Leviticus 27 - Sranan Tongo Bible 2016

¹ MASRA taigi Moses taki:

² “Taigi den sma fu Israel taki: ‘Te wan sma pramisi fu pai MASRA a moni di wan sma warti,

³ dan na disi a mus pai: gi wan mansma fu tutenti yari kon miti siksitenti yari, un sa pai feifitenti solfru moni. A moni disi mus wegi leki fa den e wegi den sani di de fanowdu gi a santa presi.

⁴ Efu na wan umasma, un sa pai dritenti solfru moni.

⁵ Efu na wan sma fu feifi yari kon miti tutenti yari, dan un sa pai tutenti solfru moni gi wan mansma nanga tin solfru moni gi wan umasma.

⁶ Efu na wan pikin fu wan mun kon miti feifi yari, dan un sa pai feifi solfru moni gi wan manpikin nanga dri solfru moni gi wan umapikin.

⁷ Efu na wan sma fu siksitenti yari noso moro owru, dan un sa pai tin-na-feifi solfru moni gi wan mansma nanga tin solfru moni gi wan umasma.

⁸ Efu a sma di pramisi fu pai a moni no man pai a moni, a sa tyari a sma gi san a bo pai a moni go na a priester. Dan a priester sa kari wan tra moni gi en, di a man pai.

⁹ Efu na wan meti di yu kan tyari leki wan ofrandi gi MASRA a sma ben pramisi, dan den mus si a meti dati leki wan meti di poti aparti.

¹⁰ Den no sa kenki en fu poti wan trawan ini en presi moro. Den no sa poti wan tra meti di no bun so, leki a wan di den ben poti kba. Den no sa poti wan moro bun wan tu, dan a wan di den ben poti kba. Efu den kenki a meti gi wan trawan, dan den mus si ala tu meti leki meti di poti aparti.

¹¹ Efu a sma ben pramisi fu gi wan meti di no krin ini Gado ai, sobun wan meti di yu no kan tyari leki wan ofrandi gi MASRA, den sa tyari a meti go na a priester.

¹² A priester sa luku san bun nanga san no bun na a meti, nanga omeni yu bo pai gi sowan meti. Te a priester taki omeni yu mus pai gi sowan meti, a sa tan so taki na dati yu mus pai.

¹³ Efu a sma di abi a meti wan bai a meti baka, dan a sa pai a moni di a priester ben taki tak' a mus pai gi a meti nanga tutenti prosenti moro na en tapu.

¹⁴ Te wan sma poti en oso leki wan santa sani aparti gi MASRA, a priester sa luku san bun nanga san no bun na a oso, nanga omeni yu bo pai gi sowan oso. Te a priester taki omeni yu mus pai gi a oso, dan a sa tan so taki na dati yu mus pai.

¹⁵ Efu a sma, di poti a oso aparti, wani bai a oso baka, a sa poti tutenti prosenti moro na en tapu, dan a oso sa de fu en.

¹⁶ Te wan sma poti wan pisi fu a gron fu en aparti gi MASRA, den sa luku omeni siri de fanowdu fu sai tapu a pisi gron dati, nanga omeni yu pai gi a siri. A moni di yu pai gi a siri sa de a moni di yu mus pai gi a pisi gron dati. Gi sowan tu hondro kilo tarwe yu sa pai feifitenti solfru moni.

¹⁷ Efu a poti a gron aparti na a bigin fu a yari fu gi baka, dan a sa tan so taki yu mus pai a moni fu a pisi gron dati te leki a tra yari fu gi baka.

¹⁸ Ma efu a poti a gron aparti baka a yari fu gi baka, dan a priester sa luku omeni yari de ete go miti a tra yari fu gi baka di de fu kon. Dan a sa pai fu den yari di libi ete.

¹⁹ Efu a sma di ben poti a gron aparti wan bai en baka, a sa poti tutenti prosenti moro na en tapu, dan a sa de fu en baka.

²⁰ Ma efu a no bai a gron gi ensrefi baka ma a seri en gi wan tra sma, dan a no o man bai a gron baka.

²¹ Te a gron kon fri ini a yari fu gi baka, a sa de fu MASRA fu têgo. A sa kon ini anu fu den priester.

²² Efu wan sma bai wan gron, di no ben de fu en, dan a poti en aparti gi MASRA,

²³ a priester sa luku omeni yari libi ete go miti a yari fu gi baka. Dan a priester sa taigi a sma omeni a mus pai gi a gron. A sma mus langa a moni a srefi dei dati gi a priester, leki wan sani di poti aparti gi MASRA.

²⁴ Ini a yari fu gi baka, a gron e go baka ini anu fu a sma fu san a ben bai en, sobun a sma di ben abi a gron fosi.

²⁵ Ala moni di mus pai, den sa wegi leki fa den e wegi den sani di de fanowdu gi a santa presi. Dati wani taki tak' wan sikkel na tutenti gera.

²⁶ A fosi pikin fu wan kaw, wan skapu noso wan krabita, un no sa poti aparti bika den na fu MASRA kba.

²⁷ Efu na a fosi pikin fu wan meti di no krin ini Gado ai, den sa luku omeni yu bo pai gi sowan meti, dan den sa bai en baka nanga tutenti prosenti moro na en tapu. Efu a sma no bai en baka, a priester sa luku omeni yu bo pai gi sowan meti, dan a seri en gi a moni dati.

²⁸ Efu wan sma poti wan sani fu en aparti gi MASRA taki a no wani en baka, dan a sa de so fu têgo. Sowan sani yu no kan seri noso bai baka gi yusrefi. A no a abi trobi efu na wan libisma noso wan meti. Ala sani di gi fu têgo na MASRA, na tumsi santa sani.

²⁹ No wan libisma di wan trawan gi fu têgo na MASRA, yu o man bai baka tu. Kiri nomo den sa kiri sowan sma.

³⁰ Tin prosenti fu a gron, fu a nyanyan fu a gron nanga fu den froktu fu den bon na fu MASRA. A sa poti aparti gi MASRA.

³¹ Efu a sma wan bai a tin prosenti baka, a sa poti tutenti prosenti moro na en tapu.

³² Un sa meki ala den kaw, skapu noso krabita fu unu waka psa a tiki fu a man di e luku den. Ala den di fu tin meti di e psa a tiki un sa poti aparti gi MASRA.

³³ Un no sa luku efu na wan bun meti noso efu a no de wan bun meti. Un no sa kenki a meti tu gi wan trawan. Ma efu un kenki en, dan ala tu meti sa poti aparti gi MASRA. Un no kan bai a meti baka.’ ”

³⁴ Disi na den gebod di MASRA gi Moses tapu a Sinaibergi gi den sma fu Israel.