Isaya 3 - Bhaibhiri Idzva rechiShona

Nyonganyonga muJerusaremu

¹ Ndinodaro nokuti Tenzi Tenzi wehondo nehondo ava kubvisa muJerusaremu nemaJudha zvose zvinovararamisa nezvinovatsigira zvinoti: chokudya chose chinovararamisa, nechokunwa chose chinovararamisa,

² negamba rose zvaro nomurwi wehondo wose nomutongi wose nomuporofita wose zvake nomushoperi wose zvake nomunhu wose wechikuru

³ uye nomutungamiriri wose wechikwata chamakumi mashanu avarwi nomubati wose wechigaro uyewo gurukota rose zvaro negodobori rose roun'anga nenyanzvi yose yezvamazango.

⁴ Ndichaita kuti vakomana zvavo vave ndiwo madzishe avo vatongwe nepwere.

⁵ Vanhu vachabatisana pfumvu chaiyo, munhu woga woga achidaro kuna mumwe wake munhu wose achidaro kune waakagarisana naye wechidiki oitira vakuru misikanzwa, dzenga romunhu richidaro kune anoremekedzwa.

⁶ Kana munhu akatora mukoma kana munun'una womumba achiti, “Iwe unotova nechokupfeka zvako ndiwe ungatova mutungamiriri wedu uye murwi wamatongo uyu utongwe newe zvako.”

⁷ Pazuva iroro iye achadura pachena kuti, “Handingave ini wokukuponesai, mumba mangu hamuna chokudya kana nechokufuka Hamungandiite mutungamiriri wavanhu,”

⁸ nokuti Jerusaremu yawondomoka, Judha yakoromoka nokuti zvavanotaura nezvavanoita zvinopesana naTenzi, zvinozvidza kuvapo kwake kuno mukurumbira.

⁹ Iho uso hwavo hunopupurira kuita kwavo kwakaipa. Vanoparidzira chitadzo chavo savanhu veSodhomu, havachivanziridze. Zvichavawana zvavo nokuti nhamo yavo ndeyokuzviparira.

¹⁰ Taurirai vakarurama kuti zvichavanakira, nokuti vachadya mubayiro wezvavakaita.

¹¹ Zvichamuwana wakaipa, zvichamuipira, nokuti zvaakabata namaoko ake ndozvaachaitirwawo.

¹² Vanhu vangu, vari kuoneswa ndondo nepwere vachitongwa navakadzi vanhu vangu, vatungamiriri venyu vari kukuendesai mutome vachivhiringidza makwara enyu amunofanira kutevera.

Tenzi anogadza dare vanhu vake

¹³ Tenzi ava panzvimbo yake yapadare anosimuka kuti achitonga marudzi.

¹⁴ Tenzi ava kupinza dare vakuru vakuru pamwechete namakurukota avanhu vake, achivapa mhosva yokuti, “Ndimi makarozva munda wamagirepisi, mudzimba dzenyu mune zvinhu zvamakapamba imi kuvarombo.

¹⁵ Simba rokutsika-tsika vanhu vangu kudai munoriwana kupi, muchidzungaidza nokupazamisa varombo?” Ndizvo zviri kurehwa naTenzi, Tenzi wehondo nehondo.

Yambiro kuvanhukadzi veguta reJerusaremu

¹⁶ Tenzi ari kuti, “Pamusana pokuti vanasikana veZioni vanozvikudza vachifamba vakarebesa kwazvo mutsipa vachidingaringa kwazvo nemesomeso vachifamba vachigogodeka, mumakumbo umu, ndarira dzichingwengwereka.

¹⁷ Tenzi acharova neshamhu yezvisasa musoro wavanasikana veguta reZioni, Tenzi achavaita baravara mumusoro.”

¹⁸ Musi iwoyo Tenzi achavabvutira ndarira dzakanaka mumakumbo netsungare mumusoro nenyembe dzinenge mwedzi

¹⁹ nemhete munzeve namakoza omumaoko namadhuku

²⁰ nenguwani namakoza namabhandhi nezvinu zvamafuta okuzora anonhuwirira namazango

²¹ neringi dzomumaoko dzokudhindisa nadzo nemhete dzapamhuno

²² nehanzu dzomutambo namajasi namachari namabhegi okubatira mumaoko

²³ namachira akangwerevera nembatya dzerineni nenguwani nemimbure yokufukidza uso.

²⁴ Panze pokuva namafuta okuzora anonhuwirira, pachave nezvinoita gutukutu rokunhuwa; panze pokuva nebhandhi pachave netambo zvayo; panzvimbo pokuva nevhudzi rakanyatsorukwa, pachava nemhanza; panzvimbo pokupfeka gemenzi rinokosha pachapfekwa mbikiza dzamasaga; panzvimbo penyora dzorunako pachava nenyora dzakanyeka.

²⁵ Varume venyu vachaurayiwa nebakatwa, magamba enyu achifira kuhondo.

²⁶ Dare rokumisuo mikuru kweZioni richahwihwidza kuchema rachiti pasi pwashasha kugara somukadzi asiyiwa achiti dano asina chaakapfeka.