ივდითი 1 - ბიბლია

¹ ნაბუქოდონოსორის მეფობის მეთორმეტე წელს, ასურელებზე რომ მბრძანებლობდა დიდ ქალაქ ნინევეში, – არფაქსადის მეფობისას, რომელიც მეფობდა მიდიელებზე ეკბატანაში,

² და ეკბატანას გარს შემოავლო თლილი ქვის გალავანი, სისქით სამი წყრთა და სიგრძით ექვსი წყრთა, ხოლო მისი სიმაღლე 70 წყრთას აღწევდა, სიგანე კი – 50;

³ მის ბჭეებთან აღმართა ასწყრთიანი კოშკები, რომელთაც საფუძველში 60 წყრთის სიგანე ჰქონდათ.

⁴ ბჭეთა სიმაღლე, საიდანაც გადიოდა მისი ძლევამოსილი მხედრობა და მწყობრად მიაბიჯებდნენ ქვეითნი, 70 წყრთა იყო, ხოლო სიგანე – 40.

⁵ იმხანად მეფე ნაბუქოდონოსორი რაგავის ვრცელ ტაფობზე შეება არფაქსად მეფეს.

⁶ ეახლა მას ყველა მთიელი, ყველა, ვინც ტიგროსის, ევფრატისა თუ ჰიდასპესის პირას სახლობს, ხოლო დაბლობიდან არიოქი – ელიმელთა მეფე. მრავალი ტომი შეუერთდა ქელეუდელთა ლაშქარს.

⁷ და უხმო ნაბუქოდონოსორმა, ასურელთა მეფემ, სპარსეთის ყველა მცხოვრებს და დასავლეთის ყველა მცხოვრებს, კილიკიისა და დამასკოს, ლიბანის, ანტილიბანის და ზღვისპირეთის ყველა მცხოვრებსაც;

⁸ კარმელის, გალაადის, ზემო გალილეისა და ესდრელონის ვრცელი დაბლობის ხალხებს;

⁹ სამარიისა და მისი ქალაქების მკვიდრთ, იორდანეს გაღმა მცხოვრებთ, ვიდრე იერუსალიმამდე, ბეთანიმდე, ხელუსამდე, კადეშამდე, ეგვიპტის მდინარემდე, თახფანხესამდე, რამზესამდე და გოშენის მთელ ქვეყნამდე,

¹⁰ ზემო ტანისის და მემფისის მისადგომამდე და ეგვიპტის ყველა მცხოვრებს ეთიოპიის საზღვრამდე.

¹¹ მაგრამ მთელი ამ მიწა-წყლის მხცოვრებლებმა არად ჩააგდეს ნაბუქოდონოსორის, ასურელთა მეფის, სიტყვა და მხარში არ ამოუდგნენ საომრად, ვინაიდან არ შეუშინდნენ მას, აქაოდა ეს ერთი კაცი რას დაგვაკლებსო, და გაწბილებული გააბრუნეს უკან მისი მოციქულები.

¹² ნაბუქოდონოსორი სასტიკად განურისხდა ყველა ამ ქვეყანას და თავისი ტახტი და მეუფება დაიფიცა, რომ შურს იძიებდა კილიკიის, დამასკოსა თუ სირიის საზღვრებზე და მახვილით გაავლებდა მუსრს მოაბის ქვეყნის მცხოვრებთ, ამონის, მთელი იუდასა და ეგვიპტის ყველა მკვიდრს ორი ზღვის საზღვრებამდე.

¹³ მეჩვიდმეტე წელს თავისი ლაშქრით გაემართა არფაქსად მეფის წინააღმდეგ, დაამარცხა და უკუაქცია მთელი მისი ლაშქარი, მთელი მისი მხედრობა და საომარი ეტლები.

¹⁴ აიღო მისი ქალაქები, ეკბატანას მიაღწია, ხელთ იგდო ციხესიმაგრენი, ააოხრა მისი მოედნები და შებღალა მისი მშვენება.

¹⁵ არფაქსადი კი რაგავის მთიანეთში შეიპყრო და თავისი ლახვარით განგმირა, იმავე დღეს მოუღო ბოლო.

¹⁶ მერე ნინევესაკენ გაბრუნდა მთელი თავისი ლაშქრითურთ, მხნე მეომართა ურიცხვი სიმრავლით; იქ შეისვენა და 120 დღე ილხენდა თავის ლაშქართან ერთად.