Leviticus 26 - Sranan Tongo Bible 2016

A blesi fu du a wani fu Gado

¹ “Un no sa meki kruktu gado gi unsrefi. Un no sa koti udu ston noso wan tra sani tu fu meki wan popki fu en noso poti wan ston tnapu fu anbegi en. Un no sa tyerfi prentyi tu ini ston, dan un poti den tnapu ini un kondre fu boigi gi en. Mi na MASRA, un Gado.

² Un hori unu na den sani fu a sabatdei èn un mus abi lespeki gi a santa presi fu Mi. Mi na MASRA.

³ Efu un du den sani di un mus tan du èn un hori un na den gebod fu Mi,

⁴ dan Mi sa meki alen fadon tapu a yoisti ten. A gron sa gi nyanyan èn den bon sa gi froktu.

⁵ A ten fu masi a buba puru na a graan, sa tan te leki a ten doro fu un puru den droifi na den bon. A ten fu puru den droifi na den bon sa tan te leki a ten doro fu sai. Un sa nyan te un bere furu èn un sa libi sondro frede ini un kondre.

⁶ Mi sa meki freide de ini a kondre, fu un kan sribi sondro taki wan sani skreki unu. Mi sa yagi den krasi meti puru fu a kondre èn no wan tra kondre sa feti nanga unu.

⁷ Na unu sa meki den feyanti fu unu lon èn un sa kiri den na ini feti.

⁸ Feifi fu unu sa wini wan hondro èn wan hondro fu unu sa wini tin dusun fu un feyanti. Un sa kiri den na ini feti.

⁹ Mi sa sorgu gi unu. Mi sa meki un kisi furu pikin èn Mi sa meki un si taki Mi e hori Mi na a ferbontu.

¹⁰ Un sa nyan a nyanyan di un ben kibri poti ini maksin, te leki a ten doro fu un koti nyanyan baka. Dan un o abi fu puru a owru nyanyan ini den maksin fu meki presi gi a nyanyan di un koti now.

¹¹ Mi sa poti Mi tenti tnapu na un mindri èn Mi no sa drai Mi baka gi unu.

¹² Mi sa koiri na un mindri. Mi sa de un Gado èn un sa de Mi pipel.

¹³ Mi na MASRA, un Gado, di puru unu na ini Egiptekondre, fu un no de srafu fu den moro. Mi broko a hebi di ben de na un tapu fu un kan tnapu let'opu.

¹⁴ Ma efu un no wan arki Mi èn efu un no wan hori un na den gebod disi,

¹⁵ efu un no wani du den sani di un mus tan du, fu di un e si den fu noti, efu un no wani tan hori unsrefi na den sani fu Mi fu di un poti den na wan sei èn broko a ferbontu fu Mi fu di un no hori un na den gebod fu Mi,

¹⁶ dan na disi Mi sa du nanga unu: Mi sa meki ogri miti unu. Mi sa meki un kisi wan takru kosokoso nanga hebi korsu, di sa meki un ai kon dungru èn meki un bro de na tapu. Un sa sai fu soso bika den feyanti fu unu sa nyan sa un prani.

¹⁷ Mi sa drai Mi baka gi unu. Den feyanti fu unu sa fon unu èn den wan di no man si un srefsrefi na ai, sa basi unu èn un sa lowe sondro taki sma de na un baka.

¹⁸ Efu baka dati un no wani du ete san Mi taki, Mi sa strafu unu seibi tron moro hebi fu den sondu fu unu.

¹⁹ Mi sa broko a krakti tapu san un e bow. Mi no sa meki alen fadon. A heimel o gersi isri èn a gron o kon tranga leki kopro.

²⁰ Un sa lasi un krakti fu soso. A gron no sa gi nyanyan èn den bon no sa gi froktu.

²¹ Efu un tan kaka un futu èn un no wani arki Mi, Mi sa strafu unu seibi tron moro hebi fu den sondu fu unu.

²² Mi sa lusu krasi meti na un tapu. Den sa kiri den pikin fu unu èn priti ala den meti fu unu di un e kweki. Den sa kiri someni sma, taki sma no sa de fu si na strati.

²³ Efu den sani disi no meki un drai kon baka na Mi, ma un e tan kaka un futu,

²⁴ dan Mi sa kaka Mi futu gi unu tu. Mi sa strafu un ete wan leisi seibi tron moro hebi fu den sondu fu unu.

²⁵ Mi sa meki feti broko, fu di un no hori unu na a ferbontu. Te un go kibri ini den foto fu unu, Mi sa seni wan takru siki kon èn un o fadon na ini anu fu den feyanti fu unu.

