Genesi 36 - Bhaibhiri Idzva rechiShona

Zvizvarwa zvokwaEsau

¹ Izvi ndizvo zvizvarwa zvokwaEsau ainziwo Edhomu.

² Esau akaroora madzimai echiKanani vaiti; Adha mwana waEroni werudzi rwavaHiti naOhoribhama mwana waAna, mwanakomana waZibheoni worudzi rwavaHivhi,

³ naBhasimati hanzvadzi yaNebhayoti mwana waIshimaeri.

⁴ Adha akaberekera Esau Erifazi, Bhasimati akaberekawo Rueri.

⁵ Ohoribhama akabereka Jeushi naJaramu naKora. Ivava ndivo vanakomana vaEsau vakaberekerwa munyika yeKanani.

⁶ Esau akasiya munun'una wake Jakobho ndokubva atamira kure. Akaendako namadzimai ake navana vake vakomana navasikana navanhu vake vose. Akaendawo nemombe nezvimwe zvipfuwo zvake noupfumi hwake hwose hwaakanga awana munyika yeKanani.

⁷ Esau akatama nokuti iye naJakobho vakanga vava nezvipfuwo noupfumi hwakawanda, vasisinawo mafuro anovakwanira kuti vagare pamwechete.

⁸ Esau akandogara mumakomo mudunhu reSeiri. Esau uyu ndiye akarevo Edhomu.

⁹ Hezvinoi zvizukuru zvokwaEsau tateguru weEdhomu aigara munyika yamakomo yeEdhomu.

¹⁰ Aya ndiwo mazita avanakomana vaEsau. Adha mudzimai waEsau akabereka Erifazi. Bhasimati mukadzi waEsau akaberekawo Rueri.

¹¹ Vanakomana vaErifazi ndiTemani naOmari naZefo naGatamu naKenazi.

¹² Timuna akanga ari murongo waErifazi mwanakomana waEsau, naiyewo akaberekera Erifazi mwana mukomana ainzi Amareki. Ivava ndivo vanakomana vaAdha mukadzi waEsau.

¹³ Avawo ndivo vanakomana vaRueri kwaiti, Nahati naZera naShama naMiza. Ivava ava ndivo vanakomana vaBhasimati mukadzi waEsau.

¹⁴ Mudzimai waEsau ainzi Ohoribhama mwanasikana waAna, mwanakomana waZibheoni, akabereka Jehushi naJaramu naKora.

¹⁵ Dangwe raEsau rainzi Erifazi, rakabereka vanakomana vakazova madzishe. Madzishe acho ndiwo ano aya: Temani naOmari naZefo naKenazi,

¹⁶ naKora naGatamu naAmareki. Ndiwo madzishe okwaErifazi aigara munyika yeEdhomu akaberekwa naAdha.

¹⁷ Mwana waEsau ainzi Rueri akaberekawo vanakomana vakazova madzishe munyika yeEdhomu. Madzishe acho ndeaya: Nahati naZera naShama naMiza ivava ndivo madzishe okwaRueri aigara munyika yeEdhomu akaberekwa naBhasimati mukadzi waEsau.

¹⁸ Ohoribhama mudzimai waEsau akaberekawo vanakomana vakazova madzishe munyika yeEdhomu. Madzishe acho ndiwo anowo aya anoti: Jeushi naJaramu naKora. Ivava ndivo madzishe akaberekwa nomudzimai waEsau mwanasikana waAna.

¹⁹ Saka ivava ndivo vanakomana vaEsau kana kuti Edhomu pamwechete namadzishe avo.

Zvizvarwa zvokwaSeiri

²⁰ Ava ndivo vanakomana vaSeiri vorudzi rwechiHori vagari vomunyika iyoyo. Kwaiti Rotani naShobharu naZibheoni naAna,

²¹ kwoti Dhishoni naEzeri naDhishani. Ivava ndivo vaiva madzishe evaHori munyika yeEdhomu.

²² Vanakomana vaRotani ndevano ava Hori naHemamu. Timina ndiyo yaiva hanzvadzi yaRotani.

²³ Vanakomana vaShobharu ndivo avawo, Arivhani naManahati naEbhari naShefo naOnamu.

²⁴ Vanakomana vaZibheoni ndaava vanoti Aiya naAna. Ndiye Ana uya akawana zvitubu zvemvura inopisa musango, achifudza madhongi ababa vake Zibheoni.

²⁵ Ana akabereka mwana mukomana ainzi Dhishani akaberekawo mwanasikana ainzi Ohoribhama.

²⁶ Vanakomana vaDhishani ndiHemudhani naEshibhani naItirani naKerani.

²⁷ Vanakomana vaEzeru ndiBhirihani naZaavhani naAkani.

²⁸ Vanakomana vaDhishani ndiUzi naArani.

²⁹ Haanoi mazita amadzishe evaHori, kwaiti Rotani naShobharu naZebheoni naAna,

³⁰ kwouya Dhishani naEzeri. Ivava ndiwo madzishe echiHori vaigara munyika yeSeiri namadzinza awo.

Madzimambo eEdhomu

³¹ Haanoi madzimambo akatonga muEdhomu vaIsiraeri vasati vava namadzimambo.

³² Paiti Bhera mwanakomana waBheori akatonga muEdhomu. Zita reguta rake rainzi Dhinihabha.

³³ Kuzoti Bhera afa, Jobhabhu mwanakomana waZera wokuBhozera ndiye akasara akatonga pachinzvimbo chake.

³⁴ Jobhabhu akazofa ndokubva Hushamu wedunhu revaTemani atonga panzvimbo yake.

³⁵ Pakafa Hushamu, Hadhadhi mwanakomana waBhedhadhi akatonga pachinzvimbo chake. Ndiye Hadhadhi uya akakurira Midhiani kusango reMoabhu. Zita reguta rake rainzi Avhiti.

³⁶ Hadhadhi akazofa, Samira wokuMasareka akabva atonga pachinzvimbo chake.

³⁷ Samira akazofa, Shauro weRehobhoti naYufuratesi ndokutonga pachinzvimbo chake.

³⁸ Shauro akafa Bhaarihanani mwanakomana waAkabhori ndokutonga pachinzvimbo chake.

³⁹ Bhaarihanani, mwanakomana waAkabhori akafa, Hadhari akatonga pachinzvimbo chake. Zita reguta rake rainzi Pau. Zita romudzimai wake rainzi Mehetabheri, aberekwa naMatiredhi, mwanasikana waMezahabhi.

⁴⁰ Mazita amadzishe okwaEsau, nedzimba dzavo, namaguta avo, ndaaya anoti: Timina

⁴¹ naArivha naJeteti naOhoribhama, naEra naPinoni,

⁴² kwouya Kenazi naTemani,

⁴³ naMibhuzari, naMagidhieri naIramu. Iwaya ndiwo madzishe okwaEdhomu namatunhu avo. Esau ndiye tateguru wavaEdhomu.