Yob 3 - Sranan Tongo Bible 2016

Yob na a fosiwan di bigin taki

¹ Te fu kba Yob opo en mofo èn a fluku a dei di a gebore.

² A taki:

³ “Gado, fluku a dei di mi gebore, fluku spesrutu a neti di mi m'ma taki: ‘Mi kisi wan manpikin!’

⁴ Gado, meki dungru tapu a dei dati. No prakseri en noiti moro, no meki a son opo na en tapu moro.

⁵ Meki a moro dipi dungru di de, lontu en, meki dungru wolku tapu en, meki ala a dungru dati meki a dei di mi gebore, beifi.

⁶ Gado, meki dungru teki a neti dati tyari gwe, no meki a teri leki wan fu den dei fu a yari, no meki a de fu feni srefsrefi na ini den mun.

⁷ Meki tak' noiti moro wan uma sa hori bere a neti dati, meki a tron wan neti pe sma no sa bari moro fu prisiri.

⁸ Meki den tofruman, den di sabi fa fu meki a Leviatan du san den wani, fluku a neti dati.

⁹ Meki den mamanten stari, no opo a mamanten dati, meki a neti dati wakti fu soso tapu a krin fu dei, meki dei no broko srefsrefi gi en.

¹⁰ Bika a neti dati gi a bere fu mi m'ma pasi fu mi kon gebore, a no kibri mi gi a ogri di ben e wakti mi.

¹¹ Fu sanede mi no dede di mi ben e kon na grontapu, fu sanede mi bro no koti di mi ben e kmopo ini a bere fu mi m'ma?

¹² Fu sanede den poti mi tapu den bowtu di mi gebore? Fu sanede mi m'ma gi mi bobi?

¹³ Efu mi ben dede di mi ben e gebore, mi bo didon fu mi na ondro gron. Mi bo sribi, sondro wan broko-ede,

¹⁴ makandra nanga kownu nanga den prenspari wrokoman fu den, den di ben meki kownu-oso, di broko fadon kba.

¹⁵ Mi bo sribi fu mi tu nanga den gudu tiriman fu kondre, den di ben furu den oso nanga gowtu nanga solfru.

¹⁶ Fu sanede den no beri mi leki wan pikin di dede ini a bere fu en m'ma, leki wan nyunyun pikin di noiti no si a krin fu dei?

¹⁷ Ini dedekondre den ogriman e tapu nanga a ogridu fu den, èn den di no abi krakti srefsrefi moro, kan feni bro.

¹⁸ Drape den sma de tiri fu den, di ben mus wroko fu soso gi trawan, den no e yere a bari moro fu den wan di ben e basi den.

¹⁹ Drape pôtiman nanga guduman na a srefi, èn srafu no abi basi moro.

²⁰ Fu sanede Gado e meki sma di e pina, nanga sma di ati broko, tan na libi?

²¹ Den sma dati e wakti dede, ma a no e kon, den e suku en, moro leki fa sma e diki suku gudu, di beri na ini a gron.

²² Den bo breiti srefsrefi te a libi fu den ben kon na wan kba, na ini den grebi nomo den bo prisiri.

²³ Fu sanede Gado e meki wan sma tan na libi, di no sabi san a mus du, wan sma gi san A tapu ala pasi?

²⁴ Bika prefu mi nyan, na dyeme nomo mi e dyeme, den kragi fu mi e kmopo leki watra na ini mi mofo.

²⁵ San mi ben e frede, na dati e miti mi. Sani ben e benawtu mi, na dati kon tapu mi pasi.

²⁶ Mi no abi freide nanga misrefi, a no de tiri na mi inisei, soso fuga mi e fuga, problema e kon nomonomo.”