²⁶ Mi o meki wan angriten broko. Wan onfu nomo o sari fu tin umasma baka den brede. Den o abi fu prati a brede ini pikinpikin pisi gi den ososma fu den. Unu o nyan ma un bere no o furu.

²⁷ Efu baka dati un no wani arki Mi ete èn un e tan kaka un futu,

²⁸ dan nanga atibron Mi sa strafu unu seibi tron moro hebi fu den sondu fu unu. Iya, Misrefi sa strafu unu.

²⁹ Dan un sa nyan den manpikin nanga den umapikin fu unu.

³⁰ Mi sa broko den presi pe un e tyari ofrandi èn den altari tapu san un e bron wierook, Mi sa naki trowe. Mi sa trowe den dedeskin fu unu tapu wan ipi nanga den kruktu gado fu unu èn Mi sa drai Mi baka gi unu.

³¹ Mi sa broko den foto fu unu trowe na gron. De santa presi fu unu Mi sa figi puru. Mi no wani smeri den switi smeri fu den ofrandi fu unu moro.

³² Mi sa broko a kondre tapu sowan fasi, taki den feyanti fu unu di o teki a kondre abra no o tnapu nanga opo mofo te den si en.

³³ Mi sa panya unu na mindri den tra folku. Tra kondre o de nomo na un baka fu feti nanga unu. A kondre fu unu o de wan sabana èn den foto fu unu o broko didon na gron.

³⁴ Te a kondre didon leki wan sabana, a sa kisi a rostu di a ben mus kisi. Bika den no ben gi a kondre a rostu di a ben mus kisi ini den sabat-yari. Unsrefi o de na ini a kondre fu unu feyanti te a kondre sa kisi a rostu. A kondre sa kisi a rostu di a ben mus kisi. Ma un no ben gi a kondre a rostu di a ben mus kisi ini den sabat-yari.

³⁵ A heri pisten di a kondre didon leki wan sabana, a sa rostu. Disi na a rostu di a ben mus kisi. Ma di un ben tan ini a kondre un no gi en a rostu ini den sabat-yari.

³⁶ Mi sa poti sowan frede ini a ati fu den wan fu unu di tan na libi ini a kondre fu un feyanti, taki den o lon suku kibripe efu wan wiwiri opo wai nomo. Den sa lowe leki te sma de na den baka fu kiri den èn den o fadon, sondro taki wan sma de na den baka.

³⁷ Den o lon fadon abra makandra leki te sma de na den baka fu kiri den, ma no wan sma o de na den baka. Un no o man hori feti nanga den feyanti fu unu tu.

³⁸ Un o dede ini wan kondre san no de un eigi kondre èn den o beri unu ini a kondre fu un feyanti.

³⁹ Den wan fu unu di de na libi ete, o pori gwe ini a kondre fu un feyanti, fu unu eigi sondu ede nanga fu di fu den afo fu unu.

⁴⁰ Ma efu den taki sortu sondu den nanga den afo fu den du, taki Mi no ben man fertrow den, taki den ben kaka den futu gi Mi,

⁴¹ èn taki na fu dat'ede Mi ben kaka Mi futu baka gi den èn tyari den go na a kondre fu den feyanti fu den, efu den saka densrefi, efu den no tranga den ati èn efu den wani tyari a strafu fu den sondu,

⁴² dan Mi sa memre a ferbontu fu Mi nanga Yakob, Isak nanga Abraham. Mi sa memre a kondre.

⁴³ Ma den sa abi fu gwe libi a kondre. Te den no drape, a kondre sa kisi a rostu di a ben mus kisi ini den sabat-yari. Ma un no ben gi en. Den sa butu fu den sondu di den du, fu di den no tan hori densrefi na den sani fu Mi, fu di den si den fu noti èn den no du den sani di den ben mus tan du, fu di den poti den na wan sei.

⁴⁴ Ma srefi te den de ini a kondre fu den feyanti, Mi no sa drai Mi baka gi den. Mi no sa broko a ferbontu nanga den èn Mi no sa kiri den, fu di Mi no wani si den srefsrefi moro. Bika Mi na MASRA, den Gado.

⁴⁵ Mi sa memre a ferbontu di Mi meki nanga den afo fu den. Mi puru den na ini Egiptekondre meki den tra folku si. Mi du dati fu Mi kan de wan Gado gi den. Mi na MASRA.”

⁴⁶ Disi na den sani na san den sma fu Israel ben mus tan hori densrefi, den sani di den ben mus tan du, nanga den wèt. MASRA ben meki Moses taigi den ala den sani disi èn den ben de fu leri den sma fu Israel fa den ben mus libi nanga En.