Malachi 1 - ბიბლია

¹ წინასწარმეტყველებით ნათქვამი სიტყვა უფლისა ისრაელისადმი მალაქიას მიერ გაცხადებული:

² „მე შეგიყვარეთ თქვენ, – გეუბნებათ უფალი, – თქვენ კი ამბობთ: როგორ შეგვიყვარეო? განა ესავი და იაკობი ძმები არ იყვნენ? – ამბობს უფალი: – მაგრამ მე იაკობი უფრო შევიყვარე,

³ ესავი კი შევიძულე, და გავაუდაბურე მისი მთები და უდაბნოს ტურებს მივეცი მისი სამკვიდრო.

⁴ თუმცა ამბობს ედომი: დარბეული ვართ, მაგრამ კვლავ აღვადგენთ ნაოხარს. ცაბაოთ უფალი კი ამბობს: შეიძლება ააშენონ, მაგრამ მე დავანგრევ. და დაარქმევენ მათ ბოროტების მხარეს, ხალხს, რომელსაც სამუდამოდ შემოსწყრა უფალი.

⁵ თქვენი თვალით იხილავთ ამას და იტყვით: ‘დიდებულია უფალი ისრაელის საზღვრებს გარეთაც!’

⁶ შვილი პატივს სცემს მამას და ყმა – თავის ბატონს. და თუ მე მამა ვარ, სად არის ჩემი პატივისცემა? თუ მათი ბატონი ვარ, სად არის ჩემდამი კრძალვა? თქვენ გეუბნებათ ცაბაოთ უფალი: ჰოი მღვდლებო, ჩემი სახელის შეურაცხმყოფელნო! თქვენ კი ამბობთ: ‘რითი შეურაცხვყავით შენი სახელი?’

⁷ მოგაქვთ წაბილწული პური ჩემს სამსხვერპლოზე და ამბობთ: რითი წაგბილწეთო? იმით, რომ ფიქრობთ: უფლის ტაბლა რა პატივის ღირსიაო.

⁸ ბრმას რომ მწირავთ მსხვერპლად, ცუდი არ არის? კოჭლი და სნეული რომ მოგყავთ, ცუდი არ არის? აბა, მიართვი იგი შენს ხელისუფალს, თუ მოგიწონებს ან თუ კეთილად შემოგხედავს? – ამბობს ცაბაოთ უფალი. –

⁹ ახლა კი ევედრეთ ღმერთს, ვინძლო, შეგვიწყალოს. როგორღა შემოგხედავთ კეთილად, როცა თქვენი ხელიდან გამოდის ეს ძღვენი? – ამბობს ცაბაოთ უფალი.

¹⁰ რატომ არცერთი თქვენგანი არ დახშავს კარიბჭეებს, რომ ფუჭად აღარ ანთებდეთ ცეცხლს ჩემს სამსხვერპლოზე?! არ მეთნევით, – ამბობს ცაბაოთ უფალი და არ მივიღებ თქვენი ხელით მორთმეულ ძღვენს.

¹¹ რადგან დიდია ჩემი სახელი ხალხებში, მზის აღმოსავალიდან მის დასავალამდე. ყოველ ადგილას უკმევენ საკმეველს ჩემს სახელს და წმიდა ძღვენს მწირავენ, რადგან დიდია ჩემი სახელი ხალხებში, – ამბობს ცაბაოთ უფალი. –

¹² თქვენ კი შელახეთ ჩემი სახელი იმით, რომ ამბობთ: უფლის ტაბლა წაბილწულიაო და მასზე შეწირული ძღვენი საკვებად საძულველიო.

¹³ ამბობთ: აჰა, რა დამქანცველიაო ეს საქმე. და გძულთ იგი, – ამბობს ცაბაოთ უფალი, – მოგყავთ ნატაცები, კოჭლი და სნეული და ეს არის თქვენი ძღვენი – როგორ მივიღებ მას თქვენი ხელიდან?! – ამბობს უფალი. –

¹⁴ წყეულიმც იყოს ის თვალთმაქცი, ვისაც საღი მამალი პირუტყვი ჰყავს სამწყსოში და შეუთქვამს მას, მაგრამ მის ნაცვლად, ხინჯიანს სწირავს უფალს მსხვერპლად! რადგან დიდებული მეფე ვარ მე, – ამბობს ცაბაოთ უფალი, – და შიშის მომგვრელია ჩემი სახელი ხალხებში.“