Jonah 2 - ბიბლია

¹ იონამ თევზის მუცლიდან ლოცვა აღუვლინა უფალს, თავის ღმერთს.

² თქვა: „ჭირში მყოფმა შემოგღაღადე, უფალო, და შენ ხმა გამეცი. შავეთის მუცლიდან შველა ვითხოვე და შენ ისმინე ჩემი ვედრება.

³ ზღვის შუაგულში გადამაგდე და მორევმა სიღრმეში ჩამითრია, თავზე შენი ტალღები და ღვარი გადამდიოდა,

⁴ ვთქვი: ‘გაძევებული ვარ შენგან, უფალო, ნუთუ ვეღარასდროს მეღირსება შენი წმიდა ტაძრის ხილვა?’

⁵ ყელამდე მიწია წყალმა და უფსკრულმა მომიცვა; თავზე ლელი შემომეწნა,

⁶ მთების ფესვებამდე ჩავედი და ჩემს უკან მიწა სამუდამოდ ჩაირაზა. მაგრამ შენ უფალო, ღმერთო ჩემო, ქვესკნელს გამოსტაცე ჩემი სიცოცხლე!

⁷ როცა სულს ვღაფავდი, ვახსენე უფალი და ჩემმა ვედრებამ შენამდე მოაღწია შენს წმიდა ტაძარში.

⁸ ისინი, ვინც არაფრისმაქნის კერპებს ემსახურებიან, კარგავენ წყალობას!

⁹ მე კი მსხვერპლს შემოგწირავ სამადლობელი სიტყვებით; შევასრულებ, რაც აღთქმული მაქვს, ვინაიდან ხსნა უფლისგან არის!“

¹⁰ უბრძანა უფალმა თევზს და მან ხმელეთზე ამოანთხია იონა.