Jona 3 - Bhaibhiri Idzva rechiShona

Kuteerera kwaJona nokupinduka kweNinivhe

¹ Ipapo shoko raTENZI rakauyazve kuna Jona rwepiri richiti,

² “Sumuka uende kuNinivhe guta guru riya uriparidzire shoko randinokuudza.”

³ Saizvozvowo Jona akasimuka akaenda kuNinivhe sokutaura kwakanga kwaita TENZI. Zvino guta reNinivhe raiva guta rakakurisisa kwazvo rine upamhi hwaitoda rwendo rwamazuva matatu.

⁴ Jona akatanga kupinda muguta racho achifamba rwendo rwomuswere wezuva achidaidzira kuti, “Kwangosara mazuva makumi mana chete okuti Ninivhe iparadzwe.”

⁵ Vanhu veNinivhe vakatenda muna Mwari, kukadaidzirwa shoko rokuti vanhu ngavatsanye vapfeke masaga kubvira kuvakuruvakuru kusvikira kuvadikidiki.

⁶ Shoko racho iri rakazosvikawo kuna mambo weNinivhe akasimuka pachigaro chake choumambo ndokubvisa jasi rake ndokupfeka masaga ndokundogara kumadota.

⁷ Akabva adaidzira chirevo akachizivisa vanhu muNinivhe yose chokuti, “Nechirevo ichi chatemwa namambo pamwechete novokumba huru; ngaparege kuva nomunhu kana mhuka zvayo kunyange mombe kana chimwe chipfuwo zvacho chinoisa chinhu mukanwa, ngazvirege kana kunwa mvura.

⁸ Asi kutoti vanhu nemhuka ngavapfeke masaga acheme zvikuru kwazvo kuna Mwari. Munhu wose zvake ngaasiyane nenzira yake yakaipa akande pasi twaanobata-bata.

⁹ Ndianiko angazive, zvimwe Mwari angadzore mwoyo akarega kutivirukira nehasha dzake dzinotyisa kuti tirege kutsakatika.”

¹⁰ Mwari paakaona zvavakanga vaita izvi zvokukanda pasi kwavakaita maitiro avo akaipa, akazvidzora akarega kuvaonesa nhamo yaakanga ati achauyisa kwavari. Saka haana kuzozviita.