2 यूहन्ना 1 - सादरी नवाँ नियम1 इ चिट्ठी मोंय यूहन्ना बटले हेके जे कलीसिया केर अगुवा हेकों। मोंय इ चिट्ठी उ खास बहिन के आउर उकर छउवा-पुतामन के लिखाथों, जेमन के परमेश्वर चुइन के राइख हे। मोंय तोहरेमन से सच्चा प्रेम करोना, सिरिफ मोंय हें निहीं मगर ओहोमन प्रेम करैना जेमन सच्चाई के जानैना। 2 हमरेमन तोहरेमन से उ सच्चाई केर चलते प्रेम करिला जे हमरे केर भीतरे रहेला आउर सोउब बेरा हमर संगे बनल रही। 3 मोंय प्रार्थना करोना कि आबा परमेश्वर आउर उकर बेटा यीशु मसीह बटले किरपा, दया आउर शांति हमर संगे बनल रहोक, जे कि हमरे सच्चाई के जानिला आउर एक दोसर से प्रेम करिला। सच्चाई आउर प्रेम 4 मोंय इ सुइन के ढेइर खुशी होलों कि तोर थोरेक छउवामन सच्चाई केर डहर में चलाथैं, जइसन कि हमरेमन के आबा परमेश्वर बटले आगया मिल हे। 5 अब हे बहिन, मोंय तोर से बिनती करोना कि हमरेमन के एक दोसर से प्रेम करेक चाही, इ कोनों नवाँ आगया ना लगे मगर ओहे आगया हेके, जेके हमरेमन ओहे बेरा से जानाथी जब हमरे मसीह केर उपरे बिसवास करली। 6 सच्चा प्रेम इ हेके कि हमरे परमेश्वर केर आगयामन केर मोताबिक चलब। इ ओहे आगया हेके, जेके तोहरेमन शुरु से सुइन हा आउर तोहरे के इकर में चलेक हों चाही। 7 मोंय इके इ लगिन कहाथों काले कि ढेइर झूठा शिक्षा देवेक वालामन दुनिया में आय हैं, जे इ नी मानैना कि यीशु मसीह आदमी बाइन के आय हे। एइसन कहेक वालामन हें बहकाएक वाला आउर मसीह केर बिरोधी हेकैं। 8 एहे लगिन तोहरेमन के सावधान रहेक चाही, ताकि उमन तोहरेमन के बहकाएक ना पारोक काले कि जेकर लगिन हमरेमन कठिन मेहनइत काइर ही उके गवाँय ना देबा, मगर तोहरेमन के उकर पूरा इनाम पावेक अहे। 9 जे केऊ मसीह केर शिक्षा से भटइक जायला आउर उकर में बनल नी रहेला उकर ठिना परमेश्वर नखे। जे केऊ मसीह केर शिक्षा केर मोताबिक चलेला उकर ठिना आबा परमेश्वर आउर उकर बेटा यीशु दुयो अहैं। 10 अगर केऊ तोहरेमन ठिना आवी आउर एहे शिक्षा नी देई तो उके ना तो घर में आवेक देबा आउर ना उके जोहार करा। 11 काले कि जे केऊ एइसन आदमी के जोहार करेला उ आदमी हों उकर बुरा काममन में साझादार होवेला। आखरी जोहार 12 मोके आउर हों ढेइर गोइठमन के तोहरेमन के लिखेक अहे, मगर मोंय उमन के कागज आउर सियाही से लिखेक नी चाहोना। काले कि मोके आसरा अहे कि मोंय तोहरेमन ठिना आमूँ आउर आमने सामने होई के गोठियामूँ, जेकर से हमरेमन केर खुशी पूरा होई जाओक। 13 तोर बहिन केर छउवामन जेमन के परमेश्वर चुइन हे तोहरेमन के जोहार कहैना। |
Sadri Bible by The Love Fellowship is licensed under Creative Commons Attribution-ShareAlike 4.0 License.
Beyond Translation