Joshua 11 - Bhaibhiri Idzva rechiShona rine Dhuterokanonika

H: KUKURIRWA KWAMADZIMAMBO UKUCHAMHEMBE Joshuwa anokunda mambo Jabhini

¹ Jabhini mambo weguta reHazori paakanzwawo izvi, akatumira shoko kuna Jobhabhu mambo weguta reMadhoni nokuna mambo weguta reShimuroni nokuna mambo weguta reAkishafu.

² Akatumirawo shoko kumadzimambo okuchamhembe kunyika yemakomo, nokuArabha kumaodzanyemba kwegungwa reKineroti, nokunyika yakumanhika nokuNafotidhori kumadokero,

³ nokuvaKanani vokumabvazuva novokumadokero, nokuvaAmori navaHiti navaPerizi navaJebhusi vomunyika yamakomo, nokuvaHivhi vari mujinga regomo reHerimoni kudunhu reMizipa.

⁴ Vakauya nehondo dzavo dzose vari gurusvusvu kuwanda sejecha regungwa, vaine bvakapfaka ramabhiza nengoro.

⁵ Madzimambo iwaya akaunganidza pamwechete hondo dzavo dzose akadzika matendhe avo kubani remvura rokuMeromu kundorwisana navaIsiraeri.

⁶ Tenzi akati kuna Joshuwa, “Usavatye nokuti mangwana panguva idzo dzino idzi ndinenge ndatovaisa mumaoko avaIsiraeri, vanenge vatofa. Munofanira kutema mabhiza avo matatira, muroromese nomoto ngoro dzavo dzehondo.”

⁷ Naizvozvo Joshuwa akavavinga nehondo yake ivo vari mubani remvura rokuMeromu akaita zvokungoerekana avafuta.

⁸ Tenzi akavaisa mumaoko avaIsiraeri. VaIsiraeri vakavauraya vakadzingirirana navo kudzamara vatopinda muguta reSidhoni nomuguta reMisirefotimaimu nokusvikira kubani reMizipa kumabvazuva. Vakavauraya zvokuti hapana kusara kana munhu mumwechete zvake.

⁹ Joshuwa akaita kwavari zvaakanga audzwa naTenzi. Akatema mabhiza avo matatira, akaroromesa nomoto ngoro dzavo dzehondo.

¹⁰ Joshuwa akadzoka ikoko panguva iyoyo, akakurira guta reHazori akauraya nebakatwa mambo waro nokuti guta reHazori iri ndoraiva guta guru raitungamirira nyika dzamadzimambo ose iwayo.

¹¹ Akauraya namapakatwa vanhu vose vaiva muguta imomo zvokuuraya zviya munhu wose. Hapana kana chinofema chaakasiya. Akapisa nomoto guta irori reHazori.

¹² Joshuwa akakurira maguta ose iwayo namadzimambo awo akava mumaoko ake, akaaparadza namapakatwa zvokusambosiya kana chinhu, sezvaakanga anzi aite naMosesi muranda waTenzi.

¹³ Asi vaIsiraeri havana kupisa maguta akanga akavakirwa pakatunhumara, kusiya guta reHazori rakapiswa naJoshuwa.

¹⁴ VaIsiraeri vakatora zvipfuwo nezvinhu zvose zvaiva mumaguta iwayo, zvavakanga vapamba. Asi wose ainzi munhu vakauraya namapakatwa vakavaparadza kusiya pasisina kana mupenyu.

¹⁵ Tenzi sokuudza kwaakanga aita Mosesi muranda wake, Mosesi akataurirawo Joshuwa, Joshuwa ndokuitawo saizvozvo. Haana kana chaakasiyidzira pane zvose zvakaudzwa Mosesi naTenzi.

Nyika dzakapambwa naJoshuwa

¹⁶ Saka Joshuwa akatora nyika yacho yose iyoyo. Akatora nyika yamakomo neNegevhu yose nenyika yose zvayo yeGosheni nenyika yokumanhika nenyika yeArabha nenyika yeIsiraeri yemakomo, namapani ayo

¹⁷ kubvira kugomo reHaraka rinokwira nokuSeiri kusvikira kuBhaarigadhi kubani reRebhanoni mujinga megomo reHerimoni. Akabata madzimambo adzo ose, akavaponda kuuraya

¹⁸ Joshuwa akarwa namadzimambo iwayo kwenguva ndefu.

¹⁹ Hakuna kana rimwe guta zvaro rakawirirana navaIsiraeri kusiya vaHivhi voga, vanhu vokuGibheoni. VaIsiraeri vakatora maguta ose iwayo nehondo akava avo.

²⁰ Chaivadariso ndechokuti Tenzi ndiye aivakonzera kuomesa musoro kuti vaende kundorwisa vaIsiraeri achiitira kuti vanhu ivavo vabve vanyatsoparadzwa uye kuti varege kunzwirwa tsitsi, asi kutoti vatsakatiswe sokuudzwa kwakaitwa Mosesi naTenzi.

²¹ Panguva iyoyo Joshuwa akandoparadza vaAnakimu vomunyika yamakomo vaiti vokuHebhuroni novukuDhebhiri novokuAnabhu novokunyika yaJudha yamakomo, novokunyika yeIsiraeri yamakomo. Joshuwa akavaparadza pamwechete namaguta avo.

²² Hakuna kusara kana muAnakimu munyika yavaIsiraeri, kunze kwevaiva kuGaza nokuGati nokuAshidhodhi chete.

²³ Ndokutora kwakaita Joshuwa nyika yose sokutaura kwakanga kwaita Tenzi kuna Mosesi. Joshuwa akaipa kuvaIsiraeri senhaka yavo maererano namadzinza avo. Nyika ndokubva yazorora hondo.