Nomru 10 - Sranan Tongo Bible 2016

Den trompet

¹ MASRA taigi Moses taki:

² “Meki tu solfru trompet. Meki den fu solfru di naki plata. Den sa dini fu kari ala sma kon na wan èn a sa de wan marki tu te un mus broko a kampu fu hari go moro fara.

³ Te den bro wan syatu leisi tapu ala tu trompet, dan ala sma sa kon makandra na yu na mofodoro fu a tenti pe yu kan miti nanga Gado.

⁴ Te den bro wan syatu leisi tapu wan fu den trompet nomo, dan na soso den fesiman, den edeman fu Israel, sa kon na yu.

⁵ Te den bro wan langa leisi, dan ala den legre di de na a oostsei sa broko den kampu fu hari go moro fara.

⁶ Te den bro wan langa leisi fu a di fu tu tron, dan den legre di de na a zuidsei sa broko den kampu. Den sa bro wan langa leisi te den kampu mus broko.

⁷ Fu kari ala sma kon na wan, den sa bro wan syatu leisi nomo. Den no sa bro wan langa leisi.

⁸ Na den manpikin fu Aaron, sobun den priester, sa bro tapu den trompet. Na wan sani di un nanga den bakapikin fu unu sa tan du.

⁹ Te un de ini un kondre èn un e hari go feti nanga den feyanti fu unu di e trobi unu, un sa bro wan langa leisi tapu den trompet. Dan MASRA, un Gado, sa memre unu èn A sa ferlusu unu fu un feyanti.

¹⁰ Tapu den dei di un e meki prisiri, tapu den fesadei nanga tapu den dei fu a nyun mun, un sa bro wan syatu leisi tapu den trompet, te un e bron meti leki ofrandi nanga te un e tyari freide-ofrandi. Disi sa meki Gado memre unu. Mi na MASRA, un Gado.”

A folku e kmoto ini a Sinaisabana

¹¹ Ini a di fu tu mun fu a di fu tu yari, a wolku ben kmoto fu en presi tapu a tenti fu a ferbontu. Disi ben de tapu a di fu tutenti dei fu a mun.

¹² Dan den Israelitisma kmoto na ini a Sinaisabana. Den kmoto tapu a fasi fa den ben leri taki den ben mus du en. Dan a wolku tan tnapu ini a Paransabana.

¹³ Disi ben de a fosi leisi di den ben broko a kampu fu hari go moro fara, tapu a fasi di MASRA ben komanderi Moses taki den mus du en.

¹⁴ Den legre di ben de na a sei pe a fraga fu Yuda de, ben de den fosi wan di ben broko den kampu. A kapten fu a legre fu Yuda ben de Nakson, a manpikin fu Aminadab.

¹⁵ A kapten fu a legre fu Isakar ben de Netanel, a manpikin fu Suar.

¹⁶ A kapten fu a legre fu Sebulon ben de Eliab, a manpikin fu Helon.

¹⁷ Baka dati den broko a santa tenti. Den bakapikin fu Gerson nanga Merari di e tyari a santa tenti sa broko den kampu tu.

¹⁸ Dan den legre di de na a sei pe a fraga fu Ruben de, sa broko den kampu. A kapten fu a legre fu Ruben ben de Elisur, a manpikin fu Sedeur.

¹⁹ A kapten fu a legre fu Simeon ben de Selumiyel, a manpikin fu Surisadai.

²⁰ A kapten fu a legre fu Gad ben de Elyasaf, a manpikin fu Rehuel.

²¹ Baka dati den bakapikin fu Kehat sa broko den kampu. Den ben e syow den santa sani. Te den ben e meki santa tenti baka, a ben e meki fosi den bakapikin fu Kehat ben doro na a presi pe a nyun kampu ben o meki.

²² Dan den legre di de na a sei pe a fraga fu Efraim de, sa broko den kampu. A kapten fu a legre fu Efraim ben de Elisama, a manpikin fu Amihud.

²³ A kapten fu a legre Manase ben de Gamliyel, a manpikin fu Pedasur.

²⁴ A kapten fu a legre fu Benyamin ben de Abidan, a manpikin fu Gidoni.

²⁵ Den legre di de na a sei pe a fraga fu Dan de, sa de den laste wan di sa broko den kampu. A kapten fu a legre fu Dan ben de Akiyeser, a manpikin fu Amisadai.

²⁶ A kapten fu a legre fu Aser ben de Pagiyel, a manpikin fu Okran.

²⁷ A kapten fu a legre fu Naftali ben de Akira, a manpikin fu Enan.

²⁸ Disi ben de a fasi fa den legre fu den Israelitisma ben mus broko den kampu èn a fasi disi den ben e hari go moro fara.

²⁹ Dan Moses taigi Hobab taki: “Wi e hari go na a presi fu san MASRA taigi wi taki: ‘Mi sa gi en na unu.’ Kon nanga wi. Yu o abi en bun na wi, bika MASRA taigi Israel taki den o abi en bun.” Hobab ben de a manpikin fu Rehuel. Rehuel ben de fu Midyan èn a ben de a p'pa fu a frow fu Moses.

³⁰ Ma Hobab piki Moses taki: “Nono. Mi wani go baka na mi kondre nanga den famiri fu mi.”

³¹ Dan Moses taigi en taki: “No gwe libi wi. Yu sabi den presi ini a sabana pe wi kan meki wi kampu. Yu na a sma di kan tyari wi.

³² Efu yu kon nanga wi, dan wi sa meki yu teki prati ini den bun di MASRA sa gi unu.”

³³ Dan den kmoto na a bergi fu MASRA. Den hari dri dei langa go moro fara. A kisi fu a ferbontu fu MASRA ben e go na den fesi fu suku wan presi gi den fu rostu.

³⁴ Te deiten a wolku fu MASRA ben e anga abra den te den ben e broko a kampu fu hari go moro fara.

³⁵ Te a kisi ben e hari go moro fara Moses ben e taki: “Opo MASRA. Meki den feyanti fu Yu panya. Meki den wan di no lobi Yu lon gwe gi Yu.”

³⁶ Te a kisi ben tan tapu wan presi, Moses ben e taki: “Drai kon baka MASRA, drai kon na den dusundusun sma fu Israel.”