Haggai 2 - ბიბლია

¹ მეშვიდე თვის ოცდამეერთე დღეს იყო უფლის სიტყვა ანგია წინასწარმეტყველის პირით ნათქვამი:

² უთხარი ზერუბაბელს, შეალთიელის ძეს, იუდას განმგებელს, იესოს, იეჰოცადაკის ძეს, მღვდელმთავარს, და მთელს დანარჩენ ხალხს:

³ ვინ არის დარჩენილი თქვენს შორის, ვინც მოსწრებია ამ სახლის პირვანდელ დიდებას? რას ხედავთ ახლა? ხომ არარაობად ჩანს თქვენს თვალში!

⁴ ახლა გამაგრდი, ზერუბაბელ! – ამბობს უფალი. – გამაგრდი იესო იეჰოცადაკის ძევ, მღვდელმთავარო! გამაგრდი, მთელი ქვეყნის ერო! – ამბობს უფალი, – და იშრომეთ, რადგან თქვენთანა ვარ, – ამბობს ცაბაოთ უფალი. –

⁵ სიტყვა, ეგვიპტიდან გამოსვლისას რომ დაგიდევით, და ჩემი სული იმყოფება თქვენს შორის. ნუ გეშინიათ.

⁶ რადგან ასე ამბობს ცაბაოთ უფალი: კიდევ ცოტაც და შევარყევ ცასა და მიწას, ზღვასა და ხმელეთს.

⁷ შევარყევ ყველა ხალხებს და აღსრულდება ყოველი ხალხის საწადელი: დიდებით ავავსებ ამ სახლს, – ამბობს ცაბაოთ უფალი. –

⁸ ჩემია ვერცხლი და ჩემია ოქრო, – ამბობს ცაბაოთ უფალი. –

⁹ პირვანდელზე უფრო დიდი იქნება ამ უკანასკნელი სახლის დიდება, – ამბობს ცაბაოთ უფალი. – ამ ადგილზე მოვაფენ მშვიდობას, – ამბობს ცაბაოთ უფალი.

¹⁰ დარიოსის მეფობის მეორე წლის მეცხრე თვის ოცდამეოთხე დღეს იყო უფლის სიტყვა ანგია წინასწარმეტყველის პირით ნათქვამი:

¹¹ „ასე თქვა ყოვლისმპყრობელმა უფალმა: ჰკითხე მღვდლებს რჯულზე:

¹² ვთქვათ, კაცს მიაქვს წმიდა ხორცი თავის კალთაში გამოკრული, და თუ მოხვდება კალთის კიდე პურს, შეჭამადს, ღვინოს, ზეთს ან რაიმე სხვა საჭმელს, ისინიც წმიდა გახდებიან?“ მიუგეს მღვდლებმა და უთხრეს: არაო.

¹³ და კვლავ თქვა ანგიამ: „თუ შეეხო ამას ყველაფერს მძორის შეხებით გაუწმიდურებული კაცი, გაუწმიდურდება ეს ყველაფერი?“ მიუგეს მღვდლებმა და უთხრეს: გაუწმიდურდებაო.

¹⁴ მაშინ თქვა ანგიამ: „ასეთია ეს ერი, ასეთია ეს ხალხი ჩემს წინაშე, – ამბობს უფალი, – ასეთია მათი ხელის ნამოქმედარი. მათი მოტანილი ყველაფერი უწმიდურია.

¹⁵ ახლა დააკვირდით, რა ხდებოდა ძველად, ვიდრე ქვა ქვაზე დაიდებოდა უფლის ტაძარში.

¹⁶ მივიდოდნენ ოცძნიან ზვინთან და აღმოჩნდებოდა ათი. მივიდოდნენ საწნახელთან 50 საწყაოს ამოსახაპავად და აღმოჩნდებოდა 20.

¹⁷ გინადგურებდით მთელს ნამუშაკევს ხორშაკით, სიყვითლით და სეტყვით. და მაინც არ მოიქეცით ჩემსკენ, – ამბობს უფალი. –

¹⁸ დააკვირდით, რა ხდებოდა ძველად მეცხრე თვის ოცდამეოთხე დღიდან, იმ დღიდან, რაც უფლის ტაძარი დაფუძნდა, დააკვირდით:

¹⁹ თუღა დარჩა ბეღელში თესლი? თუ გამოუღია ნაყოფი ვაზს, ლეღვს, ბროწეულს და ზეთისხილს? ამიერიდან კი ვაკურთხებ მათ.“

²⁰ მეორედ იყო უფლის სიტყვა ანგიას მიმართ თვის ოცდამეოთხე დღეს:

²¹ „ასე უთხარი ზერუბაბელს, იუდას განმგებელს: შევარყევ ცას და მიწას.

²² დავამხობ სამეფოთა ტახტებს, მოვსპობ წარმართთა სამეფოთა ძლიერებას, დავამხობ ეტლებს მხედრებითურთ, და დაეცემიან ცხენები და მხედრები ერთმანეთის მახვილით,

²³ იმ დღეს, – ამბობს ცაბაოთ უფალი, – აგიყვან შენ, ზერუბაბელ შეალთიელის ძეო, ჩემო მორჩილო, – ამბობს უფალი, – და ბეჭედივით მეყოლები, რადგან ჩემი რჩეული ხარ, – ამბობს ცაბაოთ უფალი.“