Lukas 3 - Sranan Tongo Bible 2016

Yohanes a dopuman

¹ A ben de tin-na-feifi yari kba taki Tiberius ben de grankownu. A ten dati Pontius Pilatus ben de granman fu Yudea. Herodes ben e tiri Galilea. Filipus, a brada fu Herodes, ben e tiri Iturea nanga Trakonitus. Èn Lisanias ben e tiri Abilena.

² Kayafas nanga Anas ben de granpriester. Ini a srefi yari dati Gado ben gi Yohanes, a manpikin fu Sakarias, wan boskopu di a ben de ini a dreisabana.

³ So Yohanes ben waka ini a heri birti fu a Yordanliba e bari a boskopu taki den sma mus drai den libi èn teki dopu. Na sowan fasi Gado ben o gi den pardon fu den sondu.

⁴ Ini a buku fu a profeiti Yesaya, a skrifi taki: Wan sma e bari wroko ini a dreisabana taki: Meki pasi klari gi Masra, puru ala boktuboktu gi En.

⁵ Tapu ala den dipi olo, èn puru den bergi na pasi, pikinwan nanga bigiwan. No wan kronkron pasi mus de, èn den olo-olo pasi mus kon grati.

⁶ Dan so ala sma sa si a Ferlusuman, di Gado o seni kon.

⁷ Dan Yohanes taigi a bigi ipi sma di ben kon na en fu teki dopu taki: “Un sneki unu! Suma gi un wan pingi fu lon gi a strafu fu Gado di de fu kon?

⁸ Efu trutru un drai un libi, meki a de fu si dan. Un no bigin prakseri ini unsrefi taki: ‘Wi na bakapikin fu Abraham.’ Bika mi e taigi un taki: Gado kan meki den ston disi tron bakapikin fu Abraham.

⁹ A aksi de klar'klari kba na den rutu fu den bon. Ibri bon di no e gi bun froktu, den o kapu puru èn fringi go ini a faya.”

¹⁰ Dan den sma aksi en taki: “We, san un mus du dan?”

¹¹ Yohanes piki den taki: “A sma di abi tu empi mus gi wan na a sma di no abi, èn a sma di abi nyanyan mus gi a sma di no abi.”

¹² Den man di e piki lantimoni ben kon fu teki dopu tu. Dan den aksi Yohanes taki: “Meister, san unu mus du?”

¹³ A piki den taki: “No teki moro moni leki san yu mus teki.”

¹⁴ Den srudati srefi aksi en taki: “Èn san un dati mus du?” A piki den taki: “No teki sma moni nanga tranga, èn no lei gi wan sma di no du noti. A moni san un e kisi mus de nofo gi unu.”

¹⁵ Dan fu di a folku ben abi bigi howpu, meki den aksi densrefi efu a no Yohanes na a Mesias.

¹⁶ Dat' meki Yohanes taigi den taki: “Mi e dopu unu nanga watra, ma wan Man e kon di abi makti moro mi. Mi no warti srefi fu lusu en susu puru na En futu. Na En o dopu unu nanga a Santa Yeye èn nanga faya.

¹⁷ A hori En wrokosani na ini En anu fu wai a buba puru ini a graan. A graan A o poti na ini En maksin, ma den buba A o bron na ini faya di no man dede.”

¹⁸ Nanga furu tra wortu Yohanes ben ferteri den sma a bun nyunsu.

¹⁹ A ben piri ai tu gi a tiriman Herodes fu di a ben trow nanga Herodias, a uma fu en brada, èn fu ala den tra ogri san a ben du.

²⁰ Dan Herodes du wan moro bigi ogri di a poti Yohanes na straf'oso.

Yesus teki dopu

²¹ Wan dei di Yohanes ben e dopu sma, Yesus srefi go teki dopu. Dan di Yesus ben e begi, heimel opo

²² èn a Santa Yeye saka leki wan libilibi doifi kon na En tapu. Ne wan sten taki kmopo fu heimel taki: “Yu na mi Manpikin di Mi lobi. Mi abi prisiri nanga Yu.”

