ივდითი 4 - ბიბლია

¹ იუდაში მცხოვრებმა ისრაელიანებმა შეიტყვეს, რა დღე აყარა ხალხებს ჰოლოფერნემ, ასურელთა მეფის – ნაბუქოდონოსორის – მთავარსარდალმა, როგორ გაძარცვა და დააქცია მათი ტაძრები.

² თავზარდაცემულნი ძრწოდნენ იერუსალიმისა და თავიანთი უფლის, ღმერთის ტაძრის გამო.

³ რადგანაც ახალი დაბრუნებული იყვნენ ტყვეობიდან, ახლად შეკრებილიყო მთელი იუდაელი ხალხი და ის იყო განეწმიდათ წმიდა ჭურჭელი, სამსხვერპლო და უფლის სახლი.

⁴ დაგზავნეს ხალხი მთელ სამარიასა და კონაში, ბეთ-ხორონსა და ბელმაინში, იერიხოსა და ქობაში, ესორასა და სალემის ხეობაში.

⁵ სასწრაფოდ დაიკავეს მაღალ მთათა ყველა მწვერვალი; ზღუდე შემოავლეს იქაურ სოფლებს და აღალი მოიმარაგეს ბრძოლისთვის, რადგანაც ის იყო მოემკათ პურის ყანები.

⁶ იმხანად იერუსალიმში მყოფმა მღვდელმთავარმა იოაკიმმა წერილი მისწერა ესდრელონის გასწვრივ, დოთანის მომიჯნავე დაბლობზე მდებარე ბეთულიასა და ბეთომესთაიმის მკვიდრთ;

⁷ სწერდა, დაეკავებინათ მთიანეთის ყელი, საიდანაც შეიძლებოდა შესულიყავი იუდაში. აქ ადვილი იყო მომხვდურის შეჩერება, რადგანაც ვიწრო გასასვლელში ორი კაციც კი ვერ აუქცევდა ერთმანეთს მხარს.

⁸ ისრაელის ძენი ისე მოიქცნენ, როგორც უბრძანეს მათ მღვდელმთავარმა იოაკიმმა და იერუსალიმში მყოფმა ისრაელის მთელი ხალხის უხუცესობამ.

⁹ ყველა ისრაელიანმა ვაჟკაცმა გულმხურვალედ შეღაღადა ღმერთს და მდაბლად მოიდრიკა ქედი მის წინაშე.

¹⁰ მათაც, მათმა ცოლ-შვილმაც და მათმა საქონელმაც, ყველა ხიზანმა, მოჯამაგირემ თუ ვერცხლით ნასყიდმა ძაძა მოირტყა წელზე.

¹¹ ტაძრის წინ დაემხო ყველა ისრაელიანი, იერუსალიმის ყოველი მკვიდრი – ქალი, კაცი თუ ბავშვი; ნაცარი დაიყარეს თავზე და უფლის წინაშე დაფინეს თავიანთი ძაძები.

¹² ძაძითვე შემოსეს სამსხვერპლო და გულმხურვალედ და ერთსულოვნად შეღაღადეს ისრაელის ღმერთს, რომ არ გაეწირა მათი ყრმები დასატაცებლად, ქალები – ტყვედ წასასხმელად, მათი სამკვიდრო ქალაქები – დასაქცევად, მათი სიწმიდენი – შესაბილწად, საგინებლად და წარმართთა სასიხარულოდ.

¹³ შეისმინა უფალმა მათი ხმა და მოხედა მათ გაჭირვებას. მრავალი დღის მანძილზე მარხულობდა ხალხი მთელს იუდასა და იერუსალიმში, ყოვლისმპყრობელი უფლის საწმიდრის წინაშე.

¹⁴ დიდი მღვდელმთავარი იოაკიმი და უფლის წინაშე მდგარი ყველა მღვდელი და ღვთისმსახური, ძაძით შემოსარტყლულნი, განუწყვეტლივ სწირავდნენ სრულადდასაწველს, აღთქმებსა და ნებაყოფლობით ძღვენს ხალხისაგან.

¹⁵ ქუდებზე ნაცარწაყრილნი შებღაოდნენ უფალს, მოწყალე თვალით მოეხედა ისრაელის მთელი სახლისთვის.