Malachi 2 - ბიბლია

¹ „და ახლა, მღვდლებო, თქვენთვის არის ეს მცნება:

² თუ არ გაიგონებთ მას და გულში არ ჩაიდებთ, რათა პატივი მიაგოთ ჩემს სახელს, – ამბობს ცაბაოთ უფალი, – წყევლას მოვავლენ თქვენზე და დავწყევლი თქვენს კურთხევებს. დავწყევლე კიდეც, რადგან არ ჩაგიდვიათ გულში.

³ აჰა, წაგართმევთ მარჯვენას და სახეში მოგაყრით თქვენი შესაწირავების ნეხვს, სადღესასწაულო მსხვერპლების ნეხვს, და მასთან ერთად გამოგყრიან თქვენ.

⁴ მაშინ მიხვდებით, რომ მე მოგივლინეთ ეს მცნება ლევიანებთან ჩემი აღთქმის შესანარჩუნებლად, – ამბობს ცაბაოთ უფალი. –

⁵ ჩემი აღთქმა მათდამი იყო სიცოცხლისა და მშვიდობის აღთქმა, რომელიც მივეცი მათ, რათა შიში ჰქონოდათ ჩემი. და იყვნენ რიდით და კრძალვით ჩემდამი.

⁶ ჭეშმარიტი რჯული ედგათ პირზე და უკეთურება არ იპოვებოდა მათ ბაგეებზე. მშვიდობით და სიმართლით დადიოდნენ ჩემს წინაშე და მრავალი მოაქციეს ბოროტებისგან.

⁷ რადგან მღვდლის ბაგეები ცოდნას უნდა აღასრულებდნენ და ხალხი რჯულს მოელოდეს მისი პირიდან, რადგან ცაბაოთ უფლის მოციქულია იგი.

⁸ თქვენ კი გადაუხვიეთ გზიდან და ბევრი დააბრკოლეთ თქვენი სწავლებით და შებღალეთ ლევიანთა აღთქმა, – ამბობს ცაბაოთ უფალი. –

⁹ მეც საძულველად გაგხდით და დაგამცირებთ ხალხის თვალში, რამეთუ არ დაიცავით ჩემი გზები და მიკერძოებას იჩენდით თქვენს სწავლებაში.

¹⁰ განა ერთი მამა არა გვყავს ყველას? განა ერთმა ღმერთმა არ შეგვქმნა? მაშ, რატომღა ვღალატობთ ერთმანეთს და ვბღალავთ ჩვენი წინაპრების აღთქმას?

¹¹ ღალატიანობს იუდა და სისაძაგლე ხდება ისრაელსა და იერუსალიმში: იუდამ უცხო ღმერთის ასულის შერთვით შებღალა სიწმიდე, რომელიც უფალს უყვარდა.

¹² დაე მოჰკვეთოს უფალმა იაკობის კარვებიდან ამის ჩამდენი კაცი – თუნდაც ძღვენის მიმტანი ცაბაოთ უფლისადმი.

¹³ აჰა, კიდევ რას აკეთებთ: ცრემლითა ფარავთ უფლის სამსხვერპლოს, ტირილითა და კვნესით, რადგან აღარ მოხედა თქვენს ძღვენს და კეთილგანწყობით აღარ იღებს თქვენი ხელიდან.

¹⁴ თქვენ კი ამბობთ: ‘რისთვის?’ იმისთვის, რომ მოწამე იყო უფალი შენსა და შენი სიყრმის ცოლს შორის, რომელსაც უღალატე. ის კი შენი მეგობარი და შენი ცოლი იყო აღთქმით.

¹⁵ არავინ ჩაიდენს ამას, ვისაც კი სულის ნატამალი შერჩენია. რას ითხოვს კაცი? შთამომავლობას ღვთისგან. ამიტომაც გაუფრთხილდით თქვენს სულს და ნუ უღალატებთ სიყრმის ცოლს.

¹⁶ რადგან მძულს გაყრა, – ამბობს უფალი, ისრაელის ღმერთი, – მსგავსად საკუთარი კალთის ვინმეზე ძალადობით გადამფარველისა, – ამბობს ცაბაოთ უფალი, – ამიტომაც გაუფრთხილდით თქვენს სულს და ნუ იქნებით ღალატიანები.

¹⁷ დაღალეთ უფალი თქვენი სიტყვებით. თქვენ კი კვლავ ამბობთ: ‘რითი დავღალეთ?’ იმით, რომ ამბობთ: ‘ყოველი ბოროტმოქმედი კეთილად უჩანს უფალს და ისინი უყვარს მას;’ ანდა რომ კითხულობთ: ‘სად არის სამართლიანი ღმერთი?’“