Nomru 6 - Sranan Tongo Bible 2016

A fasi fa wan Nasireisma mus tyari ensrefi

¹ MASRA taigi moses taki:

² “Taigi den Israelitisma taki: ‘Te wan man noso wan uma meki wan spesrutu pramisi taki a wan poti ensrefi aparti gi MASRA leki wan Nasireisma,

³ dan sowan sma no sa dringi win noso wan tra sani di kan drungu en. A no sa dringi asin tu di meki fu win noso wan tra sani di kan drungu en. A no sa dringi wan sani tu di meki fu droifi èn a no sa nyan droifi tu, awinsi den drei.

⁴ A heri pisten di a e libi wan Nasireisma, a no sa nyan noti di kmoto fu a droifibon. No a koko noso a buba srefi fu a froktu.

⁵ A no sa koti en wiwiri tu solanga a ten no psa di a taki tak' a o libi leki wan Nasireisma. Solanga a ten no kba di a poti ensrefi aparti gi MASRA, a no sa koti en edewiwiri.

⁶ Solanga di a poti ensrefi aparti gi MASRA, a no sa kon pe wan dedeskin de.

⁷ Srefi efu na en p'pa, en m'ma, en brada noso en s'sa dede, a no sa doti ensrefi fu go na a dedeskin fu den, bika a e tyari a marki fu en Gado tapu en ede taki a de wan Nasireisma.

⁸ A poti aparti gi MASRA, solanga a de wan Nasireisma.

⁹ Efu a doti ensrefi fu di wan sma dede ini en birti sondro taki a ben sori na fesi taki a sma ben o dede, a sa krebi en ede tapu a dei di a o krin ensrefi. Dati sa de tapu a di fu seibi dei.

¹⁰ Tapu a di fu aiti dei a sa tyari tu stondoifi nanga tu yongu doifi go gi a priester na mofodoro fu a tenti pe yu kan miti nanga Gado.

¹¹ A priester sa tyari wan fu den doifi leki wan ofrandi fu kisi pardon fu sondu. A trawan a sa bron leki wan ofrandi. Dan a sa meki a man kon bun baka nanga Gado, fu di a ben sondu fu doti ensrefi nanga wan dedeskin. A srefi dei dati ete a man sa poti ensrefi aparti gi Gado baka.

¹² A sa poti ensrefi aparti baka gi MASRA leki wan Nasireisma, gi a srefi ten. A ten di a ben e libi leki wan Nariseisma kba no sa teri moro fu di a doti ensrefi. Leki paiman a sa tyari wan skapu fu wan yari leki ofrandi fu kan kisi pardon fu en sondu.

¹³ Disi na a wèt na san wan sma mus hori ensrefi te a wan poti ensrefi aparti leki wan Nasireisma. Te wan sma kon na a kba fu a ten di a ben poti ensrefi aparti leki wan Nasireisma, den sa tyari en go na mofodoro fu a tenti pe yu kan miti nanga Gado.

¹⁴ Drape a sa tyari ofrandi gi MASRA. A sa bron wan skapu fu wan yari leki ofrandi. Noti no mus mankeri a meti. A sa tyari wan uma skapu fu wan yari leki ofrandi fu kisi pardon fu en sondu. Noti no mus mankeri a meti disi tu. Moro fara a sa tyari wan man skapu leki freide-ofrandi. Noti no mus mankeri a meti disi.

¹⁵ Makandra nanga den meti a sa tyari wan baskita kon tu nanga brede di meki nanga fini blon sondro dyesi, buskutu di meki nanga oli, nanga plata brede di meki sondro dyesi èn gi san den lobi oli. Makandra nanga den sani disi a mus tyari a graan-ofrandi nanga win fu kanti leki ofrandi.

¹⁶ A priester sa tyari den sani go na MASRA fesi, dan a sa tyari a ofrandi gi en fu kisi pardon fu en sondu nanga a ofrandi di mus bron.

¹⁷ A man skapu a sa tyari leki freide-ofrandi gi MASRA, makandra nanga a baskita nanga den brede di meki sondro dyesi. A priester sa tyari a graan-ofrandi tu èn a sa kanti a win tu leki ofrandi.

¹⁸ Baka dati a sma di ben poti ensrefi aparti leki wan Nasireisma sa krebi en ede na mofodoro fu a tenti pe yu kan miti nanga Gado. A sa teki a wiwiri fu en dan a fringi en go ini a faya ondro a freide-ofrandi.

¹⁹ Te a man skapu bori, a priester sa teki wan skowru fu a man skapu, wan buskutu nanga wan plata brede di meki sondro dyesi di ben de ini a baskita, dan a sa poti den ini anu fu a Nasireisma baka te a krebi en ede.

²⁰ Baka dati a priester sa beweigi den na MASRA fesi leki wan ofrandi. Na wan santa sani di sa de spesrutu gi a priester. A borsu nanga a let'sei baka bowtu sa de fu a priester tu. Te ala den sani disi du, dan fosi a Nasireisma kan dringi win baka.

²¹ Disi na a wèt na san wan sma mus hori ensrefi, te a wan poti ensrefi aparti leki wan Nasireisma. A sa tyari a ofrandi di a mus tyari leki wan Nasireisma. A sa du ala sani finifini leki fa a pramisi taki a o du en. Efu a man, a kan tyari moro leki dati.’ ”

A fasi fa a priester sa blesi a folku

²² MASRA taigi Moses taki:

²³ “Taigi Aaron nanga den manpikin fu en taki: ‘Tapu a fasi disi yu sa blesi den Israelitisma:

²⁴ Meki MASRA blesi yu èn kibri yu.

²⁵ Meki MASRA sori yu En lobi nanga En bun-ati.

²⁶ Meki MASRA luku yu nanga prisiri èn meki A gi yu freide.’ ”

²⁷ Baka dati MASRA taigi en taki: “Efu den kari Mi nen a fasi disi abra den Israelitisma, Mi sa blesi den.”