Mateus 28 - Sranan Tongo Bible 2016

Yesus kon baka na libi

¹ Fruku mamanten, baka a sabatdei, Maria fu Magdala nanga a tra Maria go luku a grebi fu Yesus. A ben de a fosi dei fu a wiki.

² Ma wantron so, a gron bigin seki hebi fu di wan engel fu Masra saka kmoto na heimel. A engel go na a grebi, a lolo a bigi ston puru, dan a go sidon na en tapu.

³ A fesi fu a engel ben gersi a faya di e koti na loktu, èn den krosi fu en ben weti leki katun.

⁴ Den srudati di ben e hori wakti skreki sote taki den tan didon leki dedesma.

⁵ Dan a engel taigi den uma taki: “No frede! Mi sabi taki un e suku Yesus di den ben spikri na a kroisi.

⁶ A no dya, bika A kon baka na libi soleki fa A ben taki. Kon, luku a presi pe A ben didon.

⁷ Dan un go es'esi go taigi den man di ben teki leri fu En taki: ‘A kon na libi baka. Arki, A sa go na un fesi na Galilea. Drape un sa si En.’ Na disi mi kon fu taigi unu.”

⁸ Den uma gwe wantron fu a grebi. A skreki ben de ini den skin ete, ma den ben breiti srefsrefi. Den lon go es'esi fu go ferteri den man di ben teki leri fu Yesus san a engel ben taki.

⁹ Di den ben de na pasi, ne Yesus waka miti den èn A taki den odi. Den uma waka go na En, den grabu den futu fu En èn den anbegi En.

¹⁰ Dan Yesus taigi den taki: “No frede. Un go taigi den man fu Mi fu den go na Galilea. Drape den o si Mi.”

Den srudati ferteri san psa

¹¹ A srefi pisten di den uma ben e go na den man di ben e teki leri fu Yesus, wantu fu den srudati ben go na a foto dan den ferteri den prenspari priester ala den sani di psa.

¹² Den disi hori wan konmakandra nanga den fesiman fu a folku fu taki a tori. Dan den teki a besroiti fu gi den srudati furu moni,

¹³ èn den taigi den taki: “Un mus ferteri den sma taki: ‘Neti yuru den man di ben e teki leri fu En kon fufuru a dedeskin di un ben e sribi.’

¹⁴ Efu Pilatus yere a tori, wi sa taki nanga en fu sorgu taki a no strafu unu.”

¹⁵ So den srudati teki a moni, dan den du san den man taigi den fu du. Den Dyusma e taki a tori disi te leki a dei fu tide.

A wroko di Yesus libi gi bribisma

¹⁶ Den erfu man di ben e teki leri fu Yesus go na Galilea na a bergi pe Yesus ben taigi den fu go.

¹⁷ Di den si En, den anbegi En, ma sonwan fu den no ben e bribi ete efu na Yesus trutru.

¹⁸ Ne Yesus kon moro krosbei, dan A taigi den taki: “Gado gi Mi ala makti na ini heimel nanga grontapu.

¹⁹ Un go na ala folku fu grontapu. Un mus meki den kon tron sma di e teki leri fu Mi. Dopu den ini a nen fu a P'pa, a Manpikin nanga a Santa Yeye.

²⁰ Leri den fu du ala sani di Mi ben taigi unu. Arki, Mi de nanga unu ala dei te na a kba fu grontapu.”