Den afo fu Yesus

²³ Yesus ben abi dritenti yari so di A bigin nanga En wroko. Den sma ben sabi En leki a manpikin fu Yosef. Yosef ben de a manpikin fu Eli.

²⁴ Eli ben de a manpikin fu Matat èn Matat ben de a manpikin fu Lefi. Lefi ben de a manpikin fu Melki èn Melki ben de a manpikin fu Yanai. Yanai ben de a manpikin fu Yosef,

²⁵ èn Yosef ben de a manpikin fu Matatias. Matatias ben de a manpikin fu Amos èn Amos ben a manpikin fu Nahum. Nahum ben de manpikin fu Hesli èn Hesli ben a manpikin fu Nagai.

²⁶ Nagai ben de a manpikin fu Maat èn Maat ben de a manpikin fu Matatias. Matatias ben de a manpikin fu Semeyin èn Semeyin ben de a manpikin fu Yosek. Yosek ben de a manpikin fu Yoda,

²⁷ èn Yoda ben de a manpikin fu Yoanan. Yoanan ben de a manpikin fu Resa èn Resa ben de a manpikin fu Serubabel. Serubabel ben de a manpikin fu Sealtiyel èn Sealtiyel ben de a manpikin fu Neri.

²⁸ Neri ben de a manpikin fu Melki èn Melki ben de a manpikin fu Adi. Adi ben de a manpikin fu Kosam èn Kosam ben de a manpikin fu Elmadan. Elmadan ben de a manpikin fu Er.

²⁹ Er ben de a manpikin fu Yosua. Yosua ben de a manpikin fu Eliyeser èn Eliyeser ben de a manpikin fu Yorim. Yorim ben de a manpikin fu Matat èn Matat ben de a manpikin fu Lefi.

³⁰ Lefi ben de a manpikin fu Simeon èn Simeon ben de a manpikin fu Yuda. Yuda ben de a manpikin fu Yosef èn Yosef ben de a manpikin fu Yonan. Yonan ben de a manpikin fu Elyakim.

³¹ Elyakim ben de a manpikin fu Melea. Melea ben de a manpikin fu Mena èn Mena ben de a manpikin fu Matata. Matata ben de a manpikin fu Natan èn Natan ben de a manpikin fu David.

³² David ben de a manpikin fu Isai èn Isai ben de a manpikin fu Obed. Obed ben de a manpikin fu Boas èn Boas ben de a manpikin fu Salma. Salma ben de a manpikin fu Nakson.

³³ Nakson ben de a manpikin fu Aminadab. Aminadab ben de a manpikin fu Admin èn Admin ben de a manpikin fu Arni. Arni ben de a manpikin fu Hesron èn Hesron ben de a manpikin fu Peres. Peres ben de a manpikin fu Yuda.

³⁴ Yuda ben de a manpikin fu Yakob. Yakob ben de a manpikin fu Isak èn Isak ben de a manpikin fu Abraham. Abraham ben de a manpikin fu Tera èn Tera ben de a manpikin fu Nakor.

³⁵ Nakor ben de a manpikin fu Serug èn Serug ben de a manpikin fu Rehu. Rehu ben de a manpikin fu Peleg èn Peleg ben de a manpikin fu Eber. Eber ben de a manpikin fu Sela.

³⁶ Sela ben de a manpikin fu Kenan. Kenan ben de a manpikin fu Arpaksad èn Arpaksad ben de a manpikin fu Sem. Sem ben de a manpikin fu Noa èn Noa ben de a manpikin fu Lamek.

³⁷ Lamek ben de a manpikin fu Metusela èn Metusela ben de a manpikin fu Henok. Henok ben de a manpikin fu Yered èn Yered ben de a manpikin fu Mahalalel. Mahalalel ben de a manpikin fu Kenan.

³⁸ Kenan ben de a manpikin fu Enos. Enos ben de a manpikin fu Set èn Set ben de a manpikin fu Adam. Adam ben de a manpikin fu Gado.