Genesi 40 - Bhaibhiri Idzva rechiShona

Josefi anodudzira hope dzavasungwa vaFarao

¹ Kwakati kwapera nguva yakati kuti, mukuru mukuru wamambo weIjipiti wokuona nezvewaini, nomukuru mukuru wavabiki vakatadzira tenzi wavo, mambo weIjipiti.

² Farao akashatirirwa vashandi vake vaviri ava vanoti mukuru mukuru wokuona nezvewaini nomukuru mukuru wavabiki.

³ Akavasunga akavapfigira mumba yomukuru mukuru wavachengeti vokwamambo, mujeri makanga makaiswawo Josefi muya.

⁴ Mukuru mukuru wavachengetedzi iyeyo akaudza Josefi kuti avashandire. Vakagara mujeri kwenguva ndefu.

⁵ Rimwe zuva vashandi vamambo weIjipiti vaviri vaya, vaiti mukuru mukuru wokuona nezvewaini nomukuru mukuru wavabiki vachiri mujeri kudaro, vakarota hope usiku humwechete. Mumwe nomumwe wavo akarota hope dzake dzaiva nezvadzaireva.

⁶ Ava mangwanani Josefi akauya akavaona vakasuruvara.

⁷ Akabvunza vashandi vaFarao ava vaiva mujeri pamwechete naye muimba yatenzi wake achiti, “Ko nhasi uno zviso zvenyu zvakati hurududu kusuwa seiko?”

⁸ Vakamuti, “Tarota hope dzedu, asi tashaya munhu anogona kudzidudzira.” Josefi ndokuti kwavari, “Ko handiti kududzira hope ndokwaMwari here? Dondirondedzerai henyu ndinzwe.”

⁹ Ipapo mukuru mukuru wokuona nezvewaini akarondedzera Josefi hope dzake achiti, “Ndarota ndichiona mugirepisi.

¹⁰ Mugirepisi wacho wanga una mapazi matatu. Pawangoti bukirei, wabva waburitsa tumaruva. Matsumbu awo akabva aita magirepisi akaibva.

¹¹ Ndanga ndakabata mukombe waFarao muruoko rwangu. Ndatora magirepisi ndikasvinira muto wacho mumukombe ndikapa Farao.”

¹² Josefi akamuti, “Hezvinoi zvadzinoreva: Mapazi matatu anoreva mazuva matatu.

¹³ Kana mazuva matatu apera, Farao achatonga mhosva yenyu, agokudzoserai kubasa renyu. Ipapo muchagamuchidzazve mambo mukombe wake sezvamaiita kare somukuru mukuru wokuona nezvewaini.

¹⁴ Asi ndinokumbira kuti muzondiyeukawo kana zvazokufambirai zvakanaka. Mundinzwire tsitsi, mundirevererewo kuna Farao, kuti ndibudiswe muno,

¹⁵ nokuti zvechokwadi ini ndakabiwa kunyika yavaHebheru. Kunyange kuno hapana chandakatadza chingasakise kuti ndiiswe mujeri.”

¹⁶ Kuzoti mukuru mukuru wavabiki anzwa dudziro yakanaka yakanga yapiwa naJosefi akati, “Neniwo ndarota ndakatakura pamusoro tswanda nhatu dzakaturikidzana dzanga dziine chingwa.

¹⁷ Mutswanda yapamusoro manga muine mhando nemhando dzezvokudya zvaFarao, asi zvanga zvichidyiwa neshiri zviri mutswanda yanga iri pamusoro pangu.”

¹⁸ Josefi ndokupindura achiti, “Izvi ndizvo zvinoreva hope dzenyu: Tswanda nhatu dzinoreva mazuva matatu.

¹⁹ Kana mazuva matatu apera, Farao achatonga mhosva yenyu, agokusungirirai mumuti shiri dzichizodya mutumbi wenyu.”

²⁰ Kuzoti kwapera mazuva matatu, mambo Farao akaitira varanda vake mabiko okupemberera zuva rokuberekwa kwake. Akaunza padare mukuru mukuru wokuona nezvewaini pamwechete nomukuru mukuru wavabiki uya paiva namakurukota ake.

²¹ Mukuru mukuru wokuona nezvewaini akadzorerwa pabasa rake rakare rokugamuchidza mambo waini.

²² Asi mukuru mukuru wavabiki akamusungirirwa mumuti, sokududzirwa kwazvakanga zvaitwa naJosefi.

²³ Mukuru mukuru wokuona nezvewaini uya haana kuzorangarira Josefi, asi akatomukanganwa.