Genesis 11 - ბიბლია

¹ ერთი ენა ჰქონდა მთელ ქვეყნიერებას და ერთნაირი სიტყვები.

² და როცა დაიძრნენ აღმოსავლეთიდან, ჰპოვეს ველი შინყარის მიწაზე და იქ დამკვიდრდნენ.

³ და უთხრეს ერთმანეთს: „მოდი, მოვჭრათ აგური და გამოვწვათ ცეცხლში.“ და ჰქონდათ აგური ქვის ნაცვლად და კირის მაგივრად ფისი.

⁴ და თქვეს: „ავიშენოთ ქალაქი და გოდოლი, რომლის თხემიც ზეცას მისწვდება. ასე შევიქმნათ სახელი, რომ არ გავიფანტოთ მთელი დედამიწის ზურგზე.“

⁵ ჩამოვიდა უფალი, რათა ენახა ქალაქი და გოდოლი, რომელსაც აშენებდნენ ადამიანების ძეები.

⁶ და თქვა უფალმა: „ერთი ხალხია ეს და ერთი ენა აქვთ. რაკი ეს საქმე წამოიწყეს, ამიერიდან დაუბრკოლებლივ გააკეთებენ ყველაფერს, რასაც კი განიზრახავენ.

⁷ აბა, ჩავიდეთ და ავრიოთ მათი ენა, რომ ვერ გაიგონ ერთმანეთის ენა!“

⁸ და გაფანტა უფალმა ისინი იქიდან მთელი დედამიწის ზურგზე და მათ ვეღარ დაასრულეს ქალაქის შენება.

⁹ ამიტომ ეწოდა იმ ქალაქს ბაბილონი, რადგან უფალმა იქ აღრია მათი ენა და გაფანტა ისინი დედამიწის ზურგზე.

¹⁰ ეს არის სემის მოდგმა: 100 წლისა იყო სემი, როცა წარღვნიდან ორი წლის შემდეგ შვა არფაქშადი,

¹¹ და იცოცხლა სემმა არფაქშადის დაბადების შემდეგ 500 წელი, და კვლავ შვა ძენი და ასულნი.

¹² 35 წლისა იყო არფაქშადი, როდესაც შეეძინა შელა.

¹³ და იცოცხლა არფაქშადმა შელას დაბადების შემდეგ 403 წელი და მას კვლავ შეეძინა ძენი და ასულნი.

¹⁴ 30 წლისა იყო შელა, როდესაც შვა ყებერი.

¹⁵ და იცოცხლა ყებერმა შელას დაბადების შემდეგ 403 წელი, და კვლავ შვა ძენი და ასულნი.

¹⁶ 34 წლისა იყო ყებერი, როდესაც შვა ფელეგი.

¹⁷ და იცოცხლა ყებერმა ფელეგის დაბადების შემდეგ 430 წელი და კვლავ შვა ძენი და ასულნი.

¹⁸ 30 წლისა იყო ფელეგი, როდესაც შვა რეღუ.

¹⁹ და იცოცხლა ფელეგმა რეღუს დაბადების შემდეგ 209 წელი და კვლავ შვა ძენი და ასულნი.

²⁰ 32 წლისა იყო რეღუ, როდესაც შეეძინა სერუგი.

²¹ და იცოცხლა რეღუმ სერუგის დაბადების შემდეგ 207 წელი და კვლავ შვა ძენი და ასულნი.

²² 30 წლისა იყო სერუგი, როდესაც შვა ნახორი.

²³ და იცოცხლა სერუგმა ნახორის დაბადების შემდეგ 200 წელი და კვლავ შვა ძენი და ასულნი.

²⁴ 29 წლისა იყო ნახორი, როდესაც შვა თერახი.

²⁵ და იცოცხლა ნახორმა თერახის დაბადების შემდეგ 119 წელი და კვლავ შვა ძენი და ასულნი.

²⁶ და იცოცხლა თერახმა 70 წელი და შვა აბრამი, ნახორი და ჰარანი.

²⁷ და ეს არის თერახის მოდგმა: თერახმა შვა აბრამი, ნახორი და ჰარანი; და ჰარანმა შვა ლოტი.

²⁸ და მოკვდა ჰარანი თერახის, მამამისის სიცოცხლეშივე, თავისი შობის ქვეყანაში – ქალდეველთა ურში.

²⁹ მოიყვანეს აბრამმა და ნახორმა ცოლები. აბრამის ცოლს ერქვა სარაი, ხოლო ნახორის ცოლს – მილქა, იგი იყო ასული ჰარანისა, რომელიც იყო მილქასა და ისქას მამა.

³⁰ და იყო სარაი ბერწი, და არ ჰყავდა შვილი.

³¹ და წაიყვანა თერახმა აბრამი, თავისი ძე და ლოტი, ჰარანის ძე – თავისი შვილიშვილი და სარაი – თავისი რძალი, აბრამის, თავისი ძის ცოლი, და მათთან ერთად გავიდა ქალდეველთა ურიდან, ქანაანის ქვეყანაში წასასვლელად. და მივიდნენ ხარანამდე და იქ დასახლდნენ.

³² იცოცხლა თერახმა 205 წელი და მოკვდა ხარანში.