Amos 1 - ბიბლია

¹ ამოსის, თეკოაყელი მწყემსის, სიტყვები, რომლებიც ისმინა მან ისრაელის შესახებ იუდას მეფის ყუზიას დროს და ისრაელის მეფის იერობოყამ იოაშის ძის დროს, მიწისძვრამდე ორი წლით ადრე.

² და თქვა მან: „უფალი სიონიდან იგრგვინებს და ხმას გამოსცემს იერუსალიმიდან; გადახმება სამწყემსურის საძოვრები და გადაირუჯება ქარმელის თხემი.“

³ ასე ამბობს უფალი: ერთი და ორი დანაშაული მიპატიებია დამასკოსათვის და მეტს აღარ ვაპატიებ, რადგან ცეცხლის კევრით გალეწეს გალაადი.

⁴ ცეცხლს მივცემ ხაზაელის სახლს და ცეცხლი შთანთქავს ბენ-ჰადადის დარბაზებს.

⁵ დავლეწავ დამასკოს საკეტურებს; ამოვძირკვავ ავენის ველების მკვიდრთ და ბეთ-ყედენის სახლის კვერთხისმპყრობელს; გადაიხვეწებიან არამელნი კირში, – ამბობს უფალი.

⁶ ასე ამბობს უფალი: ერთი და ორი დანაშაული მიპატიებია ღაზასათვის და მეტს აღარ ვაპატიებ, რადგან მათ ყველა ტყვედ წაიყვანეს, რომ ედომისთვის გადაეცათ ისინი.

⁷ ცეცხლს მივცემ ღაზას კედლებს და ის შთანთქავს მის დარბაზებს.

⁸ ამოვძირკვავ აშდოდის მკვიდრთ და აშკელონელ კვერთხისმპყრობელს; ყეკრონზეც შევმართავ ხელს და საბოლოოდ გაწყდება ფილისტიმელთა ნატამალი, – ამბობს უფალი.

⁹ ასე ამბობს უფალი: ერთი და ორი დანაშაული მიპატიებია ცორისათვის და მეტს აღარ ვაპატიებ, რადგან ტყვედ ჩაუგდეს მთელი ხალხი ედომს, აღარ გაიხსენეს ძმური აღთქმა.

¹⁰ ცეცხლს მივცემ ცორის კედლებს და ის შთანთქავს მის დარბაზებს.

¹¹ ასე ამბობს უფალი: ერთი და ორი დანაშაული მიპატიებია ედომისათვის და მეტს აღარ ვაპატიებ, რადგან მახვილით დევნიდა თავის ძმას, ჩაიხშო ნათესაური გრძნობები, მუდამ ბრდღვინავს რისხვით და ბრაზს ინახავს გულში.

¹² ცეცხლს მივცემ თემანს და ის შთანთქავს ბოცრას დარბაზებს.

¹³ ასე ამბობს უფალი: ერთი და ორი დანაშაული მიპატიებია ყამონელებისათვის და მეტს აღარ ვაპატიებ, რადგან ფატრავდნენ ორსულ ქალებს გალაადში, რომ გაეფართოვებინათ თავიანთი საზღვრები.

¹⁴ ცეცხლს მივცემ რაბას კედლებს და ის შთანთქავს მის დარბაზებს ყიჟინის ხმაზე ბრძოლის დღეს, ქარბორბალათი ქარიშხლიან დღეს.

¹⁵ ტყვედ ჩავარდება მათი მეფე თავის დიდებულებთან ერთად, – ამბობს უფალი.