Ruth 3 - Sranan Tongo Bible 2016

Noomi e yepi Ruth fu feni wan tra masra

¹ Wan bun dei Noomi taigi Ruth taki: “Mi pikin, mi mus sorgu taki yu feni wan masra nanga san yu kan libi switi.

² Yere, Boas di abi a gron pe yu ben go piki groto nanga den umasma, na un famiri. Tide neti a o go wai a buba puru na a groto, na a presi fu en pe a sani dati e du.

³ Dat' meki yu mus wasi èn lobi switismeri-oli na yu skin. Weri a moro moi krosi di yu abi dan yu e go na a presi pe den e masi a buba puru na a groto. Ma yu no mus meki a si yu kwet'kweti fosi a kba nyan nanga dringi.

⁴ Te a o go sribi yu mus luku bun pe a o go didon. Dan yu mus waka go na en, yu e opo a sribikrosi na en futusei dan yu e kanti didon drape. Te yu du dati, a o taigi yu san yu mus du.”

⁵ Ruth piki Noomi taki: “Mi sa du ala san yu taigi mi.”

⁶ Baka dati Ruth go na a presi pe Boas bo masi a buba puru na a groto èn a du ala san Noomi taigi en.

⁷ Di Boas ben kba nyan nanga dringi, a ben firi switi. Dan a go didon sribi na a ipi groto. Di a fadon na sribi, Ruth waka safri go na en, a opo a sribikrosi na en futusei dan a kanti didon drape.

⁸ Mindrineti Boas skreki wiki. A beni go nanga fesi èn a ben ferwondru fu si tak' wan uma didon na en futusei.

⁹ A aksi taki: “Suma na yu?” Ruth piki en taki: “Na mi Ruth, yu knekti. Fu di yu na wan famiri fu a sei fu mi masra di dede kba, èn fu di na yu abi a frantwortu fu sorgu gi mi, meki mi e aksi yu fu du dati tu.”

¹⁰ Boas piki en taki: “Masra sa blesi yu, mi pikin. A lobi di yu e sori a famiri now, bigi moro a lobi di yu ben sori kba. Bika yu ben kan suku wan moro yongu man, wan pôti noso wan guduwan, fu trow nanga yu.

¹¹ Ma yu no abi fu frede, mi pikin. Mi sa du ala san yu aksi mi, bika ala sma ini a foto sabi tak' yu na wan spesrutu uma.

¹² A tru tak' mi na wan fu den sma fu a famiri di abi a frantwortu fu sorgu gi yu, ma wan tra sma de ete ini a famiri di de moro krosbei.

¹³ Ma tan sribi dyaso tide neti. Efu tamara mamanten a man taki tak' a wani teki a frantwortu na en tapu fu sorgu yu, a kan du en. Ma efu a no wani, dan mi o teki en na mi tapu. Mi e sweri dati na a libilibi MASRA. Yu kan tan sribi dyaso te leki dei broko.”

¹⁴ So Ruth tan didon na Boas futusei te mus'dei. Ma fosi dei ben kon krin, taki sma ben kan si a fesi fu trawan, Ruth opo. Bika Boas no ben wani fu sma sabi taki a ben kon drape.

¹⁵ Fosi a ben gwe Boas meki a puru a duku di a ben bradi tapu en skowru. Boas meki a bradi en opo, dan a kanti sowan tutenti kilo groto na ini. A yepi Ruth poti en tapu en skowru, dan a go na foto.

¹⁶ Di Ruth doro na Noomi, Noomi aksi en taki: “Fa sani waka mi pikin?” Ne Ruth ferteri en ala sani di Boas du gi en.

¹⁷ A taigi en tu taki Boas gi en sowan tutenti kilo groto, fu di a no ben wani taki a ben mus kon nanga leigi anu baka na en.

¹⁸ Dan Noomi taigi Ruth taki: “Now yu kan de tiri fu yu te leki yu sabi fa sani o waka. Bika a no abi misi tak' a man disi no o teki bro solanga a no seti a tori disi tide.”