Ruka 21 - Bhaibhiri Idzva rechiShona

Kamari kechirikadzi

¹ Akasimudza musoro akaona vapfumi vachiisa zvipo zvavo munzvimbo yaichengeterwa upfumi.

² Akaonawo chirikadzi yaiva murombo ichiisa tumari tuviri twekopa.

³ Jesu akati, “Zvirokwazvo ndinoti kwamuri chirikadzi iyi murombo yaisa zvinopfuura vose nokuti ivo vaisa zvabva mune zvakawanda zvavainazvo.

⁴ Asi iyo nourombo hwayo, yaisa zvose zvainorarama nazvo.”

Kuparadzwa kuchaitwa Temberi

⁵ Vamwe pavaitaura nezveTemberi kuti yakashongedzwa zvakadii namatombo akakosha nezvipo, Jesu akati,

⁶ “Zvamuri kuona izvi, mazuva ari kuuya hapazosara dombo riri pamusoro perimwe, risingazokoromotserwa pasi.”

Nhamo nokutambudzwa

⁷ Vakamubvunza kuti, “Nhai mudzidzisi izvi zvichaitika rinhi uye kuti chiratidzo chokuti zvava kuda kuitika chichava chipi?”

⁸ Iye akati, “Chenjerai kuti murege kurasikiswa nokuti kuna vazhinji vachauya muzita rangu vachiti, ‘Ini ndini iye.’ Uye vachati, ‘Nguva yasvika.’ Imi musavatevere.

⁹ Kana monzwa zvehondo namanyongori, musatye nokuti izvi zvinofanira kutanga zvaitika asi kuguma hakubva kwangova pakare pakarepo.”

¹⁰ Akazoti kwavari, “Rudzi ruchamukirana norumwe rudzi noumambo huchamukirana nohumwe umambo.

¹¹ Kuchava nokundengendeka kwapasi kukuru, munzvimbo dzakasiya–siyana muchava nedzinzara nezvirwere, kuchava nezvinotyisa nezviratidzo zvikuru zvichibva kudenga.

¹² Asi izvi zvose zvisati zvaitika vachakusungai vachikutambudzai vachakuturirai kumasinagogu nokukuisai mumajeri. Muchaunzwa pamberi pamadzimambo namagavhuna nokuda kwezita rangu.

¹³ Iyi inenge iri nguva yokupa kwenyu umbowo.

¹⁴ Nokudaro nyatsozvibatisisai mumwoyo menyu kuti musafunge kuti tichapindura sei.

¹⁵ Ndichakupai unyanzvi hokutaura noungwaru zvokuti hapana kana mhandu yenyu ichazokwanisana nemi kana kupokana nemi.

¹⁶ Muchakwidzwa matare kunyange navabereki venyu kana navakoma navanun'una nehama neshamwari. Vachauraya vamwe venyu.

¹⁷ Muchavengwa navose pamusana pezita rangu.

¹⁸ Asi hapana kana ruvhudzi rwomusoro wenyu ruchatsakatika.

¹⁹ Kutsungirira kwenyu kuchakuwanirai upenyu hwenyu.

Kuparadzwa kweJerusaremu

²⁰ “Kana moona Jerusaremu yakomberedzwa nehondo. Ibvai maziva kuti kuparadzwa kwayo kwava pedyo. Vanenge vari muJudhea ngavatizire kumakomo. Vanenge vari muguta ngavabvemo.

²¹ Vanenge vari kunze kumaruwa ngavarege kupinda mariri

²² nokuti iwaya anenge ari mazuva okutsividza kuzadzisa zvose zvakanyorwa.

²³ Hameno zvavo vanenge vakazvitakura navavo vanenge vachiyamwisa pamazuva iwayo nokuti pachava nenhamo huru panyika nokurangwa kwavanhu ava.

²⁴ Vachaparadzwa nehondo yebakatwa vachitapwa mukati memarudzi ose. Jerusaremu ichatsokodzerwa nevechirudzi; kusvikira nguva yevechirudzi yazadziswa.

Kuuya kwoMwanakomana womunhu

²⁵ “Kuchava nezviratidzo kuzuva nokumwedzi nokunyenyedzi. Panyika pachava nokutambura kwamarudzi; vachashaiswa mazano nokutinhira kwegungwa namasaisai.

²⁶ Vanhu zvichavapedza simba nokutya nokufunga zvichavawira panyika nokuti masimba omudenga achazungunutswa.

²⁷ Ndipo pavachaona Mwanakomana womunhu achiuya ari mumakore aine simba nembiri huru.

²⁸ Zvino kana izvozvo zvoitika, tarirai kudenga musimudze musoro nokuti kununurwa kwenyu kunenge kwava pedyo.”

Muenzaniso womuonde

²⁹ Akavataurira mumwe muenzaniso achiti, “Tarisai muonde nemiti yose

³⁰ kana yopfumvudza munobva mangozvionera uye munobva maziva kuti zhizha ravakusvika.

³¹ Naizvozvo kana moona zvinhu izvi zvavakuitika, munobva maziva kuti umambo hwaMwari hwava pedyo.

³² Zviro kwazvo ndinoti kwamuri chizvarwa ichi hachimbopfuura kusvika zvose izvi zvaitika.

³³ Denga napasi zvichapera asi mashoko angu haaperi.

Kurindira

³⁴ “Zvingwarirei kuti musaodzwe mwoyo noupenyu husina paho nokuraradza nokuzvidya mwoyo nezvinhu zvoupenyu huno, zuva iroro richizoyerekana rakusvikirai

³⁵ seriva nokuti richasvikira munhu wose anogara pamusoro payo nyika yose.

³⁶ Ngwarirai nguva dzose muchinamata kuti muwane simba rokupunyuka zvose izvi zvichaitika uye kuti mukwanise kuzomira pamberi peMwanakomana womunhu.”

³⁷ Mazuva ose, Jesu aidzidzisa muTemberi asi usiku aienda wondorara kugomo rinonzi Orivheti.

³⁸ Mangwanani vanhu vose vaizouya kwaari muTemberi kuti vamunzwe.