2.تواريخ 8 - Sindhi Bible

¹ ۽ ويهہ ورهيہ، جن ۾ سليمان خداوند جو گهر ۽ پنهنجو گهر جوڙيو، تن جي پوري ٿيڻ تي هيئن ٿيو تہ

² جيڪي شهر سليمان حورام کي ڏنا هئا، سي سليمان اڏايا ۽ بني اسرائيل کي اُتي رهايائين.

³ ۽ سليمان حمات ضوباہ ڏانهن ويو ۽ انهن کي جيتيائين.

⁴ ۽ هن بيابان ۾ تدمور اڏايو، ۽ گدامن جا سڀ شهر حمات ۾ جوڙايائين.

⁵ ۽ هن مٿيون بيت حورون، ۽ هيٺيون بيت حورون بہ جوڙيا، جي ڪوٽن وارا شهر هئا، ۽ اُنهن کي ڀتيون، ۽ دروازا، ۽ گز هئا؛

⁶ ۽ بعلت بہ، ۽ جيڪي گدامن جا شهر سليمان وٽ هئا، ۽ سندس گاڏين جا سڀ شهر، ۽ سندس گهوڙي سوارن جا شهر، ۽ ٻيو جيڪي سليمان يروشلم ۾، ۽ لبنان ۾، ۽ پنهنجي بادشاهت جي سڄيءَ زمين ۾، پنهنجي خوشيءَ لاءِ جيڪي وڻيس سو جوڙيو.

⁷ باقي جيڪي ماڻهو حتين ۽ امورين، ۽ فريزين، ۽ حوين، ۽ يبوسين مان بچيا هئا، جي اسرائيل مان نہ هئا؛

⁸ انهن جي اولاد مان جيڪي انهن جي زمين ۾ رهجي ويا، ۽ جن کي بني اسرائيل ماري کپائي نہ ڇڏيو هو، تن مان سليمان غلامن جي ڀرتي ڪئي، جي اڄ ڏينهن تائين هلندا اچن.

⁹ پر بني اسرائيل مان سليمان پنهنجي ڪم لاءِ ڪي بہ غلام نہ بنايا؛ پر اهي جنگي ماڻهو ۽ سندس خاص سردار، ۽ سندس گاڏين ۽ گهوڙي سوارن جا سردار هئا.

¹⁰ ۽ اُهي سليمان بادشاهہ جا مکيہ عملدار هئا، جي ٻہ سؤ پنجاهہ هئا، ۽ ماڻهن تي حڪم هلائيندا هئا.

¹¹ ۽ سليمان فرعون جي ڌيءَ کي، دائود جي شهر مان ڪڍي انهيءَ گهر ۾ آندو، جو هن سندس لاءِ جوڙايو هو. ڇالاءِ تہ هن چيو تہ منهنجي زال اسرائيل جي بادشاهہ دائود جي گهر ۾ نہ رهندي، ڇالاءِ جو جن جاين ۾ خداوند جي صندوق آئي آهي، سي پاڪ آهن.

¹² تنهن کانپوءِ سليمان جيڪا خداوند جي قربانگاهہ دالان جي اڳيان جوڙي هئي، تنهن تي سوختني قربانيون چاڙهيون،

¹³ يعني روزمرہ جي فرض موجب، موسيٰ جي حڪمن موافق، سبت جي ڏينهن تي، ۽ نئين چنڊ تي، ۽ ٺهرايل عيدن تي، سال ۾ ٽي ڀيرا، يعني اڻ خمير ٿيل مانيءَ جي عيد تي، ۽ هفتن جي عيد تي، ۽ تنبن جي عيد تي، قربانيون چاڙهيون.

¹⁴ ۽ پنهنجي پيءُ دائود جي حڪم موجب ڪاهنن جا حصا واري سان خدمت ڪرڻ لاءِ مقرر ڪيائين، ۽ لاوين کي پنهنجي فرضي ڪمن تي رکيائين تہ تعريف ڪن، ۽ ڪاهنن جي اڳيان خدمت چاڪري ڪن، جيئن ڪ روزمرہ جو دستور هو: دربانن کي بہ سڀني درن تي دستور موجب مقرر ڪيائين: ڇالاءِ جو خدا جي مرد دائود ائين حڪم ڪيو هو.

¹⁵ ۽ جيڪو حڪم بادشاهہ ڪاهنن، ۽ لاوين کي ڪنهن بہ ڳالهہ بابت يا خزانن بابت ڏنو هو، تنهن کان هو ٻاهر نہ ويا.

¹⁶ هاڻي سليمان جو ڪم خداوند جي گهر جي بنياد پوڻ ۽ ان جي پوري ٿيڻ تائين پورو ٿيو. انهيءَ طرح خداوند جو گهر جُڙي تيار ٿيو.

¹⁷ پوءِ سليمان عيصون جابر ۽ ايلوت، جي ادوم جي ملڪ ۾ سمنڊ جي ڪناري تي آهن، انهن ڏانهن ويو.

¹⁸ ۽ حورام پنهنجن نوڪرن جي هٿان جهاز ۽ اهي نوڪر موڪليا، جن کي سمنڊ جي خبر هئي: ۽ اهي سليمان جي نوڪرن سان گڏجي اوفير ۾ آيا، ۽ اتان ساڍا چار سؤ قنطار سون جا کڻي سليمان بادشاهہ وٽ آيا.