1 Timoti 2 - Bhaibhiri Idzva rechiShona rine Dhuterokanonika

¹ Nokudaro pokutanga ndinokurudzira kuti mikumbiro neminamato nezvichemo nokutenda zviitirwe vanhu vose vanoti:

² madzimambo navose vari pazvinzvimbo zvapamusoro kuti tigare upenyu hune runyararo norugare, upenyu huna Mwari mukati uye hunoremekedzwa mativi ose.

³ Izvi zvakanaka uye zvinogamuchirika pamberi paMwari noMununuri wedu

⁴ anoda kuti munhu wose aponeswe uye kuti azive chokwadi.

⁵ Nokuti kuna Mwari mumwechete uye kuno munhu mumwechete anobatanidza isu vanhu naMwari, munhu iyeyo ndiJesu Kristu.

⁶ Akazvipira kuti ave chokutinunura nacho tose. Izvi zvakazopupurirwawo panguva yazvo.

⁷ Izvozvi ndizvo zvandakasarudzirwa kuti ndive muparidzi nomupositori nomudzidzisi wevechirudzi muchitendero nomuchokwadi. Ndiri kutaura chokwadi handisi kureva nhema.

⁸ Munzvimbo dzose ndinoda kuti varume vanamate vakasimudza maoko matsvene vasina hasha kana gakava

⁹ uye kuti vakadzi vazvishongedze zvine mwero zvino hunhu vaine hanzu dzine chimiro vasingagadziri vhudzi ravo zvokunanisira kana kurishongedza nendarama kana namatombo anokosha amapera kana hanzu dzinodhura

¹⁰ asi zvishongo zvavo ngazvive mabasa akanaka sezvinokodzerana navakadzi vanotya Mwari.

¹¹ Mukadzi ngaadzidze chinyararire nokuzvidukupisa kose.

¹² Handibvumiri mukadzi kudzidzisa kana kuva nesimba pamusoro pomurume; anofanira kunyarara

¹³ nokuti Adhamu ndiye akatanga kusikwa ndokuzouya Evha.

¹⁴ Adhamu haasiriye akafurirwa asi mukadzi ndiye akafurirwa akava mutadzi.

¹⁵ Mukadzi anonunurwa zvake nokubereka vana kana akaramba ari muchetendero uye aine rudo noururami.