Isaya 25 - Bhaibhiri Idzva rechiShona rine Dhuterokanonika

Rwiyo rwokurumbidza

¹ Imi Tenzi, ndimi Mwari wangu, ndinokukudzai ndichirumbidza zita renyu, nokuti makaita zvinhu zvinoshamisa zvamakaronga kare kare zvino kutendeseka kwechokwadi;

² nokuti makaita kuti guta rive murwi guta retsvingo rive dongo muzinda wavanozvikudza hauchisiri guta hauchazombovakwa.

³ Naizvozvo vanhu vane simba vachakurumbidzai, maguta avanhu voutsinye achakutyai

⁴ nokuti ndimi diziro ravarombo, botero ravanhu vasina chavanacho, dumba rokuhwanda dutu nomumvuri wokuhwanda zuva nokuti kufemuruka kwemunhu ane utsinye kunenge dutu riri kurovera kurusvingo

⁵ sokupisa kwenzvimbo yakaoma. Munonyaradza ruzha rwemabvakure sokutonhodza kunoita gute kupisa saizvozvo ndokunyaradzwa kunoitwa nziyo dzemunhu ane utsinye.

Mwari anogadzirira vanhu vose mabiko paGomo reZioni

⁶ Pagomo irori, Tenzi wehondo nehondo achaitira ndudzi dzose dzavanhu mabiko ezvakakora, mabiko ewaini isina kana kasese, mabiko ezvakakora zvizere mwongo ewaini yamasese akanyatsosvinwa.

⁷ Achaparadza pagomo irori chakaputira marudzi ose, dandadzi rakaputira ndudzi dzose dzavanhu.

⁸ Achatsakatisa rufu nokusingaperi, uye Tenzi, Tenzi achapukuta vose musodzi pamatama, uyewo achabvisa kuzvidzwa kwavanhu vake pasi pose, nokuti Tenzi ndiye azvireva.

⁹ Pazuva iroro vanhu vachati, “Hauwoneka, uyu ndiye Mwari wedu watanga takamirira kuti atinunure. Uyu ndiTenzi, ndiye watanga takamirira, ngatichifarai tichipemberera kutiponesa kwake.”

Kuranga kuchaita Mwari nyika yeMoabhu

¹⁰ Simba roruoko rwaMwari richava pagomo irori, asi Moabhu achatsokodzerwa munzvimbo make sokutsokodzerwa kunoitwa mashanga mudanga.

¹¹ Achatambanudza maoko ake ari mukati maro sokutambanudza kunoita munhu anenge oda kushambira, asi Tenzi achaninipisa kuzvikudza kwake ikoku pamwechete noumhizha hwamaoko ake.

¹² Nhare ndefu dzokuzvidzivirira muhondo dzamasvingo ake achadzikoromora achidziparadza achidzirigira pasi pavhu chaipo.