Yob 4 - Sranan Tongo Bible 2016

A fosi leisi di Elifas o taki

¹ Dan Elifas fu Teman bigin taki. A taigi Yob taki:

² “Mi no howpu tak' a o broko yu ati efu mi taki nanga yu. Bika suma bo man hori en mofo?

³ Yere, yu gi furu sma rai, èn yu kraka trawan.

⁴ Den wortu fu yu ben gi den wan di ben lasi ati dek'ati fu go moro fara, den swakiwan yu ben gi krakti.

⁵ Ma now di problema kon na tapu yu pasi, yu e lasi ati, now di den kon miti yu, yu e bruya.

⁶ Na fergiti yu fergiti tak' yu e dini Gado èn tak' yu e libi krin? Dat' meki yu no kan lasi howpu, ma yu mus tan fertrow.

⁷ Memre tak' Gado no e meki sma fadon di no e du ogri, tak' A no e meki ongoloku miti sma di de fu fertrow.

⁸ Wan sani mi sabi: a sma di e sai kruktudu nanga problema, e koti dati tu.

⁹ Wan bro fu Gado nomo èn den e dede, wan bro fu a atibron fu En, èn den no de fu feni moro.

¹⁰ Ogri-ati sma e meki babari leki lew, ma Gado e naki den tifi broko.

¹¹ Leki fa lew e dede te den no man feni nyan, na so ogri-ati sma e dede, èn den pikin fu den e waka lontu nomo e suku nyan.

^12-13 Wan leisi, di ala tra sma ben e sribi dipi, mi ben e draidrai na ini mi bedi e dren takru dren. Dan mi yere wan safri sten, mi yesi fanga fa wan sma e taki safri.

¹⁴ Ma wantronso mi ben bigin frede, mi heri skin ben bigin beifi.

¹⁵ Mi firi fa wan winti psa mi fesi, mi skin gro.

¹⁶ Dan mi si wan sani tnapu, ma mi no ben kan si san na en. Mi ben kan si wan sani di ben gersi wan skin, ma mi no ben man tak' krin san a ben de. Ala sei ben tiri. Dan mi yere wan safri sten taki:

¹⁷ ‘Wan libisma no man tyari ensrefi soleki fa Gado wani. Wan dyadyaman srefi no man tnapu sondro fowtu fesi a Wan di meki en.

¹⁸ Efu Gado no e fertrow den engel fu En srefi, efu A e feni fowtu na den ete,

¹⁹ o moro A no o fertrow libisma, di A meki fu kleidoti. Libisma meki fu tokotoko, dat' meki Gado e masi den kiri moro makriki dan fa sma e masi kakalaka kiri.

²⁰ Bunbun den kan de na libi mamanten, ma fosi neti tapu, Gado maskaderi den. Sondro fu densrefi sabi, den e dede gwe fu têgo.

²¹ A titei fu den tenti e koti. Den e dede gwe, sondro fu ben sabi Gado pasi.’