Luke 3 - ბიბლია

¹ ტიბერიუს კეისრის მმართველობის მეთხუთმეტე წელს, როდესაც პონტოელი პილატე იყო განმგებელი იუდაში და ჰეროდე ტეტრარქი გალილეაში, ხოლო მისი ძმა, ფილიპე ტეტრარქი იყო იტურეასა და ტრაქონიტისის მხარეში, და ლისანიას ტეტრარქობისას აბილენეში,

² ანნას და კაიაფას მღვდელმთავრობის დროს, იყო სიტყვა ღმერთისა იოანეს, ზაქარიას ძის, მიმართ უდაბნოში.

³ და დადიოდა იგი იორდანეს მთელს არემარეში და ქადაგებდა სინანულის ნათლისღებას ცოდვათა მისატევებლად,

⁴ როგორც წერია ესაია წინასწარმეტყველის სიტყვათა წიგნში: „ხმა მღაღადებლისა უდაბნოში: ‘განუმზადეთ გზა უფალს, მოასწორეთ მისი ბილიკები.

⁵ ყოველი ხევი ამოივსება, ყოველი მთა და ბორცვი დადაბლდება, მრუდე გასწორდება და ოღროჩოღრო გზა გავაკდება.

⁶ და ყოველი ხორციელი იხილავს ღმერთის ხსნას.’“

⁷ მოსანათლად მისულ ხალხს იოანე ეუბნებოდა: „იქედნეთა ნაშობნო, ვინ გაგაფრთხილათ, რომ გაექცეთ მომავალ რისხვას?

⁸ მაშ გამოიღეთ მონანიების ღირსი ნაყოფი და ნუ იფიქრებთ და იტყვით გულში: ‘მამად აბრაამი გვყავს;’ რადგან, გეუბნებით თქვენ, ღმერთს შეუძლია ამ ქვებიდან აღუდგინოს აბრაამს შვილები.

⁹ ცული უკვე დევს ხეთა ფესვებთან. ყოველ ხეს, რომელიც კეთილ ნაყოფს არ გამოიღებს, ჭრიან და ცეცხლში აგდებენ.“

¹⁰ ჰკითხა მას ხალხმა და უთხრა: „მაშ, რა ვქნათ?“

¹¹ მიუგო და უთხრა მათ: „ვისაც ორი მოსასხამი აქვს, მისცეს უქონელს. და ვისაც საჭმელი აქვს, ისიც ასე მოიქცეს.“

¹² მოვიდნენ მებაჟენიც, რომ მონათლულიყვნენ და უთხრეს მას: „მოძღვარო, რა ვქნათ?“

¹³ უთხრა მათ: „თქვენთვის დაწესებულის მეტს ნურაფერს მოითხოვთ.“

¹⁴ ჯარისკაცებიც ეკითხებოდნენ: „ჩვენ რა ვქნათ?“ უთხრა მათ: „ნურავის შეავიწროვებთ, ცილს ნუ დასწამებთ და თქვენს ჯამაგირს დასჯერდით.“

¹⁵ როდესაც ხალხი მოლოდინში იყო და ყველა თავის გულში ფიქრობდა იოანეზე, ქრისტე ხომ არ არისო,

¹⁶ მიუგებდა და ეუბნებოდა ყველას იოანე: „მე წყლით გნათლავთ, მაგრამ მოდის ჩემზე ძლიერი, რომლის ფეხსაცმლის თასმის გახსნის ღირსიც არა ვარ. ის მოგნათლავთ თქვენ სულიწმიდით და ცეცხლით,

¹⁷ ნიჩაბი მის ხელთაა, რათა გაწმიდოს თავისი კალო და თავის ბეღელში შეაგროვოს ხორბალი, ბზე კი დაწვას ჩაუქრობელი ცეცხლით.“

¹⁸ კიდევ ბევრ სხვა რამესაც ახარებდა და შეაგონებდა ხალხს.

¹⁹ ხოლო ჰეროდე ტეტრარქმა, რომელსაც იგი ამხილებდა მისი ძმის ცოლის, ჰეროდიას, გამო, და ყოველივე იმის გამო, რა ბოროტებაც ჩაედინა,

²⁰ ყოველივე ამას ისიც დაუმატა, რომ იოანე საპყრობილეში ჩასვა.

²¹ როდესაც მთელი ხალხი ინათლებოდა და იესოც მოინათლა და ლოცულობდა, გაიხსნა ცა

²² და გადმოვიდა მასზე სულიწმიდა ხორციელი სახით, როგორც მტრედი, და გაისმა ზეციდან ხმა: „შენ ხარ ძე ჩემი საყვარელი, შენში არის ჩემი სათნოება.“

²³ თვით იესო, როდესაც იწყებდა, იქნებოდა 30 წლისა. და, როგორც ფიქრობდნენ, იყო ძე იოსებისა, ელისა,

²⁴ მათატისა, ლევისა, მელქისა, იანაისა, იოსებისა,

²⁵ მატათიასი, ამოსისა, ნაუმისა, ესლისა, ნაგაისა,

²⁶ მაათისა, მატათიასი, სემეინისა, იოსექისა, იოდასი,

²⁷ იოანანისა, რესასი, ზორობაბელისა, სალათიელისა, ნერისა,

²⁸ მელქისა, ადისა, კოსამისა, ელმადამისა, ერისა,

²⁹ იესუსი, ელიყეზერისა, იორიმისა, მათატისა, ლევისა,

³⁰ სიმეონისა, იუდასი, იოსებისა, იონამისა, ელიაკიმისა,

³¹ მელეა, მენასი, მატათასი, ნათანისა, დავითისა,

³² იესესი, იობედისა, ბოაზისა, სალასი, ნაასონისა,

³³ ამინადაბისა, ადმინისა, არნისა, ესრომისა, ფერეზისა, იუდასი,

³⁴ იაკობისა, ისააკისა, აბრაამისა, თარასი, ნაქორისა,

³⁵ სერუქისა, რაგავისა, ფელეკისა, ებერისა, სალასი,

³⁶ კაინანისა, არფაქსადისა, სემისა, ნოესი, ლამექისა,

³⁷ მათუსალასი, ენოქისა, იარედისა, მაჰალალეელისა, კაინანისა,

³⁸ ენოსისა, სეთისა, ადამისა, ღმერთისა.