Malachi 3 - ბიბლია

¹ „აჰა, მოვავლენ ჩემს ანგელოზს და განამზადებს გზას ჩემს წინაშე. უეცრად მოვა თავის ტაძარში უფალი, რომელზეც ამბობთ, რომ ეძიებთ: აგრეთვე აღთქმის ანგელოზი, რომელიც თითქოსდა გეთნევათ, აჰა, მოდის, – ამბობს ცაბაოთ უფალი. –

² მაგრამ ვინ აიტანს მისი მოსვლის დღეს და ვინ გაუძლებს მის გამოცხადებას? რადგან ის გამომდნობელის ცეცხლივით არის და მრეცხავთა ტუტესავით.

³ დაჯდება, როგორც ვერცხლის გამომდნობელი და განმწმედელი; განწმედს ლევის მოდგმას და გაასუფთავებს მათ, როგორც ოქროსა და ვერცხლს, რომ სიმართლით მიუძღვნან უფალს შესაწირავი.

⁴ მაშინ საამო იქნება უფლისათვის იუდას და იერუსალიმის შესაწირავი, როგორც ძველ დროში და გარდასულ წლებში.

⁵ და აჰა, მოვალ თქვენს განსაკითხავად და ვიქნები ფიცხელი მამხილებელი ჯადოქართა, მრუშთა და ფიცის გამტეხთა წინააღმდეგ, მოჯამაგირისათვის გასამრჯელოს დამკავებელთა, ქვრივ-ობლის მჩაგვრელთა და ხიზანთა შემვიწროებლების წინააღმდეგ, და მათ წინააღმდეგ ვინც არ მეკრძალვის, – ამბობს ცაბაოთ უფალი. –

⁶ რადგან მე, უფალი – არ ვიცვლები; და თქვენც, იაკობის ძენო, არ განადგურებულხართ.

⁷ თქვენი წინაპრების დღეებიდან მოყოლებული, გადაუხვიეთ ჩემს რჯულს და არ აღასრულებდით მას. მობრუნდით ჩემსკენ და მეც მოვბრუნდები თქვენსკენ, – ამბობს ცაბაოთ უფალი. თქვენ კი ამბობთ: როგორ მოვბრუნდეთო?

⁸ განა ადამიანი უნდა ატყუებდეს ღმერთს? თქვენ კი მაინც მატყუებთ მე და ამბობთ: ‘როგორ გატყუებთ?’ მატყუებთ მეათედსა და შესაწირავებში!

⁹ წყევლითა ხართ დაწყევლილნი, რადგან მატყუებთ მე მთელი ერი.

¹⁰ სრულად მოიტანეთ მეათედი საგანძურში რათა იყოს საკვები ჩემს სახლში. აბა, გამომცადეთ ამით, – ამბობს ცაბაოთ უფალი, – თუ არ გაგიხსნათ ცათა სარკმელები და არ გადმოგიცალოთ კურთხევა აურწყველად.

¹¹ თქვენი გულისთვის დავაკავებ მღრღნელს, რომ არ წაგიხდინოთ მიწის ნაყოფი და არ გაგიპარტახოთ ვენახში ვაზი, – ამბობს ცაბაოთ უფალი. –

¹² ნეტარად ჩაგთვლით ყოველი ხალხი, რადგან სანუკვარ ქვეყანაში იცხოვრებთ, – ამბობს ცაბაოთ უფალი.

¹³ მძლავრობენ ჩემზე თქვენი სიტყვები, – ამბობს უფალი, – თქვენ კი ამბობთ: რა გვითქვამსო შენზე?

¹⁴ ამბობთ: ‘ამაოა ღვთის მორჩილება, რას გვარგებს მისი სამსახური და მონანულად სიარული ცაბაოთ უფლის წინაშე?

¹⁵ აჰა, ვხედავთ, რომ ნეტარებენ ამპარტავნები, ხოლო ბოროტმოქმედნი არა მარტო აშენდნენ, არამედ ღმერთიც კი გამოსცადეს და გადარჩნენ.’

¹⁶ როცა უფლის მოშიშნი ლაპარაკობდნენ ერთმანეთში, ყურს უგდებდა უფალი, ისმენდა და იწერებოდა მის წინაშე სამახსოვრო წიგნი უფლის მოშიშთათვის და მისი სახელის მადიდებელთათვის.

¹⁷ ჩემი უნჯი იქნებიან ისინი, იმ დღისათვის, რომელსაც ვამზადებ – ამბობს ცაბაოთ უფალი, – და დავინდობ მათ, როგორც მამა დაინდობს თავის შვილს, რომელიც მას ემორჩილება.

¹⁸ მაშინ კვლავ დაინახავთ განსხვავებას მართალსა და უკეთურს შორის, ღვთის მორჩილსა და მის ურჩს შორის.“