2.تواريخ 21 - Sindhi Bible

¹ ۽ يهوسفط پنهنجي ابن ڏاڏن سان وڃي سُتو ۽ دائود جي شهر ۾ پنهنجن ابن ڏاڏن سان دفن ٿيو: ۽ سندس پٽ يهورام سندس جاءِ تي بادشاهہ ٿيو.

² ۽ هن جا ڀائر يهوسفط جا پٽ هي هئا؛ عزرياہ، ۽ يحي ايل، ۽ زڪرياہ، ۽ عزرياہ، ۽ ميڪائيل، ۽ سفطياہ: اهي سڀ اسرائيل جي بادشاهہ يهوسفط جا پٽ هئا.

³ ۽ انهن کي سندن پيءُ چاندي ۽ سون ۽ قيمتي شين جون گهڻيون سوغاتون ڏنيون، ۽ يهوداہ ۾ قلعن وارا شهر بہ ڏنا، پر بادشاهت هن يهورام کي ڏني، ڇالاءِ جو هو پهريتو هو.

⁴ هاڻي جڏهن يهورام پنهنجي پيءُ جي بادشاهت تي قائم ٿيو ۽ پاڻ کي مضبوط ڪيائين، تڏهن هن پنهنجن سڀني ڀائرن کي، ۽ اسرائيل جي ٻين ڪيترن سردارن کي بہ ترار سان قتل ڪيو.

⁵ جڏهن يهورام بادشاهي ڪرڻ لڳو، تڏهن هو ٻٽيهن ورهين جي عمر جو هو؛ هن يروشلم ۾ اٺ سال بادشاهي ڪئي.

⁶ ۽ هو اسرائيل جي بادشاهہ جي رستي تي هليو، جيئن ڪ اخي اب جي گهراڻي ڪيو: ڇالاءِ جو اخي اب جي ڌيءَ سندس زال هئي: ۽ هن جيڪي ڪم ڪيا سي خداوند جي نظر ۾ خراب هئا.

⁷ انهيءَ هوندي بہ خداوند دائود جي گهراڻي کي ناس ڪرڻ نہ گهريو، ڇالاءِ جو دائود سان عهد اقرار ڪيو هئائين ۽ انجام ڪيو هئائين تہ هن کي ۽ سندس اولاد کي هميشہ هڪڙو ڏيئو ڏيندو رهندو.

⁸ ۽ هن جي ڏينهن ۾ ادوم يهوداہ جي زيردستيءَ کان باغي ٿيو، ۽ اتي جي ماڻهن پنهنجي لاءِ هڪڙو بادشاهہ مقرر ڪيو.

⁹ تڏهن يهورام پنهنجن سردارن سان ۽ پنهنجون سڀ گاڏيون ساڻ ڪري، لنگهي انهيءَ پاسي ويو: ۽ رات جو اُٿي ادومين کي شڪست ڏنائين، ڇالاءِ جو هو هن کي ۽ گاڏين جي سردارن کي چوڌاري وڪوڙي ويا هئا.

¹⁰ انهيءَ طرح ادوم اڄ ڏينهن تائين يهوداہ جي زيردستيءَ کان باغي ٿي ڦري ويو: ۽ انهيءَ ساڳي وقت لبناہ بہ سندس زيردستيءَ کان باغي ٿي ويو، ڇالاءِ جو هن خداوند پنهنجي ابن ڏاڏن جي خدا کي ڇڏي ڏنو هو.

¹¹ تنهن کانسواءِ هن يهوداہ جي جبلن ۾ مٿانهيون جايون ٺهرايون، ۽ يروشلم جي رهاڪن کي زناڪار ڪيائين، ۽ يهوداہ کي گمراهہ ڪري ڇڏيائين.

¹² ۽ ايلياہ نبيءَ وٽان هن وٽ هڪڙو خط آيو، جنهن ۾ لکيل هو تہ خداوند، تنهنجي پيءُ دائود جو خدا هيئن ٿو فرمائي تہ تون پنهنجي پيءُ يهوسفط جي، يا يهوداہ جي بادشاهہ آسا جي رستن تي نہ هليو آهين؛

¹³ پر اسرائيل جي بادشاهن جي رستي تي هليو آهين. ۽ يهوداہ کي ۽ يروشلم جي رهاڪن کي زناڪار ڪيو اٿيئي، جيئن ڪ اخي اب جي گهراڻي ڪيو آهي؛ ۽ تو پنهنجي پيءُ جي گهراڻي مان بہ پنهنجا ڀائر ڪُٺا آهن، جي توکان چڱا هئا:

¹⁴ تنهنڪري ڏس، خداوند تنهنجي قوم ۽ تنهنجي اولاد ۽ تنهنجين زالن، ۽ تنهنجي ساري ملڪيت کي هڪڙي وڏي طاعون سان ڌڪ هڻندو:

¹⁵ ۽ توکي آنڊن جي مرض جي ڪري هڪڙي وڏي بيماري ٿيندي، جنهنڪري روز بروز انهيءَ بيماريءَ جي ڪري تنهنجا آنڊا ڪِري پوندا.

¹⁶ ۽ خداوند فلستين کي ۽ انهن عربن کي، جي حبشين جي پاسي ۾ رهن ٿا، يهورام جي خلاف جوش ڏياري اُٿاريو:

¹⁷ ۽ اهي يهوداہ تي چڙهي آيا ۽ انهن ۾ ڪاهي پيا، ۽ بادشاهہ جي گهر ۾ جيڪو مال هٿ آين سو، ۽ سندس پٽ ۽ سندس زالون بہ، کڻي هليا ويا؛ جنهنڪري هن وٽ ڪوبہ پٽ ڪونہ رهيو سواءِ يهوآخز جي، جو سندس پٽن مان سڀ کان ننڍو هو.

¹⁸ ۽ ايتري کانپوءِ خداوند هن کي آنڊن جو هڪڙو لاعلاج مرض بڇيو.

¹⁹ ۽ عرصي پئي، ٻن ورهين کانپوءِ، هيئن ٿيو تہ هن جا آنڊا انهيءَ بيماريءَ جي ڪري نڪري ٻاهر ٿيا، ۽ هو خراب مرضن جي ڪري مري ويو. ۽ هن جي ماڻهن سندس لاءِ ساڙڻ نہ ڪيو، جيئن سندس ابن ڏاڏن لاءِ ڪيو هئائون.

²⁰ جڏهن هو بادشاهي ڪرڻ لڳو، تڏهن ٻٽيهن ورهين جي عمر جو هو ۽ هن يروشلم ۾ اٺ سال بادشاهي ڪئي: ۽ هو بي سوءَ لڏي هليو ويو؛ ۽ هن کي دائود جي شهر ۾ دفن ڪيائون، پر بادشاهن جي قبرستان ۾ نہ.