Lukas 18 - Sranan Tongo Bible 2016

A agersitori fu a kruktu krutubakra

¹ Dan Yesus gi den sma fu En wan agersitori fu den kan ferstan taki den mus tan begi sondro fu lasi ati.

² A taki: “Yu ben abi wan krutubakra ini wan foto di no ben abi lespeki gi Gado, èn di no ben abi bisi nanga no wan sma.

³ Ini a srefi foto dati wan uma ben e libi di en masra ben dede kba. Ala yuru a uma disi ben e go taigi a krutubakra taki: ‘Gi mi a leti san mi mus kisi tapu a sma di du kruktu nanga mi.’

⁴ Wan heri pisten a krutubakra no ben wani du dati. Ma bakaten a prakseri taki: ‘Mi no abi lespeki gi Gado, èn mi no abi bisi nanga no wan sma.

⁵ Ma a uma disi e ferferi mi. Dat' meki mi o gi en leti, noso a o kon naki mi ini mi fesi.’ ”

⁶ Dan Masra aksi den taki: “Un yere san a kruktu krutubakra disi taki?

⁷ We, un denki taki Gado no sa gi leti na den sma di A teki gi Ensrefi èn di e begi En dei nanga neti fu A yepi den? Un denki taki A o meki den wakti?

⁸ Mi e taigi un taki: A o gi den leti her'esi. Ma te a Manpikin fu Libisma drai kon baka na grontapu, yu prakseri taki A sa feni sma di e bribi trutru?”

A Fariseiman nanga a man di e piki lantimoni

⁹ Dan Yesus gi ete wan agersitori. A disi ben de gi den sma di ben prakseri fu densrefi taki den bun ini Gado ai, èn di ben si tra sma leki noti. Yesus taki:

¹⁰ “Tu sma ben go na ini a tempel fu go begi. A wan ben de wan Fariseiman, a trawan ben de wan man di e piki lantimoni.

¹¹ A Fariseiman go tnapu e begi ini ensrefi. A taki: ‘Mi Gado, mi e taki Yu grantangi taki mi no de leki den tra sma. Mi no e fufuru, mi no e libi kruktu, èn mi no e huru. Mi e taki Yu grantangi tu taki mi no de leki a man drape di e piki lantimoni.

¹² Tu leisi ini wan wiki mi e faste, èn fu ala sani san mi e kisi, mi e gi Yu tin prosenti.’

¹³ Ma a man di e piki lantimoni ben tan tnapu fara, èn a no ben wani opo en ai luku go na heimel. Bika a hati en tak' a ben sondu. A taki: ‘Tye, mi Gado, abi sari-ati nanga mi, bika mi na wan sondusma.’

¹⁴ Mi e taigi un taki: Di a man disi drai go baka na oso, a ben kon bun ini Gado ai. Ma disi no psa nanga a trawan. Bika Gado o broko a sma saka di e opo ensrefi, ma A o opo a sma di e saka ensrefi.”

Yesus blesi den pikin

¹⁵ Den sma ben e tyari den pikin kon na Yesus fu A fasi den. Di den man di ben e teki leri fu Yesus si san den sma e du, den bari den.

¹⁶ Ma Yesus kari den pikin kon na En. A taki: “Meki den pikin kon na Mi. No tapu den, bika na sma leki den pikin disi, Gado e tiri.

¹⁷ Fu tru Mi e taigi un taki: Efu yu no kon na Gado leki wan pikin fu A tiri yu, dan noiti yu o man kon ondro a tiri fu Gado.”

Yesus nanga a guduman

¹⁸ Dan wan edeman fu den Dyusma aksi Yesus taki: “Bun Meister, san mi mus du fu kisi a libi fu têgo?”

¹⁹ Yesus piki en taki: “Fu sanede yu e taki tak' Mi bun? No wan sma bun, boiti Gado.

²⁰ Yu srefi sabi san a wèt e taki: Yu no mus huru, yu no mus kiri, yu no mus fufuru, yu no mus lei gi trawan, èn yu mus lespeki yu m'ma nanga yu p'pa.”

²¹ A man piki En taki: “Sensi mi pikin mi hori ala den wèt disi.”

²² Di Yesus yere san a man taki, A taigi en taki: “Wan sani libi ete fu yu du. Seri ala sani san yu abi, dan yu e prati a moni gi den pôtisma. So yu o abi wan gudu na heimel. Baka dati yu e kon waka na Mi baka.”

²³ Ma di a man yere san Yesus taki, a sari sote, bika a ben gudu psa marki.

²⁴ Di Yesus si dati, A taki: “A tranga gi sma di lai moni fu den poti densrefi ondro a tiri fu Gado.

²⁵ Bika a moro makriki gi wan asaw fu psa ini wan nanai-olo, dan fu wan guduman poti ensrefi ondro a tiri fu Gado.”

²⁶ Den sma di yere san Yesus taki, aksi En taki: “Suma Gado o man ferlusu dan?”

²⁷ Yesus piki taki: “San libisma no man du, Gado kan du.”

²⁸ Dan Petrus taki: “Luku, wi libi ala sani san wi ben abi fu waka na Yu baka.”

²⁹ Yesus piki den taki: “Fu tru Mi e taigi un taki: Gado o pai ala sma di libi en oso, noso en uma noso en brada, den bigisma fu en noso en pikin, nomo fu meki taki Gado kon tiri libisma.

³⁰ Gado o pai en someni tron moro furu na ini a libi disi. Èn ini a ten san e kon, A o gi en a libi fu têgo.”

Yesus e taki a di fu dri leisi fu a pina di o miti En

³¹ Yesus kari den twarfu man fu En kon na wan sei, dan A taigi den taki: “Luku, un de na pasi fu go na Yerusalem. Ala sani san den profeiti ben skrifi taki o psa nanga a Manpikin fu Libisma, o psa tu.

³² Bika den o gi En abra na den sma di no de Dyu. Den o teki En leki spot'popki, den o kosi En, èn den o spiti na En tapu.

³³ Den o wipi En, dan den o kiri En. Ma tapu a di fu dri dei, A o kon baka na libi.”

³⁴ Ma den man no ben ferstan noti fu san Yesus taki. A ben dangra den, èn den no ben sabi fu san A ben taki.

Yesus meki wan breniman si

³⁵ A ten di Yesus doro krosbei fu Yeriko, wan breniman ben sidon sei a pasi e begi moni.

³⁶ Di a man yere wan bigi grupu sma e psa, a aksi san de fu du.

³⁷ Den sma taigi en taki: “Yesus fu Nasaret e psa.”

³⁸ Dan a man bari taki: “Yesus, Manpikin fu David, abi sari-ati nanga mi!”

³⁹ Den sma di ben waka na fes'sei bari en fu a tapu en mofo. Ma a bigin bari moro tranga taki: “Yesus, Manpikin fu David, abi sari-ati nanga mi!”

⁴⁰ Ne Yesus tan tnapu dan A meki den tyari a man kon na En. Di a man kon krosbei,

⁴¹ Yesus aksi en taki: “San yu wani taki Mi mus du gi yu?” A man piki taki: “Masra, mi wani si.”

⁴² Yesus piki en taki: “Yu sa si baka. A bribi fu yu meki yu kon betre.”

⁴³ Wantron a man bigin si, dan a bigin waka baka Yesus e gi Gado grani. Di ala den sma si san psa, den prijse Gado.