Ezekieri 35 - Bhaibhiri Idzva rechiShona rine Dhuterokanonika

Chirango chaTenzi kuEdhomu

¹ Izwi raTenzi rakauya kwandiri richiti,

² “Iwe mwanakomana womunhu, zvino chinangana neGomo reSeiri uriporofite uchiti kwariri:

³ Zvanzi naTenzi Mwari chiona, ini ndanangana newe iwe Gomo reSeiri. Ndichakusumudzira shamhu ndichikuita kuti uve renje zvaro risina chinhu.

⁴ Ndichaita kuti maguta ako asare ava matongo uve renje zvaro ugozoziva kuti ndini Tenzi.

⁵ Iwe zvawakava nedaka risingaperi mumwoyo ukaurayisa vanhu veIsiraeri nehondo yebakatwa panguva yokutambudzika kwavo, panguva yokurangwa kwavo kwokupedzisira.

⁶ Naizvozvo zvanzi naTenzi Mwari chenyu chavapo iropa, hezvino ndakadai, ropa richakupfukirai nokuti imi mune mhosva yokudeura ropa, nezvo ropa richakupfukirai.

⁷ Ndichaita kuti kugomo reSeiri kuve renje risina chinhu, ndichadzivisa vose vachapfuura nemo.

⁸ Mumakomo ayo ndichamuzadza nezvitunha zvayo uye muzvikomo zvako nomumapani ako uye mumakoronga ako vakauraiwa nehondo yebakatwa vachati imomo ririri.

⁹ Ndichakuita renje rinogara rakadaro, magutawo ako haachazogarwa navanhu. Ndipo pamuchaziva kuti ndini Tenzi.

¹⁰ “Pamusana pokuti unotika iwe, marudzi avanhu maviri aya nenyika mbiri idzi zvichava zvangu uye tichazviita kuti zvive zvedu, kunyange zvazvo Tenzi aivamo,

¹¹ naizvozvo zvanzi naTenzi Mwari, hezvino ndakadai, ndichaita kwauri zvinoenderanawo nehasha neshanje zvawakaratidzawo kwavari uye ndichazvizivisa kwamuri pandinenge ndava kukutongai pamusana poruvengo rwamunarwo kwavari.

¹² Ndipo pauchaziva kuti ini Tenzi ndakanzwa zvose zvokushora kwawakaita makomo eIsiraeri uchiti aitwa renje zvaro, aiswa mumaoko medu kuti tiaparadze.

¹³ Iwewe wakatozvitutumadzawo kwandiri nomuromo wako ukaita pamuromo kwazvo kwandiri. Ndakazvinzwa.

¹⁴ Zvanzi naTenzi Mwari, kuitira kuti pasi pano pose papembere kufara ndichakuita renje.

¹⁵ Sokufarira kuitwa renje kwakaita nhaka yemba yeIsiraeri, ndozvandichaitawo kwauri uchava renje iwe Gomo reSeiri neEdhomu yose, yose zvayo. Ndipo pavachaziva kuti ndini Tenzi.”