Titus 2 - Sranan Tongo Bible 2016

A bun leri

¹ Ma yu dati mus tan leri den sani di e akruderi nanga a bun leri.

² Yu mus leri den moro owru man taki den mus de nanga krin ai. Sma mus man lespeki den èn den mus abi wan krin ferstan. Den mus tranga ini a bribi, ini a lobi, nanga a fasi fa den e hori doro.

³ Den moro owru uma yu mus leri taki den mus libi wan fasi di e fiti wan sma di e dini Masra. Den no mus waka e pori trawan nen, èn den no mus de sma di lobi dringi. Ma den mus man gi bun rai.

⁴ Dan den o man leri den yongu uma fu lobi den masra nanga den pikin fu den.

⁵ Den mus leri den fu libi nanga ferstan èn fu hori densrefi wan krin fasi. Den mus leri den tu fu sorgu gi den oso, fu du bun gi trawan, èn fu saka densrefi ondro den masra. Na sowan fasi sma no sa man taki takru fu a boskopu fu Gado.

⁶ Den yongu man yu mus sori taki den mus libi nanga ferstan na ini ala sani.

⁷ Sorgu taki yu de wan eksempre gi den ini bun wroko. Te yu e gi leri, yu mus taki sani leki fa den de èn yu mus de seryusu.

⁸ A leri san yu e gi mus bun, sma no mus man taki na en tapu. Dan so ala sma di e feti wi, o kon na syen fu di den no o man taki ogri fu wi.

⁹ Yu mus taigi den srafu taki den mus du ala sani san den masra e taki èn den mus gi den masra prisiri. Den no mus e hari taki

¹⁰ èn den no mus fufuru. Ma den mus sori taki sma kan fertrow den. Dan ala sani san den o du, o meki taki sma o lobi a leri fu Gado wi Ferlusuman.

¹¹ Bika a bun-ati fu Gado kon na krin fu tyari ferlusu kon gi ala sma.

¹² A e leri wi taki wi mus drai wi baka gi den grontapu lostu nanga wan libi sondro Gado. A e leri wi tu taki ini a grontapu disi wi mus abi wan krin ferstan, wi mus du san bun ini Gado ai, èn wi mus libi leki fa Gado wani

¹³ ini a pisten san wi e wakti tapu a bun howpu di wi abi. Dati na te a glori fu wi bigi Gado èn Ferlusuman, Kristus Yesus, o kon fu si.

¹⁴ Na En ben dede fu wi ede, fu puru wi ini ala sondu èn fu meki wi tron En eigi folku di krin èn di e poti densrefi fu du bun wroko.

¹⁵ Nanga ala a leti di yu abi, yu mus leri den sma den sani disi, yu mus gi den dek'ati, èn yu mus sori den na tapu den fowtu. No meki no wan sma si yu fu noti.