Jonah 3 - ბიბლია

¹ მეორედ იყო უფლის სიტყვა იონასადმი თქმული:

² „ადექი და წადი ნინევეში, დიდ ქალაქში, და აუწყე ის, რასაც მე გეტყვი.“

³ ადგა იონა და წავიდა ნინევეში, როგორც უფალმა უბრძანა. თვალუწვდენელი ქალაქი იყო ნინევე, სამი დღის სავალი.

⁴ იარა იონამ ერთი დღე ქალაქში და ქადაგება იწყო, ამბობდა: „კიდევ 40 დღე და დაიქცევა ნინევე.“

⁵ ნინეველებმა ღმერთი იწამეს, გამოაცხადეს მარხვა და დიდიან-პატარიანად ჯვალოთი შეიმოსნენ.

⁶ შეიტყო ეს ამბავი ნინევეს მეფემ, ტახტიდან ჩამოვიდა, შემოიძარცვა სამეფო შესამოსელი, ჯვალო ჩაიცვა და ნაცარში ჩაჯდა.

⁷ შემდეგ, მეფისა და მისი დიდებულების ბრძანება გამოაცხადებინა ნინევეში: „არც კაცმა და არც პირუტყვმა – ძროხამ თუ ცხვარმა, არ ჭამოს, არ მოძოვოს და არც წყალი დალიოს.

⁸ ჯვალო ატაროს კაცმაც და პირუტყვმაც, მთელი ძალით შეჰღაღადონ ღმერთს, მიატოვონ ბოროტების გზა და ყველა ავი საქმე, რაშიც კი ხელი აქვთ გასვრილი.

⁹ ვინძლო გული მოუბრუნდეს ღმერთს, დაუცხრეს რისხვა და აღარ დავიღუპოთ!“

¹⁰ შეხედა ღმერთმა მათ საქციელს, რომ დააგდეს ბოროტების გზა, და გული მოუბრუნდა მათზე და აღარ მოუვლინა ის განსაცდელი, რასაც უმზადებდა.