ივდითი 2 - ბიბლია

¹ მეთვრამეტე წელს, პირველი თვის ოცდაორს, ასურელთა მეფის, ნაბუქოდონოსორის, სასახლეში გაისმა სიტყვა, შური ეძიათ მთელ იმ მიწა-წყალზე, რომელსაც უწინ დაემუქრა.

² უხმო ყველა მსახურსა და დიდებულს, თავისი იდუმალი ზრახვა გაანდო მათ და თავისივე სიტყვით გადაწყვიტა ქვეყნიერების დასჯა.

³ ერთად დაასკვნეს, მუსრი გაევლოთ ყველა ხორციელისთვის, ვინც არ დაემორჩილა მისი ბაგით წარმოთქმულ სიტყვას.

⁴ თავისი განზრახვის აღსრულება რომ დააპირა, ნაბუქოდონოსორმა, ასურელთა მეფემ, უხმო ჰოლოფერნეს, თავისი ლაშქრის მთავარსარდალს, რომელიც მეორე კაცი იყო მის შემდეგ, და უბრძანა:

⁵ „ამას ამბობს დიდი მეფე, მთელი ქვეყნიერების მბრძანებელი: წადი, თან იახელ თავიანთ ძლიერებაში დარწმუნებული მეომრები, 120 ათასი ქვეითი და ცხენთა სიმრავლე 12 ათასი მხედრითურთ.

⁶ წადი და რისხვად დაატყდი თავს მთელ დასავლეთს, რადგანაც არ დაემორჩილა ჩემი ბაგით წარმოთქმულ სიტყვას.

⁷ უბრძანე მათ, გამიმზადონ მიწა და წყალი, რადგანაც რისხვით აღვიძვრი მათზე, რათა დავაბნელო მთელი მიწის პირი ჩემი მეომრების ფეხებით და ჩემს ლაშქარს ასაოხრებლად მივცე ისინი.

⁸ მათი დაჭრილებით ამოვავსებ მათსავე ხევებს, ადიდდება ყველა მდინარე თუ ნაკადი და წალეკავს მათ გვამებს.

⁹ და წამოვასხამ ტყვეებს ქვეყნიერების კიდით კიდიდან.

¹⁰ შენ კი წადი და წინასწარ დამიმორჩილე მათი ყველა საზღვარი; ვინც დაგნებდება, შემინახე ისინი განკითხვის დღემდე.

¹¹ ურჩთ კი ნუ დაზოგავს შენი თვალი; მუსრი გაავლე მათ და ააოხრე შენს მიერ დაპყრობილი ქვეყნები.

¹² რადგანაც ცოცხალი ვარ და უძლეველია ჩემი სამეფო; მითქვამს და ჩემივე ხელით აღვასრულებ ჩემს ნათქვამს.

¹³ შენ კი ნურაფერს შეცვლი შენი მბრძანებლის სიტყვებში; ყველაფერი ისე აღასრულე, როგორც გიბრძანე და ნუ დააყოვნებ აღსრულებას.“

¹⁴ ჰოლოფერნე გამოეთხოვა თავის მბრძანებელს, უხმო დიდებულებს და ასურელთა ლაშქრის სარდლებსა და თავკაცებს.

¹⁵ დარაზმა რჩეული მეომრები, როგორც მისმა მეფემ უბრძანა, რიცხვით 120 ათასი და მშვილდოსანი მხედარიც 12 ათასი.

¹⁶ და საბრძოლო წესით დააწყო ისინი.

¹⁷ ტვირთის საზიდად წაასხა უამრავი აქლემი, ვირი და ჯორი, ხოლო ლაშქრის სარჩენად – ურიცხვი საქონელი, ცხვარი და თხა.

¹⁸ თან წაიტანა დიდძალი საგზალი ყოველი მოლაშქრისათვის და აურაცხელი ოქრო-ვერცხლი მეფის სახლიდან.

¹⁹ მთელი თავისი ჯარითურთ გაემართა სალაშქროდ, რათა წინ გაესწრო მეფე ნაბუქოდონოსორისათვის და დასავლეთით მთელი მიწის პირი დაეფარა ეტლებით, მხედრებითა და თავისი რჩეული ფეხოსნებით.

²⁰ მათთან ერთად დაიძრა მოკავშირეთა ურიცხვი ბრბო, ისეთივე აურაცხელი, როგორც კალია თუ მიწის მტვერი.

²¹ ნინევედან გამოსულნი სამი დღის შემდეგ მიადგნენ ბეკტილეთის ველს და იქ, მთის ძირას, ზემო კილიკიის ხელმარცხნივ დასცეს ბანაკი.

²² იქიდან წაუძღვა მთელ თავის ლაშქარს, ქვეითებს, მხედრებს, ეტლებს, და მთიანეთისაკენ აიღო გეზი.

²³ დაამარცხა ფუდი და ლუდი; გაძარცვა მთელი რასისის ძენი და ისმაელის ძენი, ქელეონის ქვეყნის სამხრეთით, უდაბნოს პირას მოსახლენი.

²⁴ მერე ევფრატი გადალახა, შუამდინარეთი გადაიარა და აბრონას პირას მდებარე ყველა გამაგრებული ქალაქი დააქცია, თვით იმ ადგილამდე, სადაც აბრონი ზღვას ერთვის.

²⁵ დაეუფლა კილიკიის მიწა-წყალს, შემუსრა ყველა წინააღმდგომი და იაფეთის საზღვარს მიადგა, არაბეთის სამხრეთით.

²⁶ გარს შემოადგა მადიამელებს, ცეცხლს მისცა მათი სახლები და გაიტაცა მათი ფარები.

²⁷ პურის მკისას დაეშვა დამასკოს ველზე; გადაწვა მათი ყანები; მუსრი გაავლო მათ ფარებს და ნახირს; გაძარცვა მათი ქასლაქები; ააოხრა მინდვრები და ამოწყვიტა მათი წვრილშვილი.

²⁸ შიშის ზარი დაეცა ზღვისპირეთის მოსახლეობას, სიდონისა და ტვიროსის მკვიდრთ, სურისა და ოკინას მცხოვრებთ, იამნიას ყველა ბინადარს, – და ძლიერ შეძრწუნდნენ აზოტისა და ასკალონის მკვიდრნი.