Roma 3 - Sranan Tongo Bible 2016

¹ Sortu wini un abi dan fu di un na Dyusma, èn sortu warti a abi fu besnei?

² A abi bun furu warti. Ini a fosi presi Gado ben gi den Dyusma a boskopu fu En.

³ Ma efu wantu sma no ben du san Gado taki, dan yu wani taigi mi tak' Gado no o du san En e taki?

⁴ Kwet'kweti! Awinsi ala sma e lei, Gado no e lei. A de soleki fa a skrifi taki: “A o de fu si taki Yu abi leti, èn Yu o wini te den e krutu Yu.”

⁵ Ma efu a sondufasi fu wi e meki sma si moro krin tak' Gado abi leti, san un sa taki dan? Leki libisma un kan taki tak' Gado no e du sani nanga leti fu puru En atibron na un tapu. Ma un kan taki dati?

⁶ Kwet'kweti! Bika efu Gado no e du sani nanga leti, dan fa A sa man krutu grontapu dan?

⁷ Èn efu a leifasi fu mi e tyari kon na krin tak' Gado de fu fertrow, èn tak' sowan fasi A e kisi moro grani, dan fu sanede Gado e strafu mi leki wan sondusma?

⁸ Dan betre yu taki: “We, efu wan ogri e tyari wan bun, kon un du ogri dan!” Son sma e gi wi a pori nen taki na dati wi e leri. Ma a strafu san den o kisi, fiti den.

Ala sma na sondusma

⁹ Fa a sani de dan? A tru taki wi leki Dyusma betre moro den tra sma? Kwet'kweti! Bika wi ben sori kba taki ala sma sondu, Dyusma nanga sma di no de Dyu.

¹⁰ A de soleki fa a skrifi taki: No wan sma no bun ini Gado ai, no wan enkri sma srefi.

¹¹ No wan sma abi ferstan, èn no wan sma e suku Gado.

¹² Den alamala go waka den eigi pasi, èn no wan fu den no bun gi noti moro. No wan no de di e du bun, no wan enkri wan.

¹³ Den gorogoro de leki wan opo grebi, èn den tongo e taki soso lei. Den mofobuba e kiri yu, leki te wan takru sneki beti yu.

¹⁴ Den mofo furu nanga fluku èn nanga hati sani.

¹⁵ Den futu e lon es'esi fu go kiri,

¹⁶ èn ala pe den e go den e pori sani èn den e libi sari na baka.

¹⁷ Den no sabi san na freide,

¹⁸ èn den no abi lespeki gi Gado srefsrefi.

¹⁹ Wi sabi taki ala sani san a wèt e taki de gi den sma di ben libi ondro a wèt. Dan no wan sma o man abi wan sani fu taki, èn heri grontapu sa kon ondro a krutu fu Gado.

²⁰ Dat' meki no wan sma e kon bun ini Gado ai nomo fu di a du san a wèt e taki. Bika a wèt e meki wi kon sabi taki wi sondu.

Bribi e meki wi kon bun nanga Gado

²¹ Ma now, Gado meki un kon si taki A e meki sma kon bun ini En ai sondro a wèt. A Wèt nanga den Profeiti ben taki fu a sani disi.

²² Wi e kon bun ini Gado ai te wi bribi ini Yesus Kristus. Disi e teri gi ala sma di e bribi. A no abi trobi suma yu de.

²³ Bika ala sma sondu èn den no abi a fosi glori fu Gado moro.

²⁴ Ma di Kristus Yesus ferlusu wi, A meki wi kon bun ini Gado ai. Na En bun-ati meki A du dati. Wi no ben abi fu du noti.

²⁵ Gado seni Yesus kon fu meki wi kon bun baka nanga En, te wi bribi taki Yesus pai fu wi sondu nanga En brudu. Na so Gado sori taki A e du sani tapu wan leti fasi. Bika A no e luku den sondu fu a ten di de na un baka, ma A ben hori langa pasensi.

²⁶ Ini a ten disi A e sori un baka taki A e du sani nanga leti. So A e sori wi taki A bun, èn taki A e meki den sma kon bun ini En ai di e bribi ini Yesus.

²⁷ Dat' meki un no man meki bigi srefsrefi. Fu sanede? Fu di wi du san a wèt e taki? Nono, ma na fu di un bribi.

²⁸ Bika wi e bribi taki wan sma no e kon bun ini Gado ai fu di a e du san a wèt e taki, ma fu di a e bribi.

²⁹ San un e prakseri? Un prakseri taki Gado na a Gado fu den Dyusma wawan, èn taki A no de a Gado fu den tra folku tu? Meki mi taigi yu taki Gado na a Gado fu den tra folku tu.

³⁰ Bika na wan Gado nomo de di e meki Dyusma nanga sma di no de Dyu kon bun ini En ai te den bribi.

³¹ Yu denki taki a bribi disi e meki taki a wèt no e teri moro? Kwet'kweti! Bika soso te yu e bribi, yu o man hori a wèt.