ივდითი 3 - ბიბლია

¹ მოციქულები აახლეს სამშვიდობო სიტყვით:

² „აი, ჩვენ, დიდი მეფის, ნაბუქოდონოსორის, მსახურნი, განვრთხმულვართ შენს წინაშე. გვიყავი, რაც გნებავს.

³ აი, ჩვენი სახლ-კარი, მთელი ჩვენი მიწა-წყალი, პურის ყანები, ფარები და ნახირი, ჩვენი ფარეხი და კარვები – ყველაფერი შენს წინაშეა; მოიხმარე, როგორც გენებოს.

⁴ აი, ჩვენი ქალაქები და მათი მკვიდრნი – შენი მონები – მოდი და ისე მოექეცი მათ, როგორც ეამება შენს გულს.“

⁵ ეახლნენ მოციქულები ჰოლოფერნეს და ეს სიტყვები გადასცეს მას.

⁶ მაშინ თავისი ლაშქრითურთ მიადგა ზღვისპირეთს, მეციხოვნენი ჩააყენა გამაგრებულ ქალაქებში და თანამებრძოლებად აიყვანა მათგან რჩეული მოლაშქრენი.

⁷ ქალაქებიცა და მათი შემოგარენიც გვირგვინებით, ცეკვითა და დაფდაფთა ცემით შეეგებნენ მას.

⁸ ჰოლოფერნემ კი მიწასთან გაასწორა მათი ბორცვები და აჩეხა მათი წმიდა ჭალაკები, რადგანაც ნაბრძანები ჰქონდა, მიწის პირიდან წარეხოცა ყველა ღმერთის სახსენებელი, რათა ყველა ხალხს მხოლოდ ნაბუქოდონოსორისათვის ეცა თაყვანი და ყველა ტომს მხოლოდ ის შეერაცხა ღმერთად.

⁹ მიადგა ესდრელონს, დოთანის მახლობლად, იუდას დიდი მთაგრეხილის წინ რომ ძევს.

¹⁰ გებასა და სკვითოპოლისს შორის დასცა კარავი და მთელი თვე დარჩა იქ, რათა თავისი ლაშქრისათვის საჭირო აღალი მოემარაგებინა.