Isaya 15 - Bhaibhiri Idzva rechiShona

Kuparadzwa kuchaitwa Moabhu naMwari

¹ Shoko rakanangana neMoabhu. Guta reMoabhu, Ari, raparara nousiku umwechete ndokupararawo kwenyika yeMoabhu ikoko. Guta reKiti raparara nousiku umwechete ndokupararawo kwenyika yeMoabhu ikoko.

² Vanhu vokuDhibhoni vakwira kunzvimbo dzakatunhumara dzokunamata kundochema, nyika yeMoabhu inochema guta reNebho neMedhebha, Moabhu inoungudza kuchema, musoro wose wava muparavara vose vaguswa ndebvu.

³ Mumigwagwa vanopfeka masaga, vapamusoro pedzimba nomunhandare vanhu vari kubongomora vachimokoteka misodzi.

⁴ Guta reHeshibhoni neEreare ari kuridza mhere, kuchema kwavo kuri kunzwika kunyange kuJahazi. Naizvozvo varwi vokuMoabhu vari kudandaura kuchema vapindwa nokudedera.

⁵ Mwoyo wangu unochema Moabhu, vanhu vayo vanotizira kuZoari, vanosvika kwose nokuEgiratisherishiya nokuti vanokwira mukwidza wokuRuhiti iri mhere chete kuhwihwidza nokunzira yokuHoronaimu vari kuchema kuparadzwa kwavo.

⁶ Mvura yokuNimurimu yakapwa, uswa hwakaoma, bundo hapachisina, hapachisina kana chinyoro.

⁷ Naizvozvo upfumi hwavakawana, vakachengeta vavakutohutakura kuyambuka kaKova Kemushambangwena.

⁸ Mhere yavo iri kusvika kumiganhu yenyika yeMoabhu, kubongomora kwavo kuchisvika kuEgirami kuungudza kwavo kuchisvikawo kuBhierierimu.

⁹ Mvura yokuDhimoni izere ropa asi ndichatounza rimwe rakawanda muDhimoni vanenge vapotera munyika yeMoabhu nechitsama chavo chichange chasaramo ndichavasasadzira shumba.