Micah 6 - ბიბლია

¹ ისმინეთ, რას ამბობს უფალი: „აღდექ, დავა გაუმართე მთებს და ისმინონ შენი ხმა ბორცვებმა!“

² ისმინეთ, ბორცვებო, უფლის დავა, და თქვენც, დედამიწის მყარო საფუძვლებო, რადგან დავა აქვს უფალს თავის ერთან და უჩივის ისრაელს.

³ ჩემო ერო, რა გაგიკეთე და რითი დაგაღონე? გამეცი პასუხი.

⁴ ხომ გამოგიყვანე ეგვიპტის ქვეყნიდან და მონობის სახლიდან გამოგისყიდე; წინ წაგიმძღვარე მოსე, აარონი და მირიამი.

⁵ ჩემო ერო, გაიხსენე, რას განიზრახავდა ბალაკი – მოაბის მეფე, და რა პასუხს აძლევდა მას ბალაამი, ძე ბეყორისა, შიტიმიდან გილგალამდე, რათა გცოდნოდა უფლის წყალობანი.

⁶ „რითი წარვდგე უფალთან და რითი ვცე თაყვანი მაღალ ღმერთს? სრულადდასაწველებით, წელგამოვლილი ზვარაკებით?

⁷ ეამება კი უფალს ათასობით ვერძი, ზეთის ურიცხვი ნაკადი? ხომ არ მივცე ჩემი პირმშო ჩემი დანაშაულისთვის, ნაყოფი ჩემი წიაღისა ჩემი საკუთარი ცოდვისათვის?“

⁸ ხომ გეუწყა შენ, მოკვდავო, რა არის სიკეთე, და რას ითხოვს შენგან უფალი? მხოლოდ სამართლის ქმნას, და წყალობის სიყვარულს; მოწიწებით სიარულს უფლის წინაშე.

⁹ უფლის ხმა მოუწოდებს ქალაქს და, ვინც ნაცადია, შეეშინდება შენი სახელის: გაუგონეთ კვერთხს და მის დამდგენელს.

¹⁰ თუ არის კიდევ უკეთურის სახლში უკეთური განძი და დამცრობილი საწყაო, დაწყევლილი?

¹¹ როგორ ვიმართლო სინდისი მრუდე სასწორითა და აბგაში წონანაკლი საწონებით?

¹² რადგან ქალაქის მდიდრები აივსნენ დატაცებულით. მისი მცხოვრებნი ტყუილებს ლაპარაკობენ, და ცრუა მათი ენა მათ პირში.

¹³ და მეც სასტიკად დაგცხებ, გაგატიალებ შენი ცოდვების გამო.

¹⁴ შეჭამ და ვერ გაძღები. ცარიელი გექნება მუცელი. გადამალავ, მაგრამ ვერ შეინარჩუნებ; და რასაც შეინარჩუნებ, მახვილს მივცემ.

¹⁵ დათესავ და ვერ მოიმკი, ზეთს გამოხდი და ვერ იცხებ, ღვინოს დაწურავ და ვერ შესვამ.

¹⁶ თქვენში მოქმედებს ყომრის ადათები და ყოველი საქმე ახაბის სახლისა, და მისდევთ მათ თათბირს; და მიგცემ გატიალებას მე და სასაცილოდ გავხდი შენს მცხოვრებთ, და თქვენ იტვირთავთ ჩემი ერის სირცხვილს.