Amos 2 - ბიბლია

¹ ასე ამბობს უფალი: ერთი და ორი დანაშაული მიპატიებია მოაბისათვის და მეტს აღარ ვაპატიებ, რადგან ცეცხლში დაანაცრა ედომის მეფის ძვლები.

² ცეცხლს მივცემ მოაბს და ის შთანთქავს კერიოთის დარბაზებს; მოკვდება მოაბი ღრიანცელის, საომარი ყიჟინისა და საყვირის ხმაზე.

³ ამოვძირკვავ მსაჯულს მისი წიაღიდან და დავხოცავ ყველა მთავარს მასთან ერთად, – ამბობს უფალი.

⁴ ასე ამბობს უფალი: ერთი და ორი დანაშაული მიპატიებია იუდასათვის და მეტს აღარ ვაპატიებ, რადგან უკუაგდო უფლის რჯული და არ იცავენ მის წესებს; რადგან გზა-კვალი აურიეს მათ ცრუღმერთებმა, რომელთაც მათი მამები მიჰყვებოდნენ.

⁵ ცეცხლს მივცემ იუდას და შთანთქავს იერუსალიმის დარბაზებს.

⁶ ასე ამბობს უფალი: ერთი და ორი დანაშაული მიპატიებია ისრაელისთვის და მეტს აღარ ვაპატიებ, რადგან ვერცხლზე ჰყიდიან მართალს და ღარიბ-ღატაკს – წყვილ ხამლად –

⁷ უმწეოთა თავს მტვერსა და ნაცარში ქელავენ და გზიდან აცდენენ ბეჩავთ; შვილი და მამა ერთ ქალთან შედიან, რათა შელახონ ჩემი წმიდა სახელი.

⁸ ბეჩავთაგან გირაოში აღებულ მოსასხამებზე გაშოტილან ყოველგვარ სამსხვერპლოსთან, და მსჯავრდებულთაგან გამოძალული ფულით ნაყიდი ღვინით ბრუჟდებიან თავიანთი ღმერთის სახლში.

⁹ გავანადგურე ამორეველი მის წინაშე, კედარივით რომ ამაღლდა და მუხასავით რომ გაძლიერდა; გავანადგურე მაღლა მისი ნაყოფი და დაბლა მისი ფესვები.

¹⁰ იმისთვის გამოგიყვანეთ ეგვიპტის ქვეყნიდან და 40 წელი გატარეთ უდაბნოში, რომ დაგემკვიდრებინათ ამორეველთა ქვეყანა.

¹¹ შენს ძეთა შორის აღვძარი წინასწარმეტყველნი, და შენს ყრმათა შორის – მოწმიდარნი. განა ასე არ იყო, ისრაელიანებო? – ამბობს უფალი. –

¹² თქვენ კი ღვინოს ასმევდით მოწმიდარებს და უბრძანებდით წინასწარმეტყველთ: ნუ წინასწარმეტყველებთო!

¹³ აჰა, გადაგჯეგავთ, როგორც ძნით სავსე ურემი ჯეგავს, –

¹⁴ ისე, რომ მკვირცხლი დაკარგავს სირბილის უნარს და ძლიერი ძალას ვერ მოიცემს; მამაცი კაცი თავს ვერ დაიხსნის.

¹⁵ მშვილდის მპყრობელი ვერ გაუძლებს, ვერც ფეხმარდი ვერ გადარჩება და ვერც მხედარი ვერ იხსნის თავს.

¹⁶ მამაცთა შორის გულადიც კი შიშველი გაიქცევა იმ დღეს, – ამბობს უფალი.