2.تواريخ 13 - Sindhi Bible

¹ بادشاهہ يربعام جي ارڙهين ورهيہ ۾ ابياہ يهوداہ تي بادشاهي ڪرڻ لڳو.

² هن يروشلم ۾ ٽي سال بادشاهي ڪئي: ۽ سندس ماءُ جو نالو ميڪاياہ هو جا جبعہ واري اوري ايل جي ڌيءَ هئي. ۽ ابياہ ۽ يربعام جي وچ ۾ جنگ رهندي هئي.

³ ۽ ابياہ چئن لکن چونڊيل جنگي بهادرن جي لشڪرن سان وڃي جنگ ۾ داخل ٿيو: ۽ يربعام اٺ لک چونڊيل ماڻهو، جي همت وارا بهادر مرد هئا، تن سان هن جي مقابلي ۾ صفون ٻڌي بيٺو.

⁴ ۽ ابياہ صمريم جبل تي چڙهي بيٺو، جو افرائيم جي ڪوهستان ۾ آهي ۽ چوڻ لڳو تہ، اي يربعام، ۽ اي ڪل اسرائيليو، منهنجي ڳالهہ ٻڌو؛

⁵ اوهان کي ايترو معلوم نہ آهي ڇا، تہ خداوند، اسرائيل جي خدا، دائود کي اسرائيل تي هميشہ جي لاءِ بادشاهي ڏني، جهڙو هن کي، تهڙو سندس پٽن کي، ۽ اُها هن لوڻ جي عهد اقرار موجب ڏني آهي؟

⁶ انهيءَ هوندي بہ يربعام بن نباط، جو سليمان بن دائود جو ٻانهو هو، تنهن اُٿي پنهنجي ڌڻيءَ جي برخلاف بغاوت ڪئي.

⁷ ۽ هن وٽ بيهودا ماڻهو، شيطان زادا، اچي گڏ ٿيا، ۽ جڏهن رحبعام اڃا ننڍو ۽ نرم دل هو، ۽ هنن سان مقابلو ڪري نہ ٿي سگهيو، تڏهن هو زور وٺي رحبعام بن سليمان جي برخلاف ٿي بيٺا.

⁸ ۽ هاڻي اوهين سمجهو ٿا تہ خداوند جي بادشاهت، جا دائود جي پٽن جي هٿ ۾ آهي، تنهن سان مقابلو ڪريو؛ ۽ اوهين گهڻا ماڻهو آهيو، ۽ اوهان سان سونا گابا آهن، جي يربعام جوڙي اوهان کي معبود ڪري ڏنا آهن.

⁹ ۽ اوهان خداوند جي ڪاهنن، هارون جي پٽن کي، ۽ لاوين کي هڪلي نہ ڪڍيو آهي ڇا، ۽ ٻين قومن وانگي پنهنجي لاءِ ڪاهن نہ مقرر ڪيا آهن ڇا؟ ۽ جيڪو هڪڙو جوان ڍڳو ۽ ست گهٽا پاڻ سان وٺي پاڻ کي پاڪ ڪرڻ لاءِ ٿو اچي سو انهن جو ڪاهن ٿو بنجي، جي خدا ناهن.

¹⁰ پر اسان جي لاءِ خداوند اسان جو خدا آهي، ۽ اسان انهيءَ کي نہ ڇڏيو آهي؛ ۽ اسان وٽ هارون جا پٽ، خداوند جي خدمت ڪرڻ لاءِ ڪاهن آهن، ۽ لاوي پنهنجي ڪم ۾ مشغول آهن:

¹¹ ۽ اهي ڏهاڙي صبح جو ۽ شام جو خداوند جي لاءِ سوختني قربانيون، ۽ لوبان ساڙين ٿا: ۽ نذر جي ماني بہ هو پاڪ ميز تي ٺاهي ٿا رکن؛ ۽ سون جو شمعدان ڏيئن سميت هر روز شام جو ٿا ٻارين: ڇالاءِ جو اسين خداوند پنهنجي خدا جي حڪم جي سنڀال ٿا ڪريون؛ پر اوهان هن کي ڇڏي ڏنو آهي.

¹² ۽ ڏسو، خدا اسان ساڻ آهي، ۽ اسان جو سردار آهي، ۽ هن جا ڪاهن اوهان جي برخلاف زور سان قرنائون وڄائڻ لاءِ تيار بيٺا آهن. اي بني اسرائيليو، خداوند پنهنجي ابن ڏاڏن جي خدا سان نہ وڙهو؛ ڇالاءِ جو اوهين فتحياب نہ ٿيندا.

¹³ پر يربعام هنن جي پٺيان هڪڙو لڪل لشڪر چوڌاري ڦيرائي آندو: جنهن ڪري هو يهوداہ جي اڳيان هئا، ۽ لڪل لشڪر هنن جي پٺيان هو.

¹⁴ ۽ جڏهن يهوداہ پٺتي نهاريو تڏهن ڏسو، هنن جي اڳيان توڙي پٺيان جنگ هئي: ۽ هنن خداوند کي دانهن ڪئي ۽ ڪاهنن قرنائون وڄايون.

¹⁵ تڏهن يهوداہ جي ماڻهن هڪڙو نعرو هنيو: ۽ جيئن يهوداہ جي ماڻهن نعرو هنيو، تيئن هيئن ٿيو تہ خدا، ابياہ ۽ يهوداہ جي اڳيان يربعام ۽ سڀني اسرائيلين کي شڪست ڏني.

¹⁶ ۽ بني اسرائيل يهوداہ جي اڳيان اٿي ڀڳا: ۽ خدا انهن کي هنن جي هٿن ۾ ڏيئي ڇڏيو.

¹⁷ ۽ ابياہ ۽ سندس ماڻهن هنن ۾ ڏاڍو ڪوس وڌو، ۽ هنن کي ڪُٺو: جنهنڪري اسرائيل جا پنج لک چونڊيل مرد مارجي ويا.

¹⁸ انهيءَ طرح بني اسرائيل انهيءَ وقت شڪست کاڌي، ۽ بني يهوداہ غالب پيا، ڇالاءِ جو هنن خداوند پنهنجي ابن ڏاڏن جي خدا تي ڀروسو رکيو.

¹⁹ ۽ ابياہ يربعام جي پٺيان پيو، ۽ هن کان هي شهر ورتائين؛ بيت ايل، ان جي شهرن سميت، ۽ يسانہ، ان جي شهرن سميت، ۽ عفرون، ان جي شهرن سميت.

²⁰ نڪي وري يربعام ابياہ جي ڏينهن ۾ نئين سر زور ورتو: ۽ خداوند هن کي ڌڪ هنيو ۽ هو مئو.

²¹ پر ابياہ زور وٺندو ويو، ۽ چوڏهن زالن سان شادي ڪيائين: ۽ کيس ٻاويهہ پٽ، ۽ سورهن ڌيئون ڄايون.

²² ۽ ابياہ جا ٻيا ڪم، ۽ سندس رستا، ۽ سندس ڳالهيون، عيدو نبيءَ جي تفسير ۾ لکيل آهن.