Micah 2 - ბიბლია

¹ ვაი მათ, ვინც უკანონობას განიზრახავენ და სარეცელზე მწოლნი ბოროტებას ჩაითქვამენ, და განთიადზე აღასრულებენ მას, რადგან ძალა აქვთ ხელში!

² ხოდაბუნებს მოისურვებენ და ავიწროებენ კაცსა და მის სახლეულს, ადამიანსა და მის სამკვიდროს.

³ ამიტომ ასე ამბობს უფალი: აჰა, ბოროტს განვიზრახავ ამ მოდგმაზე, რომლის უღლისგანაც ქედს ვერ აიშვებთ და გამართულად ვერ ივლით, რადგან ავი დროება იქნება.

⁴ იმ დღეს შეთხზავენ თქვენზე იგავს, გაიმართება გლოვა და ითქმება: გაძარცულნი ვართ! ჩემი ხალხის წილი სხვამ მიიკუთვნა! როგორღა დამიბრუნდება! უცხოთესლთ დაუნაწილდა ჩვენი მინდვრები.

⁵ ამიტომ არ გეყოლება უფლის კრებულში წილისყრით მიწის გამზომელი.

⁶ ნუ ქადაგებთ, მოქადაგენო! არ უქადაგოთ მათ, ვინც ვერ გაექცევა სირცხვილს.

⁷ ნათქვამია, იაკობის სახლო: განა სულმოკლეა უფალი? ასეთია მისი საქმეები? განა სიკეთე არ მოაქვს ჩემს სიტყვებს მათთვის, ვინც წრფელად იქცევა?

⁸ ხალხი, რომელიც უწინ მე მეკუთვნოდა, მტრად მექცა, და თქვენ ხდით ტანისამოსს ბრძოლიდან დაბრუნებულთ, არხეინად მომავალთ.

⁹ ჩემი ერის ქალებს მათი სანუკვარი სახლებიდან ერეკებით. მათ ბავშვებს სამუდამოდ ართმევთ ჩემს დიდებას.

¹⁰ ადექით და წადით, რადგან არ არის ეს ქვეყანა მოსასვენებელი ადგილი; უწმიდურების გამო განადგურდება იგი და მძიმე იქნება ეს განადგურება.

¹¹ ოჰ, ერთი მოიტყუებოდეს ქარისა და სიცრუის მადევარი კაცი: „მე გიქადაგებთ ღვინოზე და თაფლუჭზე!“ სწორედ ის იქნებოდა ამ ხალხის შესაფერისი ქადაგი.

¹² მთლიანად შეგკრებ შენ, იაკობ, და თავს მოვუყრი ისრაელის ნატამალს; ერთად შევყრი, როგორც ცხვარს ბოსორში, როგორც ფარას ფარეხში; ახმაურდებიან ისინი კაცთა სიმრავლით.

¹³ მათ წინ აივლის კედლის მნგრეველი, გაანგრევენ და გაივლიან კარიბჭეში, და უკანვე გამოვლენ. ჩაივლის მათ წინ მათი მეფე და უფალი – მათ სათავეში.