Yob 2 - Sranan Tongo Bible 2016

¹ Wan dei den engel go fesi MASRA èn satan ben go nanga den fesi MASRA tu.

² Ne MASRA aksi satan taki: “San yu ben e du so den ten disi?” Satan piki MASRA taki: “Mi ben go teki wan koiri na grontapu èn mi wakawaka na alasei fu en.”

³ Dan MASRA taigi satan taki: “Dan yu mus fu si fa Mi knekti Yob e tyari ensrefi. Bika no wan tra sma na grontapu de leki en. Sma no man sori finga na en tapu, a de fu fertrow, a e lespeki Mi èn a no wani abi not'noti fu du nanga ogridu. Èn yu e si tak' a e tan lespeki Mi, awinsi yu meki Mi meki bigi ogri miti en, sondro fu a du wan sani.”

⁴ Satan piki MASRA taki: “Iya dati tru! A libi fu en prenspari gi en moro ala sani. Libisma no abi trobi fu lasi ala sani, efu den kan tan na libi nomo.

⁵ Ma efu yu sa meki tak' wan siki naki en na en skin, te kon miti en bonyo srefi, Yu o si efu a no o fluku Yu na ala sma fesi.”

⁶ Dan MASRA taigi satan taki: “A bun, Mi e gi en abra na ini yu makti, ma na a libi fu en yu no mus go.”

⁷ Dan satan kmopo fesi MASRA, èn a naki Yob nanga takru sweri, fu en ede go miti en futu.

⁸ A sani dati meki Yob, di ben sidon ini asisi a pisten dati, teki wan pisi broko kleipatu èn bigin krasi en skin nanga en.

⁹ Dan a uma fu Yob taigi en taki: “Yu e tan lespeki Gado ete? A moro betre yu fluku En, dan yu dede!”

¹⁰ Ma Yob piki en taki: “Yu e tak' leki wan sma di no sabi Gado srefsrefi. Efu un e teki a bun fu di Gado, un mus teki a ogri tu!” Ala den sani dati di miti Yob, no meki Yob sondu nanga en mofo fu afrontu Gado.

¹¹ Yob ben abi dri mati: Elifas fu Teman, Bildad fu Suak nanga Sofar fu Naama. Di den yere fu a ogri di miti Yob, den teki a besroiti fu go luku en. Den bo miti densrefi na ondropasi èn den bo go na Yob fu low nanga en èn fu trowstu en.

¹² Den ben de pikinso fara ete di den si Yob, ma den no ben man bribi taki na en ben kon tan so. Ne den bari krei, den priti den krosi èn den fringi santi go na loktu fu fadon tapu den ede leki marki taki den ben e sari.

¹³ Dan den go sidon sei Yob na gron, seibi dei nanga seibi neti langa. No wan fu den opo en mofo fu taki nanga Yob, bika den si taki a ben e pina srefsrefi.