Ruka 17 - Bhaibhiri Idzva rechiShona

Chitadzo

¹ Jesu akati kuvadzidzi vake, “Zvinokonzera vamwe kuita zvakaipa hazvimborega kuvapo. Asi zvichamuwana iye anozviunza.

² Zvaitova nani kuti asungirirwe guyo mumutsipa make achindokandwa munyanza panze pokuti akonzere mumwe wavaduku ava kuti atadzire Mwari.

³ Zvichenjererei imi pachenyu; kana hama yako ikakutadzira, itsiure. Kana ikapfidza iregerere.

⁴ Uye kana akakutadzira kanomwe pazuva akauya kwauri kanomwe achiti ndapfidza. Unofanira kumuregerera.”

Simba rechitendero

⁵ Vapositori vakati kuna Tenzi, “Tiwedzereiwo chitendero chedu.”

⁶ Tenzi akati, “Dai muine chitendero chakaita setsanga yemasitadhi, maigona kuti kumuonde uyu dzipuka undosimwa mugungwa uchikuteererai.

Muranda waJesu anozvirereka sei kuna Mwari

⁷ “Pane mumwe wenyu here ano muranda anenge achirima kana kufudza hwai, angati kwaari kana abva kumunda, ‘Chibva wauya ugare pakudya?’

⁸ Haasi anototi here, ‘Ndigadzirire chokudya chamanheru upfeke undiperekere, kusvikira ndadya ndikanwa, iwe wozodyawo nokunwa mushure macho?’

⁹ Anotenda muranda here nokuti aita zvaaudzwa?

¹⁰ Nemiwo, kana maita zvamunenge maudzwa itii, ‘Tiri varanda vasingakodzeri. Tangoita zvatinofanira kuita.’ ”

Jesu anoporesa gumi ravaiva namaperembudzi

¹¹ Ari parwendo rwokuenda kuJerusaremu akapfuura napakati peSamaria neGarirea.

¹² Paakapinda mune mumwe musha, akasangana navanhu gumi vaiva namaperembudzi vakamira nechekure

¹³ vakadaidzira vachiti, “Jesu, Tenzi tinzwireiwo tsitsi.”

¹⁴ Paakavaona akati kwavari, “Endai mundozviratidza kuvapristi.” Pavaienda vakabva vaporeswa.

¹⁵ Zvino mumwechete wavo paakaona kuti arapwa, akadzoka achirumbidza Mwari nezwi riri pamusoro.

¹⁶ Akazviwisira pasi nouso patsoka dzaJesu achimutenda. Zvino murume uyu aiva muSamaria.

¹⁷ Jesu akati, “Ko vanatswa havasi gumi here? Ko vamwe vapfumbamwe varipi?

¹⁸ Hapana kuwanikwa adzoka kuzorumbidza Mwari kusiya mutorwa uyu oga.”

¹⁹ Akati kwaari, “Chisimuka uenda zvako. Chitendero chako chakuponesa.”

Kuuya kwoumambo hwaMwari

²⁰ Jesu paakabvunzwa navaFarisei kuti umambo hwaMwari huchasvika rini, akavapindura achiti, “Umambo hwaMwari hausi kuuya nezviratidzo zvinoonekwa.

²¹ Hakuna munhu achati, ‘Hohuno huri pano kana kuti huri apo, nokuti izvozvi umambo hwaMwari huri pakati penyu.’ ”

²² Akazoti kuna vadzidzi vake, “Mazuva ari kuuya pamuchasuwira kuona rimwe ramazuva oMwanakomana womunhu asi hamumboriona.

²³ Vamwe vachati kwamuri, ‘Ari kokoko kana kuti ari pano apa.’ Musaendeko kana kuvatevera.

²⁴ Nokuti sokuvaima kunoita mheni ichivhenekera denga kubvira kunorumwe rutivi kusvika kunorumwe, ndizvozvowo zvichaita Mwanakomana womunhu pamazuva ake.

²⁵ Asi anofanira kutanga atambudzika zvakanyanya agorambwa nechizvarwa ichi.

²⁶ Sezvazvakanga zvakaita pamazuva aNowa, ndizvozvowo zvazvichaita pamazuva oMwanakomana womunhu.

²⁷ Vanhu vaidya nokumwa vachiroora nokuroorwa kusvikira pazuva rakapinda Nowa mungarava. Mafashamo akauya akavaparadza vose.

²⁸ Naizvozvowo zvakaitika pamazuva aRoti; vanhu vaidya vachinwa vachitenga nokutengesa vachidyara nokuvaka.

²⁹ Asi pazuva rakabuda Roti muSodhomu, moto nesarufa zvakanaya zvichibva kudenga zvikavaparadza vose.

³⁰ Ndizvozvowo zvazvichaita pazuva richaoneswa Mwanakomana womunhu.

³¹ Pazuva iroro anenge ari pamusoro pemba aine zvinhu zvake mumba, ngaarege kuburukira kuzozvitora.

³² Ndizvo zvimwechetezvo naari kumunda, ngaarege kudzokera. Yeukai mudzimai waRoti.

³³ Uyo anotsvaka kuzviponesa upenyu acharasikirwa nahwo. Asi uyo anorasikirwa noupenyu hwake anohuchengetedza.

³⁴ Ndinokuudzai kuti usiku ihoho vaviri vanenge vakarara pamubhedha mumwechete, mumwe achatorwa mumwe achisara.

³⁵ Vakadzi vaviri vanenge vari paguyo vachikuya pamwechete, mumwe achatorwa, mumwe achisiiwa.” [

³⁶ Vamwe vanenge vari mumunda, mumwe achatorwa mumwe achisiiwa.]

³⁷ Vakati kwavari, “Kuri kupiko ikoko nhai Tenzi?” Iye akati, “Pane chitunha magora ndipo panoungana.”