Isaya 8 - Bhaibhiri Idzva rechiShona

Mudzimai womuporofita Isaya anobereka mwanakomana

¹ Tenzi akanditi, “Tora zifendefa guru unyore pariri namavara anogona kuverengwa nomunhu wose zvake kuti, ‘Nyachimbichimbikupambamandikurumidzekutapa.’ ”

² Ndakatora vanhu vakavimbika vokundipupurira vanoti: mupristi Uriya naZekariya mwanakomana waJebherekiya kuti vazondipupurira.

³ Ini ndakazopinda mumba namai muporofita mudzimai wangu vakabva vava napamuviri ndokubereka mwana mukomana. Tenzi ndokuti, “Mutumidze zita rokuti, ‘Nyachimbichimbikupambamandikurumudzekutapa.’

⁴ Nokuti mwana iyeyo asati ava kugona kuti baba wangu kana kuti amai vangu, upfumi hweDhamasikusi nezvakapambwa neveSamaria zvichatorwa namambo weAsiria zvoendwa nazvo.”

Kufanotaurwa kwakaitwa zvokuuya kwamambo weAsiria

⁵ Tenzi akanditizve,

⁶ “Pamusana pokuti vanhu ivava ava vakaramba mvura yomuShiroa inoerera zvinyoronyoro vakahuta kudedera Rezini nomwanakomana waRemaria;

⁷ naizvozvo chinzwa, Tenzi ari kuzovaunzira Rwizi runa mafashamo emvura yakawanda ine simba. Rwizi rwacho ndimambo weAsiria nomukurumbira wake wose. Ruchazadza makoronga arwo ose rugofashukira kumahombekombe.

⁸ Ruchatsvaira munaJudha ruchafashukira ruchienda rwakatutumuka zvokusvika mumutsipa. Mwari anesu achatambanudza mapapiro ake zvokutovhamira upamhi hwenyika yenyu iyoyo.”

⁹ Chibatisisai izvi imi marudzi kuparadzwa ndokwenyu. Teererai imi nyika dziri kure gadzirirai hondo asi mukangaidzwe gadzirirai hondo asi mukangaidzwe.

¹⁰ Ranganai zvamunoda kurangana asi hazvina chimuko temai zvamunoda kutema asi zvamunotema hazvimbomira nokuti Mwari anesu.

Kuyambirwa kwakaitwa muporofita Isaya naTenzi

¹¹ Ndinodaro nokuti Tenzi akataura kwandiri, ruoko rwake rune simba ruri pandiri, akandiyambira kuti ndisafambe mugwara ravanhu ivava achiti,

¹² “Zvose zvinenge zvichinzi navanhu ivava ibangano, usazviti ibangano, zvavanotya, usazvitye kana kuva mbwende.

¹³ Asi Tenzi wehondo nehondo, iyeyo ndiye waunofanira kueresa, ndiye waunofanira kutya, ndiye waunofanira kudedera.

¹⁴ Iye achava nzvimbo inoera neibwe rinogumbura nedombo rinogumbura kudzimba dzose dzokwaIsiraeri dziri mbiri, uye riva nechokuteya nacho vagari vomuJerusaremu.

¹⁵ Vazhinji vachagumburwa naro vachiwira pasi vachiputsika; vachateyiwa vachibatwa.”

Yambiro yaMwari kuna avo vanoenda kundobvunzira kumidzimu

¹⁶ Ndinopfundira umboo uhwu ndigonamirira mutemo muvadzidzi vangu.

¹⁷ Ini ndomirira zvangu Tenzi ari kuviga uso hwake kumba yaJakobho uye maari ndimo mune chitarisiro changu.

¹⁸ Chionai kuti ini navana vandakapiwa naTenzi, tave zviratidzo nemanenji muIsiraeri zvinobva kuna Tenzi wehondo nehondo, anogara paGomo reZioni.

¹⁹ Kana vachikutii, “Endai kundobvunzira kumidzimu nen'anga dzinoshwinya nokun'urun'uta, vanhu havafanire kundobvunza kuna Mwari wavo here? Vanofanira kundobvunzira kuvakafa here vachiitira vapenyu?”

²⁰ Izvozvi izvi zvinenge zvichinangana nomutemo noumboo hwacho. Kutaura vangataure zvavo saizvozvo asi hazvina chazvinobatsira.

Nguva yamatambudziko

²¹ Ipapo vachatunhaira nenyika vachishungurudzwa kwazvo nenhamo vaine nzara. Vaine nzara kudaro, vachaviruka nehasha vakatuka mambo wavo naMwari wavo vakatarisa kudenga.

²² Vachati tarisei pasi, onei matambudziko nerima nokusuruvadzwa nenhamo uye vachakandwa muzarima rakati kwirindindi.