereBhetieri,

¹⁰ nowokuJerusarema; kwouya mambo wokuHebhuroni

¹¹ nowokuJarimuti, nowokuRakishi,

¹² nowokuEgironi nowokuGezeru;

¹³ kwoti mambo wokuDhebhiri nowokuGedheru,

¹⁴ nowokuHoruma nowokuAradhi;

¹⁵ kwozoti mambo wokuRibhuna nowokuAdhuramu,

¹⁶ nowokuMakedha nowokuBheteri; kuchitiwo,

¹⁷ wokuTapua mambo wokuHeferi,

¹⁸ nowokuAfeki nowokuReshironi,

¹⁹ nowokuMadhoni nowokuHazori,

²⁰ kuchizoti mambo wokuShimuronimeroni nowokuAkishafu,

²¹ nowokuTanaki nowokuMegidho;

²² ndokuuyawo wokuKedheshi, mambo womuJokineamu kuKarimeri

²³ nowokuDhori riri kuNafatidhori nowomuGoiimu kuGirigari;

²⁴ ndokuzoti mambo wokuTiriza. Vose pamwechete vaiva madzimambo makumi matatu ane mumwechete.