Isaya 4 - Bhaibhiri Idzva rechiShona rine Dhuterokanonika

¹ Zuva iroro kana rasvika, vakadzi vanomwe vacharwidzana pamurume mumwechete vachiti, “Chokudya ndechedu, mbatya tichazvitsvakira, chatinongoda isu ndechekunzi tiri vakadzi vako chete, utinyadzurudzewo.”

Kumutsiridzwa kuchaitwa Jerusaremu

² Musi iwoyo bukira raTenzi richayevedza zvine mukurumbira uye muchero wenyika iyoyi uchava chinhu chokuti vanhu veIsiraeri vanopunyuka utapwa vadade nacho chichivapa mbiri.

³ Munhu anenge azosara muZioni achiramba ari muJerusaremu achanzi anoera, wose zvake anenge akanyorwa zita kunzi mugari weJerusaremu.

⁴ Ipapo Tenzi anenge achenura kun'ora kwevanasikana veZioni asuka mhosva yeropa iri mukati meguta reJerusaremu inobviswa nomweya wake wokutonga, nemweya wake wokuroromesa

⁵ Tenzi achazviratidza pamusoro peGomo rose reZioni napamusoro pemagungano aro, ari mugore, masikati, usiku, ari muutsi nomurimi romoto rinon'aima kupenya kwokuvapo kwaMwari kugoti gude gude pose ipapo sekatenga uye sedumba.

⁶ Uchange uri mumvuri masikati wokudzivirira kupisa nediziro nepokuhwanda mvura yokunaya ine dutu remhepo nemheni.