Isaya 20 - Bhaibhiri Idzva rechiShona

Chiratidzo kuIjipiti nokuItiopia chomuporofita asina kupfeka

¹ Mugore rakatumwa mutungamiriri mukuru wehondo naSarigoni mambo weAsiria akaenda kuAshidhodhi akarirwisa, ndokurikurira.

² Panguva iyoyo, Tenzi akanga afanotaura nokuna Isaya mwanakomana waAmozi kuti, “Enda unosunungura mutikisha wamasaga uubvise muchiuno mako, ubvise shangu dzako mumakumbo.” Akaita saizvozvo, ava kufamba ari mutwi asina shangu,

³ Tenzi akati, “Sokufamba kwakaita Isaya muranda wangu ari mutwi asina kupfeka shangu kwamakore matatu nechiratidzo kuIjipiti neItiopia

⁴ ndizvo zvichaita mambo weAsiria. Achatinha nhapwa dzevaIjipiti nevaItiopia achienda nadzo vose zvavo vakuru navadiki vari mutwi vasina shangu mumakumbo magaro ari pachena, chinhu chinonyadzisa muIjipiti.

⁵ Ipapo zvichavapazamisa misoro vachitonyarira Itiopia yavaivimba nayo neIjipiti chidadiso chavo.

⁶ “Vagari venyika yomumahombekombe megungwa muno, pazuva iroro vachati, ‘Tarisai muone zvaitika kuvanhu vaya vataivimba navo, kuvanhu vaye kwataitizira kundobatsirwa kuti tinunurwe mumaoko mamambo weAsiria! Zvino isu tingapapunyuke sei ipapa?’ ”