Nomru 2 - Sranan Tongo Bible 2016

A fasi fa den lo ben mus seti densrefi

¹ MASRA taigi Moses nanga Aaron taki:

² “Den Israelitisma mus tan na wan. Ibrisma mus tan pe en eigi fraga de, nanga a marki fu en famiri. Den sa seti den kampu lontu a tenti pe yu kan miti nanga Gado, ma no tumsi krosbei fu en.

³ A kampu fu Yuda sa seti na a oostsei, a sei pe a son e opo. Drape a fraga fu den sa de. A kapten fu den bakapikin fu Yuda ben de Nakson, a manpikin fu Aminadab.

⁴ A legre fu en ben abi seibitenti-na-fo dusun nanga siksi hondro man.

⁵ Na a srefi sei fu Yuda a lo fu Isakar sa seti ensrefi. A kapten fu den bakapikin fu Isakar ben de Netanel, a manpikin fu Suar.

⁶ A legre fu en ben abi feifitenti-na-fo dusun nanga fo hondro man.

⁷ A lo fu Sebulon sa de na a sei dati tu. A kapten fu den bakapikin fu Sebulon ben de Eliab, a manpikin fu Helon.

⁸ A legre fu en ben abi feifitenti-na-seibi dusun nanga fo hondro man.

⁹ Ala den mansma san den ben teri ini a kampu fu Yuda, ben de wan hondro aititenti-na-siksi dusun nanga fo hondro man. Den ben mus de den fosiwan di ben mus broko a kampu fu den te den ben o hari go moro fara.

¹⁰ A kampu fu Ruben sa seti na zuidsei. Drape a fraga fu den sa de. A kapten fu den bakapikin fu Ruben ben de Elisur, a manpikin fu Sedeur.

¹¹ A legre fu en ben abi fotenti-na-siksi dusun nanga feifi hondro man.

¹² Na a srefi sei fu Ruben a lo fu Simeon sa seti ensrefi. A kapten fu den bakapikin fu Simeon ben de Selumiyel, a manpikin fu Surisadai.

¹³ A legre fu en ben abi feifitenti-na-neigi dusun nanga dri hondro man.

¹⁴ A lo fu Gad sa de na a sei dati tu. A kapten fu den bakapikin fu Gad ben de Elyasaf, a manpikin fu Reuel.

¹⁵ A legre fu en ben abi fotenti-na-feifi dusun nanga siksi hondro nanga feifitenti man.

¹⁶ Ala den mansma san den ben teri ini a kampu fu Ruben, ben de wan hondro feifitenti-na-wan dusun nanga fo hondro feifitenti man. Den sa de nomru tu di mus broko a kampu fu den te den ben o hari go moro fara.

¹⁷ Baka dati a tenti pe yu kan miti nanga Gado nanga a kampu fu den Lefitisma sa broko. Den de leti na mindri fu den tra kampu. Leki fa den kampu seti na so den mus broko den tu. Ibriwan tapu en eigi presi, pe a fraga fu en de.

¹⁸ A kampu fu Efraim sa de na a westsei. Drape a fraga fu den sa de. A kapten fu den bakapikin fu Efraim ben de Elisama, a manpikin fu Amihud.

¹⁹ A legre fu en ben abi fotenti dusun nanga feifi hondro man.

²⁰ Na a srefi sei fu Efraim a lo fu Manase sa seti ensrefi. A kapten fu den bakapikin fu Manase ben de Gamliyel, a manpikin fu Pedasur.

²¹ A legre fu en ben abi dritenti-na-tu dusun nanga tu hondro man.

²² A lo fu Benyamin sa de na a sei dati tu. A kapten fu den bakapikin fu Benyamin ben de Abidan, a manpikin fu Gidoni.

²³ A legre fu en ben abi dritenti-na-feifi dusun nanga fo hondro man.

²⁴ Ala den mansma san den ben teri ini a kampu fu Efraim, ben de wan hondro aiti dusun nanga wan hondro man. Den sa de nomru dri di ben mus broko a kampu fu den te den ben o hari go moro fara.

²⁵ A kampu fu Dan sa de na a noordsei. Drape a fraga fu den sa de. A kapten fu den bakapikin fu Dan ben de Akiyeser, a manpikin fu Amisadai.

²⁶ A legre fu en ben abi siksitenti-na-tu dusun nanga seibi hondro man.

²⁷ Na a srefi sei fu en a lo fu Aser sa seti ensrefi. A kapten fu den bakapikin fu Aser ben de Pagiyel, a manpikin fu Okran.

²⁸ A legre fu en ben abi fotenti-na-wan dusun nanga feifi hondro man.

²⁹ A lo fu Naftali sa de na a sei dati tu. A kapten fu den bakapikin fu Naftali ben de Akira, a manpikin fu Enan.

³⁰ A legre fu en ben abi feifitenti-na-dri dusun nanga fo hondro man.

³¹ Ala den mansma san den ben teri ini a kampu fu Dan, ben de wan hondro feifitenti-na-seibi dusun nanga siksi hondro man. Den sa de den laste grupu di ben mus broko a kampu fu den ten den ben o hari go moro fara.”

³² Disi ben de den famiri fu den Israelitisma di den ben teri. A heri legre ben abi siksi hondro dri dusun nanga feifi hondro nanga feifitenti man.

³³ Ma den no ben teri den Lefitisma makandra nanga den tra Israelitisma, leki fa MASRA ben komanderi Moses.

³⁴ Den Israelitisma ben du ala sani so leki fa MASRA ben komanderi Moses. Ibri sma ben de pe en fraga ben de. A srefi fasi den ben broko a kampu fu den tu. Den ben bigin na den afo fu seti ibrisma na en eigi famiri.